ନିର୍ଭୟ କଢ଼ି’ର ସଫଳତା : ଗଞ୍ଜାମର ୧୦୩୨ ଗାଁ, ୧୪୦ ୱାର୍ଡ଼ ବାଲ୍ୟ ବିବାହମୁକ୍ତ 

 

ଛତ୍ରପୁର : ବାଲ୍ୟ ବିବାହ ରୋକିବା ଲାଗି ଆରମ୍ଭ ହୋଇଥିବା ‘ନିର୍ଭୟ କଢ଼ି’ କାର୍ଯ୍ୟକ୍ରମରୁ ଗଞ୍ଜାମ ଜିଲ୍ଲାକୁ ସୁଫଳ ମିଳିଛି। ଏହି କୁପ୍ରଥା ଅନେକାଂଶରେ ରୋକିବାରେ ସଫଳ ହୋଇଛି ପ୍ରଶାସନ। ଅଭିଯାନର ବର୍ଷକ ପରେ ୧୦୩୨ଗାଁ ଏବଂ ସହରା‌ଞ୍ଚଳର ୧୪୦ ୱାର୍ଡ଼କୁ ଆଜି ଜିଲ୍ଲା ପ୍ରଶାସନ ବାଲ୍ୟ ବିବାହମୁକ୍ତ ଅ‌ଞ୍ଚଳ ଘୋଷଣା କରିଛି।
୨୦୨୦ରେ ଜିଲ୍ଲାର ୨୧୯ଟି ବାଲ୍ୟ ବିବାହକୁ ରୋକାଯାଇଛି। ବିଗତ ବର୍ଷ ଗୁଡ଼ିକରେ ଅର୍ଥାତ୍ ୨୦୧୭ରେ ୨୪ଟି, ୨୦୧୮ରେ ୨୨ଟି ଏବଂ ୨୦୧୯ରେ ୪୫ଟି ବାଲ୍ୟ ବିବାହ ରୋକାଯାଇଥିଲା। ‘ନିର୍ଭୟ କଢ଼ି’ କାର୍ଯ୍ୟକ୍ରମ ପରେ ପୂର୍ବ ବର୍ଷ ତୁଳନାରେ ଅଧିକ ବାଲ୍ୟ ବିବାହ ରୋକା ଯାଇପାରିଛି। ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେଙ୍କ ନେତୃତ୍ବରେ ଆରମ୍ଭ ହୋଇଥିଲା ଏହି ଅଭିନବ କାର୍ଯ୍ୟକ୍ରମ। ୨୦୧୯ ସେପ୍ଟମ୍ବର ମାସରେ ଏହି କାର୍ଯ୍ୟକ୍ରମ ହାତକୁ ନିଆଗଲା। ଗାଁଠୁ ସହର ଓ ଜିଲ୍ଲାସ୍ତରରରେ ଏକ ଟାସ୍କଫୋର୍ସ କମିଟି ଗଠନ କରାଗଲା। ଏହା ପରଠୁ ସମସ୍ତ କମିଟି ବ୍ୟ୍ୟାପକ ସଚେତନତା କାର୍ଯ୍ୟକ୍ରମ କରି ବାଲ୍ୟ ବିବାହ ରୋକିବା ଦିଗରେ କାର୍ଯ୍ୟ ଆରମ୍ଭ କରିଥିଲେ। ପ୍ରତି ମାସର ତୃତୀୟ ଶନିବାରକୁ ଜିଲ୍ଲାରେ ‘ନିର୍ଭୟ କଢ଼ି ଦିବସ ଭାବେ ପାଳନ କରାଯାଇ ଆସୁଛି। ବିବାହ ବେଳେ ବର ଓ କନ୍ୟାଙ୍କ ଆଧାର କାର୍ଡ଼ ଯାଞ୍ଚ‌୍ ବାଧ୍ୟତାମୂଳକ‌ କରାଗଲା। ସେଥିରେ ଉଭୟଙ୍କ ବୟସ ସହ ଅନ୍ୟ ତଥ୍ୟ ପଞ୍ଜୀକରଣ ହେଲା। ଜିଲ୍ଲା ସମାଜ ମଙ୍ଗଳ ଓ ଜିଲ୍ଲା ଶିଶୁ ସୁରକ୍ଷା ବିଭାଗ ମିଳିତ ଉଦ୍ୟମରେ ବାଲ୍ୟ ବିବାହ ରୋକିବା ଦିଗରେ ଜିଲ୍ଲାକୁ ସଫଳତା ମିଳିପାରିଛି।
