ଆଇନ ଶୃଙ୍ଖଳା ସଂପର୍କରେ ରାଜ୍ୟ ସରକାରଙ୍କ ପକ୍ଷରୁ ପ୍ରକାଶ ପାଇଲା ଶ୍ୱେତପତ୍ର
ଭୁବନେଶ୍ୱର: ରାଜ୍ୟ ସରକାରଙ୍କ ପକ୍ଷରୁ ୨୦୨୨ ମସିହା ପାଇଁ ଆଇନ ଶୃଙ୍ଖଳା ଉପରେ ଶ୍ୱେତପତ୍ର ପ୍ରକାଶ ପାଇଛି | ଗତବର୍ଷ ସମୁଦାୟ ୧.୭୮ ଲକ୍ଷ ଅପରାଧିକ ମାମଲା ରୁଜୁ ହୋଇଥିବାବେଳେ ଏଥିରୁ ୩୧୮୪ଟି ଦୁଷ୍କର୍ମ, ୧୩୭୯ଟି ହତ୍ୟା, ୬୨୬ଟି ଡକାୟତି, ୫୩୫୨ଟି ପ୍ରତାରଣା, ୨୯୯୮ଟି ଚୋରି ସହ ୧୧୬୬୩ଟି ଦୁର୍ଘଟଣା ମାମଲା ରୁଜୁ ହୋଇଛି | ଶ୍ୱେତପତ୍ର ମୁତାବକ ୨୦୨୨ ମସିହାରେ ରାଜ୍ୟର ଆଇନଶୃଙ୍ଖଳା ପରିସ୍ଥିତି ମୋଟାମୋଟି ଭାବେ ଶାନ୍ତିପୂର୍ଣ୍ଣ ଥିଲା | ୨୦୨୨ ମସିହାରେ ମୋଟା ୨୭ଟି ମାଓବାଦୀ ଘଟଣା ଘଟିଥିବାବେଳେ ୭ ଜଣ ମାଓବାଦୀଙ୍କ ମୃତ୍ୟୁ ସହ ୧୨ ଜଣ ମାଓବାଦୀଙ୍କୁ ଗିରଫ କରାଯାଇଥିଲା | ୧୨ଟି ଗୁଳିବିନିମୟ ଘଟଣାରେ ୮ ଜଣ ସାଧାରଣ ବ୍ୟକ୍ତିଙ୍କର ମୃତ୍ୟୁ ହୋଇଥିବାବେଳେ ୩ ଜଣ ସୁରକ୍ଷାକର୍ମୀ ସହିଦ ହୋଇଥିଲେ |
Sambad is now on WhatsApp
Join and get latest news updates delivered to you via WhatsApp
୩୧୮୪ଟି ଦୁଷ୍କର୍ମ ମାମଲା ମଧ୍ୟରୁ ୩୧୩୫ଟି ସତ୍ୟ ମାମଲା ହୋଇଥିବାବେଳେ ୧୩୭୯ଟି ହତ୍ୟା ଘଟଣା ମଧ୍ୟରୁ ୧୩୦୧ଟି ମାମଲା ସତ୍ୟ ବୋଲି ଶ୍ୱେତପତ୍ରରେ କୁହାଯାଇଛି | ସେହିପରି ୬୨୬ଟି ଡକାୟତି ଘଟଣା ମଧ୍ୟରୁ ୬୧୪ଟି ମାମଲା ସତ୍ୟ ହୋଇଥିବାବେଳେ ୫୩୫୨ଟି ପ୍ରତାରଣା ମାମଲା ମଧ୍ୟରୁ ୫୦୪୬ଟି ମାମଲା ସତ୍ୟ ବୋଲି କୁହାଯାଇଛି | ୨୦୨୨ ମସିହାରେ ରୁଜୁ ହୋଇଥିବା ୨୨୪୮ଟି ଦଙ୍ଗା ମାମଲା ମଧ୍ୟରୁ ୨୧୭୨ଟି ସତ୍ୟ ମାମଲା ହୋଇଥିବାବେଳେ ବର୍ଷ ଶେଷ ସୁଦ୍ଧା ୧୩୬୧ଟି ମାମଲାରେ ଦୋଷାରୋପ ଫର୍ଦ୍ଦ ଦାଖଲ କରାଯାଇଛି |