ନିୟମଗିରିରେ ହସୁଛି ସୂର୍ଯ୍ୟମୁଖୀ, ୫୦ ହେକ୍ଟର ଜମିରେ ଚାଷ କରି ସ୍ବାବଲମ୍ବୀ ହୋଇଛନ୍ତି ୫୦୦ ଚାଷୀ
ବଦଳିଗଲା ଆଦିବାସୀ ଚାଷୀ ଲକ୍ଷ୍ମୀ ଓ ଜିତେନ୍ଦ୍ରଙ୍କ ଜୀବନଶୈଳୀ, ହେକ୍ଟର ପିଛା ଖର୍ଚ୍ଚ୨୦ ହଜାର, ଲାଭ ୫୦ରୁ ୬୦ ହଜାର
ରାୟଗଡ଼ା: ବିଷମକଟକ ବ୍ଲକ୍ ଭାତଗୁଡ଼ାର ଚାଷୀ ଜିତେନ୍ଦ୍ର ନିଶିକା। ୫ବର୍ଷ ତଳେ କରଜରେ ବୁଡ଼ିଥିଲେ। ରୋଜଗାରର କୌଣସି ପନ୍ଥା ନଥିବାରୁ କରଜ ଶୁଝିବା ପାଇଁ ଦାଦନ ଖଟିବାକୁ ଅନ୍ୟ ରାଜ୍ୟକୁ ବାହାରିଥିଲେ। କିନ୍ତୁ ପଡ଼ୋଶୀ ଗାଁର ଚାଷୀଙ୍କ ସୂର୍ଯ୍ୟମୁଖୀ କ୍ଷେତକୁ ଦେଖି ଜିତେନ୍ଦ୍ର ଚାଷ ପାଇଁ ମନ ବଳାଇଥିଲେ। ସହଯୋଗର ହାତ ବଢ଼ାଇଥିଲେ ପତ୍ନୀ ଲକ୍ଷ୍ମୀ ନିଶିକା। ୨ରୁ ୩ବର୍ଷର ଅକ୍ଳାନ୍ତ ପରିଶ୍ରମ ପରେ ୨୫ ଡିସିମିଲି ଜମିରେ ସୂର୍ଯ୍ୟମୁଖୀ ଚାଷ କରି ଆସୁଥିବା ଜିତେନ୍ଦ୍ର ବାର୍ଷିକ ୩ କୁଇଣ୍ଟାଲ ସୂର୍ଯ୍ୟମୁଖୀ ବିହନ ଉତ୍ପାଦନ କରି ଲାଭବାନ୍ ହେବା ସହ କରଜ ଶୁଝିବାରେ ସକ୍ଷମ ହୋଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ଜିତେନ୍ଦ୍ର ଓ ଲକ୍ଷ୍ମୀଙ୍କ ଭଳି ନିୟମଗିରି ପାଦଦେଶରେ ୫ ଶହରୁ ଊର୍ଦ୍ଧ୍ବ ଚାଷୀ ସୂର୍ଯ୍ୟମୁଖୀ ଚାଷକୁ ଆପଣାଇ ସ୍ବାବଲମ୍ବୀ ହେବାରେ ଲାଗିଛନ୍ତି। ବିଷମକଟକ ବ୍ଲକ୍ ଡାଲିଆକୁଜି, ଚାଞ୍ଚରାଗୁଡ଼ା ଏବଂ ମୁନିଗୁଡ଼ା ବ୍ଲକ୍ ମୁନିଖୋଲ ଓ ଶିବପଦର ପଞ୍ଚାୟତର ୨୩ଟି ଗ୍ରାମର ୫୦ ହେକ୍ଟର ଜମିରେ ସୂର୍ଯ୍ୟମୁଖୀ ଚାଷ କରୁଛନ୍ତି ଆଦିବାସୀ ଓ ଡଙ୍ଗରିଆ ସଂପ୍ରଦାୟର ଚାଷୀ। ପୋଡ଼ୁ ଚାଷ ବଦଳରେ ସୂର୍ଯ୍ୟମୁଖୀ ଅର୍ଥକାରୀ ଫସଲ ହୋଇଥିବାରୁ ସମୟକ୍ରମେ ଅଧିକାରୁ ଅଧିକ ଚାଷୀ ସାମିଲ୍ ହୋଇ ନିଜ ଆର୍ଥିକ ସ୍ଥିତିକୁ ସ୍ବଚ୍ଛଳ କରିବାରେ ଲାଗିଛନ୍ତି। ହେକ୍ଟର ପିଛା ୨୦ କୁଇଣ୍ଟାଲ୍ ସୂର୍ଯ୍ୟମୁଖୀ ବିହନ ଉତ୍ପାଦନ ହେଉଥିବା ବେଳେ ବିହନର ବଜାର ଦର କୁଇଣ୍ଟାଲ୍ ପିଛା ୪ ହଜାର ଟଙ୍କା ରହିଛି। ୨୦ କୁଇଣ୍ଟାଲ ବିହନ ବିକ୍ରି ବାବଦକୁ ଚାଷୀ ୮୦ ହଜାର ଟଙ୍କା ପାଉଛନ୍ତି। ସାର, କୀଟନାଶକ ଓ ଶ୍ରମ ବାବଦରେ ୧୫ରୁ ୨୦ ହଜାର ଟଙ୍କା ଖର୍ଚ୍ଚ ହେଉଛି। ଫଳରେ ପ୍ରତି ହେକ୍ଟର ପିଛା ପାଖାପାଖି ୫୦ରୁ ୬୦ ହଜାର ଟଙ୍କା ଚାଷୀ ଲାଭ ଉଠାଉଛନ୍ତି।
