ଦୁର୍ଘଟଣାରେ ସୁପରଭାଇଜରଙ୍କ ମୃତ୍ୟୁ

ପଦ୍ମପୁର : କେନ୍ଦୁଝର ସଦର ଥାନା ୨୦ ନମ୍ବର ଜାତୀୟ ରାଜପଥର ପଦ୍ମପୁରସ୍ଥିତ ଓଡ଼ିଶା ଗ୍ରାମ୍ୟ ବ୍ୟାଙ୍କ ସମ୍ମୁଖ ଓଭରବ୍ରିଜ ନିକଟରେ ଆଜି ସକାଳେ ଦୁର୍ଘଟଣାରେ ପରିବହନ ସଂସ୍ଥାର ଜଣେ ସୁପରଭାଇଜରଙ୍କ ମୃତ୍ୟୁ ଘଟିଛି। ମୃତକ ଜଣଙ୍କ ହେଲେ ଝାଡ଼ଖଣ୍ତର ପ୍ରେମନାଥ ସିଂ (୫୪)। ପ୍ରାପ୍ତ ସୂଚନା ଅନୁସାରେ, ସକାଳେ ଏକ ଟିପର୍‌ (ଓଆର-୦୯-କେ-୭୫୬୪) ପଦ୍ମପୁର ପଟୁ ଝୁମ୍ପୁରା ଅଭିମୁଖେ ଯାଉଥିଲା। ପ୍ରେମନାଥ ଏକ ବାଇକ୍‌ (ଓଆର-୦୯-ଜି-୯୮୩୭)ରେ କେନ୍ଦୁଝର ପରିବହନ କାର୍ଯ୍ୟାଳୟକୁ ଯାଉଥିଲେ।

ଓଭରବ୍ରିଜ ନିକଟରେ ଟିପର୍‌ ଚାଳକ ନିୟନ୍ତ୍ରଣ ହରାଇ ରୋଡ ଡିଭାଇଡର ଡେଇଁ ଆରପଟ ରାସ୍ତାକୁ ଗାଡ଼ି ନେଇ ପଳାଇ ଆସିଥିଲେ। କେନ୍ଦୁଝର ଅଭିମୁଖେ ବାଇକ୍‌ରେ ଯାଉଥିବା ପ୍ରେମନାଥଙ୍କୁ ଧକ୍କା ଦେଇ ଘୋଷାରି ନେବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଖବର ପାଇ କେନ୍ଦୁଝର ସଦର ଥାନା ପୁଲିସ ପହଞ୍ଚି ଦୁର୍ଘଟଣାଗ୍ରସ୍ତ ଗାଡ଼ି ଓ ମୃତଦେହ ଜବତ କରି ତଦନ୍ତ ଆରମ୍ଭ କରିଛି। ଶବ ବ୍ୟବଚ୍ଛେଦ ପାଇଁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଯାଇଛି। ଚାଳକ ଖସିଯିବାକୁ ଉଦ୍ୟମ କରୁଥିବାବେଳେ ଲୋକେ ତାଙ୍କୁ କାବୁ କରି ପୁଲିସ ଜିମା ଦେଇଛନ୍ତି।