ଭାରତ ଦେଖାଇଲା ପରାକ୍ରମ : କାଲାମ୍ ଦ୍ୱୀପରୁ ‘ଶୌର୍ଯ୍ୟ’ର ସଫଳ ପରୀକ୍ଷା
ବାଲେଶ୍ୱର/ଚାନ୍ଦିପୁର/ଚାନ୍ଦବାଲି : ସୀମା ବିବାଦକୁ ନେଇ ଭାରତ-ଚୀନ୍ ମଧ୍ୟରେ ଉତ୍ତେଜନା ଲାଗି ରହିଥିବା ବେଳେ ଶନିବାର ଭାରତ ସ୍ବଦେଶୀ ଜ୍ଞାନକୌଶଳରେ ନିର୍ମିତ ଅତ୍ୟାଧୁନିକ ବାଲିଷ୍ଟିକ୍ ମିସାଇଲ୍ ‘କେ-୧୫ ଲ୍ୟାଣ୍ଡ ଭର୍ସନ୍ (ଶୌର୍ଯ୍ୟ)’ର ସଫଳ ପରୀକ୍ଷଣ କରିଛି। ବାଲେଶ୍ବର ଜିଲ୍ଲା ଚାନ୍ଦିପୁର ଡିଆର୍ଡିଓ ୟୁନିଟ୍ର କ୍ଷେପଣାସ୍ତ୍ର ପରୀକ୍ଷଣ କେନ୍ଦ୍ର ଅଧୀନରେ ଥିବା ଭଦ୍ରକ ଜିଲ୍ଲା ଧାମରାସ୍ଥିତ ଅବଦୁଲ କଲାମ୍ ଦ୍ବୀପର ୪ ନମ୍ବର ଉତ୍କ୍ଷେପଣ କେନ୍ଦ୍ରରୁ ଆଜି ମଧ୍ୟାହ୍ନ ୧୨ଟା ୧୦ ମିନିଟ୍ରେ କେ-୧୫ର ବ୍ୟାବହାରିକ ପରୀକ୍ଷଣ କରାଯାଇଥିଲା। ବୁଡ଼ାଜାହାଜରୁ ଉତ୍କ୍ଷେପଣ କରାଯାଉଥିବା ଏହି କ୍ଷେପଣାସ୍ତ୍ରକୁ ଆଜି ପ୍ରଥମ ଥର ପାଇଁ ସ୍ଥଳଭାଗରୁ ଉତ୍କ୍ଷେପଣ କରାଯାଇଛି। ପରୀକ୍ଷଣ ସଫଳ ହେବା ପରେ ରାଡାର ମାଧ୍ୟମରେ ମିଳିଥିବା ତଥ୍ୟକୁ ଡିଆର୍ଡିଓର ବୈଜ୍ଞାନିକମାନେ ବିଶ୍ଳେଷଣ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ପୂର୍ବରୁ କେ-୧୫ ବାଲିଷ୍ଟିକ୍ କ୍ଷେପଣାସ୍ତ୍ରକୁ ସମୁଦ୍ର ଭିତରେ ଭାରତୀୟ ନୌସେନାର ବୁଡ଼ାଜାହାଜ ଆଇଏନ୍ଏସ୍ ଅରିହନ୍ତରୁ ଉତ୍କ୍ଷେପଣ କରାଯାଉଥିଲା। ଏହାକୁ ମିଶାଇ ପଞ୍ଚମ ଥର ପାଇଁ କେ-୧୫ର ସଫଳ ବ୍ୟାବହାରିକ ପରୀକ୍ଷଣ କରାଯାଇଛି। ଏହାର ଓଜନ ୧୭ ଟନ୍ ଥିବାବେଳେ ଲମ୍ବ ୧୨ ମିଟର ଓ ମୋଟେଇ ୦.୮ ମିଟର। ଏଥିରେ ୨ ଟନ୍ ଓଜନର ଉଭୟ ପାରମ୍ପରିକ ଓ ଆଣବିକ ଯୁଦ୍ଧାସ୍ତ୍ର ବ୍ୟବହାର କରାଯାଇପାରିବ। ୩ ହଜାରରୁ ସାଢ଼େ ୩ ହଜାର କିଲୋମିଟର ଦୂରତା ପର୍ଯ୍ୟନ୍ତ ଲକ୍ଷ୍ୟଭେଦ କ୍ଷମତା ରଖିଛି ଏହି ଘାତକ କ୍ଷେପଣାସ୍ତ୍ର। ସ୍ଥଳଭାଗରୁ ୫୦ କିଲୋମିଟର ଉଚ୍ଚତାରେ ଘଣ୍ଟା ପ୍ରତି ୯ ହଜାର ୧୮୭ କିଲୋମିଟର ବେଗରେ ଏହି କ୍ଷେପଣାସ୍ତ୍ର ଗତି କରିପାରିବ। ୨୦୧୧ ମସିହାରୁ ଏହାକୁ ସ୍ଥଳସେନାରେ ସାମିଲ କରାଯାଇଛି।
ପ୍ରକାଶଥାଉକି, ନିକଟରେ ଡିଆର୍ଡିଓ ପକ୍ଷରୁ ଅତ୍ୟାଧୁନିକ ସୁପରସୋନିକ କ୍ରୁଜ୍ କ୍ଷେପଣାସ୍ତ୍ର ‘ବ୍ରହ୍ମୋସ’ର ସଫଳ ବ୍ୟାବହାରିକ ପରୀକ୍ଷଣ ପରେ ଏହାକୁ ଭାରତ-ଚୀନ ସୀମାନ୍ତ ଏଲ୍ଏସିରେ ମୁତୟନ କରାଯାଇଛି। ଏହି କ୍ଷେପଣାସ୍ତ୍ର ବଳରେ ଭାରତ ଜଳ, ସ୍ଥଳ ଓ ଆକାଶପଥରୁ ଶତ୍ରୁପକ୍ଷକୁ ଉଚିତ ଜବାବ ଦେଇପାରିବ ବୋଲି ପ୍ରତିରକ୍ଷା ବିଶେଷଜ୍ଞମାନେ ମତ ଦେଇଛନ୍ତି। ବୁଡ଼ାଜାହାଜରୁ ଆଣବିକ କ୍ଷେପଣାସ୍ତ୍ର ଉତ୍କ୍ଷେପଣ କରିବାରେ ଭାରତ ହେଉଛି ବିଶ୍ବର ପଞ୍ଚମ ରାଷ୍ଟ୍ର। ଏହା ପୂର୍ବରୁ ଆମେରିକା, ରୁଷିଆ, ଚୀନ୍ ଓ ଫ୍ରାନ୍ସ ଏହି ଜ୍ଞାନକୌଶଳ ହାସଲ କରିଛନ୍ତି।