LocalWire
ସିଡିପିଓମାନେ ବାଲ୍ୟ ବିବାହ ପ୍ରତିରୋଧ ଅଧିକାରୀ। ସେମାନଙ୍କ ପ୍ରତ୍ୟକ୍ଷ ତତ୍ବାବଧାନରେ ଗାଁ ଓ ସହରା‌ଞ୍ଚଳରେ ବାଲ୍ୟ ବିବାହ ରୋକିବା କାର୍ଯ୍ୟ ଚାଲିଛି। ଏହି ପ୍ରୟାସ ଜାରି ରହିବ ବୋଲି ବାଲ୍ୟ ବିବାହ ପ୍ରତିରୋଧ ଜିଲ୍ଲା ସଂଯୋଜକ ଦେବବ୍ରତ ମାହୁନ୍ତ ସୂଚନା ଦେଇଛନ୍ତି।
ଅନ୍ୟପକ୍ଷରେ ବାଲ୍ୟ ବିବାହମୁକ୍ତ ଘୋଷଣା ହୋଇଥିବା ଗାଁ ଗୁଡ଼ିକ ମଧ୍ୟରେ ଛତ୍ରପୁର ବ୍ଲକ୍‌ର ସର୍ବାଧିକ ୧୧୧ଟି ଗାଁ ରହିଛି। ଗଞ୍ଜାମ ବ୍ଲକ୍‌ର ୮୨, ଖଲ୍ଲିକୋଟ ୪୦, ବେଗୁନିଆପଡ଼ା ୫୩, ପୋଲସରା ୭୧, ପୁରୁଷୋତ୍ତମପୁର ୧୪, କବିସୂର୍ଯ୍ୟନଗର ୭୫, ହିଞ୍ଜିଳିକାଟୁ ୧୨, ରଙ୍ଗେଇଲୁଣ୍ତା ୭୦, କୁକୁଡ଼ାଖଣ୍ତି ୭୨, ଦିଗପହଣ୍ତି ୧୩, ସାନଖେମୁଣ୍ତି ୪୭, ଚିକିଟି ୧୬, ପାତ୍ରପୁର ୩୭, ଭଞ୍ଜନଗର ୫୦, ବେଲଗୁଣ୍ଠା ୨୦, ବୁଗୁଡ଼ା ୨୦, ଜଗନ୍ନାଥପ୍ରସାଦ ୩୫, ଆସିକା ୯, ଧରାକୋଟ ୨୭, ସୋରଡ଼ା ୭୫ ଓ ଶେରଗଡ ବ୍ଲକର ୮୩ଟି ଏହିପରି ସମୁଦାୟ ୧୦୩୨ ଗାଁ ସ୍ଥାନ ପାଇଛି। ସେହିପରି ବାଲ୍ୟ ବିବାହମୁକ୍ତ ଘୋଷଣା ହୋଇଥିବା ସହରା‌ଞ୍ଚଳର ୧୪୦ ୱାର୍ଡ଼ ମଧ୍ୟରେ କବିସୂର୍ଯ୍ୟନଗର ଏନ୍ଏସିର ସର୍ବାଧିକ ୨୦ ୱାର୍ଡ଼ ଥିବା ବେଳେ ରମ୍ଭା ଏନ୍ଏସିର ୧୩, ଗଞ୍ଜାମ ୧୧,  ସୋରଡ଼ା ୧୧, ଖଲ୍ଲିକୋଟ ୬, ପୋଲସରା ୧୭, ଗୋପାଳପୁର ୧୬, ଦିଗପହଣ୍ତି ୧, ଚିକିଟି ୨, ଭଞ୍ଜନଗର ୪, ବୁଗୁଡା ଓ ଆସିକା ୧୫, ପୁରୁଷୋତ୍ତମପୁର ୯, ହିଞ୍ଜିଳି ମ୍ୟୁନିସିପାଲଟି ୨, ବ୍ରହ୍ମପୁର ମହାନଗର ନିଗମର ୯ଟି ୱାର୍ଡ଼ ରହିଛି।
ସମ୍ବନ୍ଧିତ ଖବର