କୁଳିଅଣା: ୧୦ ବର୍ଷର ଜଣେ ନାବାଳିକା ସୁନିତା (ଛଦ୍ମନାମ) ଗଣଦୁଷ୍କର୍ମର ଶିକାର ହୋଇଛନ୍ତି। ପୀଡ଼ିତା ସୁନିତା ଜନ୍ମରୁ ମା’ ଛେଉଣ୍ଡ। ସେ ଏବେ ୭ ମାସର ଅନ୍ତଃସତ୍ତ୍ୱା। ଏ ଘଟଣା ଘଟିଛି ମୟୂରଭଞ୍ଜ ଜିଲ୍ଲା କୁଳିଅଣା ଥାନା ଅନ୍ତର୍ଗତ କେନ୍ଦୁଆଡିହା ଗାଁରେ। ଏନେଇ ପୀଡ଼ିତାଙ୍କ ପରିବାର ଲୋକେ କୁଳିଅଣା ଥାନାରେ ଅଭିଯୋଗ କରିବା ପରେ ପୁଲିସ ପ୍ରାଥମିକ ତଦନ୍ତ ଆରମ୍ଭ କରିଛି। ଘଟଣାରେ ସଂପୃକ୍ତି ଅଭିଯୋଗରେ ପୁଲିସ ୬ ଜଣଙ୍କୁ ଗିରଫ କରିଛି।

Advertisment

ସୁନିତାଙ୍କ ବାପା ଜଣେ ଶ୍ରମିକ। ସେ ଅନେକ ସମୟରେ ଘରେ ନଥା’ନ୍ତି। ଏହାର ସୁଯୋଗ ନେଇ କେତେକ ଅସାମାଜିକ ଯୁବକ ନାବାଳିକାଙ୍କୁ ପ୍ରଲୋଭିତ କରି ନିଜ କବ୍‌ଜାକୁ ନେଇଥିଲେ। ଶେଷରେ ଶାରୀରିକ ସମ୍ପର୍କ କାରଣରୁ ସେ ଏବେ ୭ ମାସର ଅନ୍ତଃସତ୍ତ୍ୱା। ଏହା ଜଣାପଡ଼ିବା ପରେ ଗାଁରେ ବୈଠକ ବସିଥିଲା। ଗାଁର ୬ ଜଣ ଏଭଳି କୁତ୍ସିତ କାମ କରିଥିବା ସୁନିତା କହିଥିଲେ। ହେଲେ ସଂପୃକ୍ତ ଯୁବକମାନେ ଏହାକୁ ଅସ୍ୱୀକାର କରିବାରୁ ପୀଡ଼ିତାଙ୍କ ବାପା ଥାନାରେ ଜଣାଇଥିଲେ। ଏହାପରେ କୁଳିଅଣା ଥାନା ପୁଲିସ ଥାନା କେସ୍‌ ନମ୍ବର ୧୦୪/୧୭ରେ ମାମଲା ରୁଜୁ କରି ସେହି ଗାଁର ଅଭିଯୁକ୍ତ ଜଗନ୍ନାଥ ନାଏକ, ଗଜେନ୍ଦ୍ର ନାଏକ, ଅଶ୍ୱିନୀ ପ୍ରଧାନ, ଗୌଡ଼ରୁମା ଗାଁର ଜଗନ୍ନାଥ ବିନ୍ଧାଣି ଓ ସନିଆ ନାଏକ ଓ ତୁଳସୀବଣି ଗାଁର କଚ୍ଛ ନାଏକଙ୍କୁ ଥାନାକୁ ଉଠାଇନେଇଛି। ସଦର ଏସ୍‌ଡିପିଓ ଅଭିମନ୍ୟୁ ନାୟକ ଏହି ମାମଲାର ତଦନ୍ତ କରୁଛନ୍ତି।