କିଛି ଚାଷୀ ବିହନରୁ ତେଲ ପ୍ରସ୍ତୁତ କରି ମଧ୍ୟ ବିକ୍ରି କରୁଛନ୍ତି। ସୂର୍ଯ୍ୟମୁଖୀ ବିହନରୁ ପ୍ରସ୍ତୁତ ସନଫ୍ଲାୱାର୍ ତେଲ ଖାଇବା ଉପଯୋଗୀ ସହ ତେଲରେ ଅଧିକ ପ୍ରୋଟିନ୍ ଥିବାରୁ ସାରା ଭାରତରେ ଏହି ତେଲର ଚାହିଦା ରହିଛି। ଯେଉଁଥି ପାଇଁ ଫସଲ ଅମଳ ପୂର୍ବରୁ ଆନ୍ଧ୍ର ସମେତ ଓଡ଼ିଶାର ବିଭିନ୍ନ ଜିଲ୍ଲାରୁ ବ୍ୟବସାୟୀ ଆସି ବିହନକୁ କିଣି ନେଉଛନ୍ତି। ରବି ଓ ଖରିଫ୍ ଋତୁରେ ଏହି ଚାଷ ହେଉଥିବାରୁ ଦୁଇ ଋତୁରେ ଏହି ଚାଷ ଉପରେ ନିର୍ଭରଶୀଳ ଚାଷୀ ବେଶ୍ ଲାଭବାନ୍ ହେଉଛନ୍ତି।
ବିହନ ବୁଣିବାର ୧୦୫ ଦିନ ମଧ୍ୟରେ ଫସଲ ଅମଳ ହେଉଥିବାରୁ ଏହି ଚାଷରେ ନିୟୋଜିତ ଚାଷୀଙ୍କ ଦୈନିକ ଆୟ ୫୦୦ରୁ ୬୦୦ ଟଙ୍କା ବୋଲି ଅନୁମାନ କରିଛି ଚାଟିକଣା ସ୍ଥିତ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା ଅଧୀନରେ ପରିଚାଳିତ ଓଡ଼ିଶା ଆଦିମ ଜନଜାତି ସଶକ୍ତୀକରଣ ଓ ଜୀବିକା ଉନ୍ନତୀକରଣ କାର୍ଯ୍ୟକ୍ରମ (ଓପିଲିପି) ବିଭାଗ। ଚାଷୀଙ୍କୁ ଆର୍ଥିକ ସ୍ଥିତିକୁ ସୁଦୃଢ଼ କରିବା ପାଇଁ ଡଙ୍ଗରିଆ ଗାଁ ସକଟା, ଗୁଞ୍ଜାପାଇ, ଆଦିବାସୀ ଗାଁ ପୁସୁଗୁଡ଼ା, ପରିଚ୍ଛାଗୁଡ଼ା, ସନ୍ନ୍ୟାସୀଗୁଡ଼ା, ସାର୍ଥିଲି, କାଳିପଙ୍ଗା, ଭାଲିଆପଦର, ଝିଲିଗୁଡ଼ା, ପାଜିବାଲି, ବଡ଼ଦହିଖାଲ, ଭାତଗୁଡ଼ାରେ ସୂର୍ଯ୍ୟମୁଖୀ ଚାଷକୁ ପ୍ରୋତ୍ସାହନ ଦେଇ ଆସୁଛି (ଓପିଲିପି)। ଚାଷୀଙ୍କୁ ହେକ୍ଟର ପିଛା ୪ ହଜାର ଟଙ୍କାର ବିହନ ମାଗଣାରେ ପ୍ରଦାନ କରିବା ସହିତ ଚାଷ ପ୍ରଣାଳୀ ଓ ଉତ୍ପାଦନ ବଢ଼ାଇବାକୁ ବାର୍ଷିକ ୨ରୁ ୩ ଥର ତାଲିମ୍ ପ୍ରଦାନ କରୁଛି ବିଭାଗ। ଯାହା ଡଙ୍ଗରିଆ ଓ ଆଦିବାସୀ ଚାଷୀଙ୍କ ଜୀବନଶୈଳୀକୁ ବଦଳାଇ ଦେବା ସହିତ ଆର୍ଥିକ ସ୍ଥିତିକୁ ମଜଭୁତ୍ କରିଛି।