ମୁଁ ତଳ ଘରେ ହିଁ ରହିବି, ଉପର ଘରେ ରହିବି ନାହିଁ: ତପସ୍ୱିନୀ
ବ୍ରହ୍ମପୁର: ସରୁନି ସୁମିତ-ତପସ୍ୱିନୀ ବିବାଦ । କୋର୍ଟଙ୍କ ରାୟ ପରେ ବି ସମୁତିଙ୍କ ଘରକୁ ଯାଇ ନାହାନ୍ତି ତପସ୍ୱିନୀ । ରହିବା ଘରକୁ ନେଇ ବିବାଦ ଦେଖାଦେଇଛି । ଦୁଇ ମହଲା ଘର ମଧ୍ୟରୁ ତଳ ଘରେ ରହିବାକୁ ଚାହୁଁଛନ୍ତି ତପସ୍ୱିନୀ । ହେଲେ ସୁମିତଙ୍କ ଘର ଲୋକେ ଉପର ଘରେ ରହିବାକୁ କହୁଛନ୍ତି । ଉପରେ ଘରେ କେହି ରହୁଥିବାରୁ ଘର ସଫା ହୋଇନାହିଁ । ତେଣୁ ଉପର ଘରେ ରହିବାକୁ ରାଜି ନାହାନ୍ତି ତପସ୍ୱିନୀ । ତେଣୁ ଗତକାଲି ରାତିରେ ସେ ପୂର୍ବ ପରି ଘର ଗ୍ୟାରେଜରେ ରହିଥିଲେ । ଅନ୍ୟପଟେ ଜିଲ୍ଲା ଜଜଙ୍କ ରାୟକୁ ଚ୍ୟାଲେଂଜ କରି ହାଇକୋର୍ଟରେ ଅପିଲ କରାଯିବ ବୋଲି ସୁମିତଙ୍କ ଓକିଲ କହିଛନ୍ତି । ଗତକାଲି ତପସ୍ୱିନୀଙ୍କ ସପକ୍ଷରେ ରାୟ ଦେଇଥିଲେ କୋର୍ଟ ।
Sambad is now on WhatsApp
Join and get latest news updates delivered to you via WhatsApp
ତପସ୍ୱିନୀ ଶାଶୁ ଘରେ ରହିବା ସହ ତାଙ୍କ ଦୈନନ୍ଦିନ ଖର୍ଚ୍ଚ ପାଇଁ ଡାକ୍ତର ସୁମିତ ପ୍ରତ୍ୟେକ ମାସ ୧୦ ତାରିଖ ସୁଦ୍ଧା ୧୭ ହଜାର ଟଙ୍କା ପ୍ରଦାନ କରିବାକୁ କହିଛନ୍ତି କୋର୍ଟ । ଗତକାଲି ନ୍ୟାୟ ପାଇଁ ଦୀର୍ଘ ୪୪ଦିନର ଲଢେଇ ପରେ ଶେଷରେ ବୋହୂ ତପସ୍ବିନୀ ଦାଶଙ୍କ ସପକ୍ଷରେ ରାୟ ଦେଇଥିଲେ କୋର୍ଟ । ସେ ଶ୍ବଶୁର ଘରେ ରହିବେ ବୋଲି କୋର୍ଟ ନିର୍ଦ୍ଦେଶ ଦେଇଥିଲେ । ତପସ୍ବିନୀଙ୍କ ଦ୍ବାରା ରୁଜୁ କରାଯାଇଥିବା ଏକ ଅପିଲ୍ର ଶୁଣାଣି କରି ଗଞ୍ଜାମ ଜିଲ୍ଲା ଦୌରାଜଜ୍ ଆନନ୍ଦ ଚନ୍ଦ୍ର ବେହେରା ଏହି ଗୁରୁତ୍ବପୂର୍ଣ୍ଣ ରାୟ ଦେଇଥିଲେ । ଆଇନ ଅନୁସାରେ ତପସ୍ବିନୀ ହେଉଛନ୍ତି ଡା.ସୁମିତ ସାହୁଙ୍କ ପତ୍ନୀ । ଏଣୁ ତପସ୍ବିନୀ ଶ୍ବଶୁରଙ୍କ ଘରେ ରହି ପାରିବେ ବୋଲି ଜିଲ୍ଲାଜଜ୍ ତାଙ୍କ ଚୂଡ଼ାନ୍ତ ରାୟରେ ଉଲ୍ଲେଖ କରିଥିବା ତାଙ୍କର ଓକିଲ ଦୀପକ ପଟ୍ଟନାୟକ କହିଛନ୍ତି ।
ଓକିଲ ଶ୍ରୀ ପଟ୍ଟନାୟକଙ୍କ ସୂଚନା ଅନୁସାରେ, ତପସ୍ବିନୀଙ୍କ ଦୈନନ୍ଦିନ ଖର୍ଚ୍ଚ ପାଇଁ ଡା. ସୁମିତ ୧୦ତାରିଖ ସୁଦ୍ଧା ୧୭ହଜାର ଟଙ୍କା ପ୍ରଦାନ କରିବେ । ଟଙ୍କା ଗ୍ରହଣ ବାବଦରେ ତପସ୍ବିନୀ ଏକ ରସିଦ୍ ଦେବେ ବୋଲି କୋର୍ଟ ନିର୍ଦ୍ଦେଶ ଦେଇଥିଲେ । ଏହାସହିତ ଉଭୟ ପକ୍ଷର ପରିବାର ଲୋକେ ପରସ୍ପରଙ୍କୁ କୌଣସି ପ୍ରକାର ଆକ୍ଷେପ କରିବେ ନାହିଁ ବୋଲି କୋର୍ଟ ନିର୍ଦ୍ଦେଶ ଦେଇଥିବା ସେ କହିଥିଲେ । ବ୍ରହ୍ମପୁର ଏସ୍ଡିଜେଏମ୍ଙ୍କ କୋର୍ଟରେ ତପସ୍ବିନୀଙ୍କ ତରଫରୁ ରୁଜୁ ହୋଇଥିବା ମୂଳ ପିଟିସନ୍ର ଶୁଣାଣି ସରିବା ପର୍ଯ୍ୟନ୍ତ ଜିଲ୍ଲାଜଜ୍ଙ୍କ ଏହି ନିର୍ଦ୍ଦେଶ ବଳବତ୍ତର ରହିବ ବୋଲି ରାୟରେ ଦର୍ଶାଯାଇଛି ।