ଭୁବନେଶ୍ୱର: ରାଜ୍ୟରେ ଥିବା ସ୍କୁଲଗୁଡ଼ିକ କେବେ ଖୋଲିବ? ଜୁନ୍‌ ୧୮, ୧୯ ନା ୨୦ ତାରିଖ। ଏହାକୁ ନେଇ ସାରା ରାଜ୍ୟରେ ଦ୍ବନ୍ଦ୍ବ‌ାତ୍ମକ ପରିସ୍ଥିତି ସୃଷ୍ଟି ହୋଇଛି। ରାଜ୍ୟ ସରକାର କିମ୍ବା ଗଣଶିକ୍ଷା ବିଭାଗ ଏପର୍ଯ୍ୟନ୍ତ ସ୍କୁଲ ଖୋଲିବା ନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି। ଯେତେବେଳେ କି ବିଭିନ୍ନ ବର୍ଗର ବିଦ୍ୟାଳୟଗୁଡ଼ିକ ସ୍କୁଲ ଭିନ୍ନ ଭିନ୍ନ ସମୟ ଧାର୍ଯ୍ୟ କରିଛନ୍ତି। ଅଧିକାଂଶ ଘରୋଇ ବିଦ୍ୟାଳୟରେ ଜୁନ୍‌ ୧୮ ତାରିଖଠାରୁ ଖୋଲିବାକୁ ବିଜ୍ଞପ୍ତି ଦେଇଛନ୍ତି। ରାଜ୍ୟ ସରକାରଙ୍କ ଶିକ୍ଷା କ୍ୟାଲେଣ୍ଡର ଅନୁଯାୟୀ ଜୁନ୍‌ ୧୯ରୁ ସ୍କୁଲ ଖୋଲିବ। ହେଲେ ଛାତ୍ରଛାତ୍ରୀ ଆସିବେ ନାହିଁ। ଶିକ୍ଷକ, ଶିକ୍ଷୟିତ୍ରୀ, ପାଚିକା ଓ ସହାୟକ ବିଦ୍ୟାଳୟ ଆସିବା ସହ କ୍ୟାମ୍ପସ ସଫେଇ କରିବେ। ୨୦ ତାରିଖଠାରୁ ପିଲାମାନେ ବିଦ୍ୟାଳୟ ଆସିବେ। ୨୦୨୫-୨୬ ଶିକ୍ଷାବର୍ଷ ଆରମ୍ଭରୁ ଗଣଶିକ୍ଷା ବିଭାଗ ପକ୍ଷରୁ ପ୍ରାଥମିକ ଓ ମାଧ୍ୟମିକ ବିଦ୍ୟାଳୟଗୁଡ଼ିକ ପାଇଁ ଜାରି କ୍ୟାଲେଣ୍ଡରରେ ଏନେଇ ସ୍ପଷ୍ଟ କରାଯାଇଥିଲା।

Advertisment

ଖରାଛୁଟି ଅନ୍ୟାଦେଶ କଟକଣା ହଟିନି
୧୮ରେ ଘରୋଇ, ୨୦ରେ ସରକାରୀ ସ୍କୁଲ ଖୋଲିବ
ଅଭିଭାବକଙ୍କ ଚିନ୍ତା ବଢ଼ାଇଲାଣି ଝାଡ଼ାବାନ୍ତି, କୋଭିଡ୍‌

ଅନ୍ୟପକ୍ଷରେ ରାଜ୍ୟ‌ରେ ପ୍ରଚଣ୍ଡ ଗ୍ରୀଷ୍ମ ପ୍ରବାହ ଲାଗିରହିବାରୁ ଏପ୍ରିଲ ୨୩ରୁ ସାରା ରାଜ୍ୟରେ ସ୍କୁଲ୍‌ ଛୁଟି ଘୋଷଣା ହୋଇଥିଲା। ଏହାପରେ ଗଣଶିକ୍ଷା ବିଭାଗ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଥିଲା ଯେ ପିଲାଙ୍କ ସ୍ବାସ୍ଥ୍ୟ ସୁରକ୍ଷା ଦୃଷ୍ଟିରୁ ଏପ୍ରିଲ ୨୩ରୁ ଖରା ଛୁଟି ଘୋଷଣା କରାଯାଇଛି। ଅଙ୍ଗନବାଡି ସମେତ ଶିଶୁବାଟିକାଠାରୁ ଆରମ୍ଭ କରି ଦ୍ବାଦଶ ଶ୍ରେଣୀ ପର୍ଯ୍ୟନ୍ତ, ରାଜ୍ୟର ସମସ୍ତ ସରକାରୀ ଓ ବେସରକାରୀ ଶିକ୍ଷାନୁଷ୍ଠାନ ବନ୍ଦ ରହିବ। ଉଭୟ ସରକାରୀ ଓ ବେସରକାରୀ କଲେଜ ପିଲାମାନଙ୍କ ପାଇଁ ରାଜ୍ୟ ସରକାର ଏପ୍ରିଲ ୨୩ରୁ ଅନ୍ୟାଦେଶ ପର୍ଯ୍ୟନ୍ତ ଛୁଟି ଘୋଷଣା କରିଛନ୍ତି। ତେବେ ଏହି ସମୟରେ ପୂର୍ବରୁ ନିର୍ଦ୍ଧାରିତ ପରୀକ୍ଷାଗୁଡ଼ିକ ଧାର୍ଯ୍ୟ ତାରିଖରେ ହେବ ଏବଂ ସଂପୃକ୍ତ ଅଧିକାରୀମାନେ ଏଥିପ୍ରତି ଯତ୍ନବାନ ହେବାକୁ ନିର୍ଦ୍ଦେଶ ଦିଆଯାଇଥିବା ବିଭାଗ ପକ୍ଷରୁ କୁହାଯାଇଥିଲା। ଇତିମଧ୍ୟରେ ଗ୍ରୀଷ୍ମ ଋତୁ ସରିବା ସହ ମୌସୁମୀ ଆଗମନ ହେଲାଣି। ହେଲେ ଅନ୍ୟାଦେଶ କେବେ ସରିବ ଏବଂ ସ୍କୁଲ କେବେ ଖୋଲିବ ତାହାକୁ ନେଇ ଅଭିଭାବକ ପ୍ରଶ୍ନ ଉଠାଇଛନ୍ତି। ରାଜ୍ୟ ସରକାର ଖରା ଛୁଟି ଘୋଷଣା ନେଇ ଯେଉଁଭଳି ବିଜ୍ଞପ୍ତି ଜାରି କରିଥିଲେ ସେଭଳି ଭାବେ ସ୍କୁଲ ଖୋଲିବାକୁ ସମସ୍ତ ବିଦ୍ୟାଳୟ ପାଇଁ ଗୋଟିଏ ଦିନ ଧାର୍ଯ୍ୟ ସହ ବିଜ୍ଞପ୍ତି ପ୍ରକାଶ କରିବାକୁ ଅଭିଭାବକ ଦାବି କରିଛନ୍ତି।

କେବଳ ସେତିକି ନୁହେଁ, ସରକାରୀ ଓ ସରକାରୀ ଅନୁଦାନପ୍ରାପ୍ତ ବିଦ୍ୟାଳୟଗୁଡ଼ିକରେ ମଧ୍ୟାହ୍ନଭୋଜନ ବଣ୍ଟନକୁ ନେଇ ମଧ୍ୟ ଦ୍ବନ୍ଦ୍ବ ସୃଷ୍ଟି ହୋଇଛି। ଜୁନ୍‌ ୧୮ରୁ ପିଲାଙ୍କୁ ମଧ୍ୟାହ୍ନଭୋଜନ ବଣ୍ଟନ କରାଯିବା ନେଇ ଗତ ୧୧ ତାରିଖରେ ପିଏମ୍‌ ପୋଷଣ ରାଜ୍ୟ ନୋଡାଲ୍‌ ଅଫିସର ଭବାନୀ ପ୍ରସାଦ ମିଶ୍ର ଚିଠି କରିଥିଲେ। ଏଭଳି ଚିଠିକୁ ନେଇ ଅଭିଭାବକ, ବିଦ୍ୟାଳୟ କର୍ତ୍ତୃପକ୍ଷ ଦ୍ବନ୍ଦ୍ବରେ ପଡ଼ିବା ପରେ ଆଜି ଗଣଶିକ୍ଷା ବିଭାଗ ପକ୍ଷରୁ ସ୍ପଷ୍ଟୀକରଣ ଦିଆଯାଇଛି। କୁହାଯାଇଛି ଯେ ଶିଶୁ ବାଟିକାଠାରୁ ଦଶମ ଶ୍ରେଣୀ ପର୍ଯ୍ୟନ୍ତ ସମସ୍ତ ଛାତ୍ରଛାତ୍ରୀମାନଙ୍କୁ ଆସନ୍ତା ଜୁନ୍ ୨୦ ତାରିଖରୁ ମଧ୍ୟାହ୍ନଭୋଜନ ପ୍ରଦାନ କରାଯିବ। ଗୋଟିଏ ପଟେ ସ୍କୁଲ ଖୋଲିବା ତାରିଖକୁ ନେଇ ଦ୍ବନ୍ଦ୍ବ ଲାଗିରହିଥିବା ବେଳେ ଅନ୍ୟପଟେ କୋଭିଡ୍‌ ଓ ଝାଡ଼ାବାନ୍ତି ବୃଦ୍ଧି ପାଉଥିବାରୁ ଅଭିଭାବକ ଓ ଛାତ୍ରଛାତ୍ରୀ ଚିନ୍ତାରେ। ଉପକୂଳବର୍ତ୍ତୀ ଜିଲ୍ଲାଗୁଡ଼ିକରେ ମୁଖ୍ୟତଃ ଝାଡ଼ାବାନ୍ତି ବ୍ୟାପିଥିବାରୁ ପିଲାଙ୍କ ଉପରେ ଏହାର ପ୍ରଭାବ ପଡ଼ିପାରେ। ସେହିପରି କୋଭିଡ୍‌ ସଂକ୍ରମଣ ବି ରାଜ୍ୟରେ ଲାଗିରହିଛି। ବିଦ୍ୟାଳୟ ଖୋଲିବାକୁ ଯାଉଥିଲେ ମଧ୍ୟ ରାଜ୍ୟ ସରକାର କିମ୍ବା ଗଣଶିକ୍ଷା ବିଭାଗ ପକ୍ଷରୁ ଛାତ୍ରଛାତ୍ରୀଙ୍କ ପାଇଁ କୌଣସି ନିର୍ଦ୍ଦେଶାବଳୀ ଜାରି କରାଯାଇ ନଥିବାରୁ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।