ଭୁବନେଶ୍ୱର : ସଂସଦରେ ତିନ୍ ତଲାକ୍ ବିଲ୍କୁ ବିଜୁ ଜନତା ଦଳ ସମର୍ଥନ କରିଥିବାରୁ କଂଗ୍ରେସ ପକ୍ଷରୁ ରାଜ୍ୟ ବିଧାନସଭାରେ ସମାଲୋଚନା କରାଯାଇଛି । ଆଜି ଶୂନ୍ୟକାଳରେ ଏହି ପ୍ରସଙ୍ଗ ଉତ୍ଥାପନ କରି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଲେ ଯେ, ଗତକାଲି ସଂସଦରେ ତିନ୍ ତଲାକ୍ ବିଲ୍ ବିଜୁ ଜନତା ଦଳର ସମର୍ଥନ ଯୋଗୁଁ ଗୃହିତ ହୋଇ ପାରିଛି । ବିଜେଡ଼ି ସଂସଦୀୟ ଦଳ ପକ୍ଷରୁ ଭୋଟ ବେଳେ ସବୁ ଦଳୀୟ ସାଂସଦ ଉପସ୍ଥିତ ରହିବାକୁ ହ୍ଵିପ୍ ଜାରି କରାଯାଇଥିଲା । ନିର୍ବାଚନ ବେଳେ ଏବଂ ତା’ ପୂର୍ବରୁ ଉଭୟ ବିଜେଡ଼ି ଓ ବିଜେପି ପରସ୍ପରକୁ ତୀବ୍ର ଆକ୍ରମଣ କରିଥିଲେ । ବିଜେଡ଼ି ସଭାପତି ନବୀନ ପଟ୍ଟନାୟକ କଂଗ୍ରେସ ଓ ବିଜେପି ସାଙ୍ଗେ ସମଦୂରତ୍ୱ ରକ୍ଷା କରାଯାଇଛି ବୋଲି କହୁଥିଲେ । କିନ୍ତୁ ପ୍ରକୃତରେ ବିଜେଡ଼ି କେନ୍ଦ୍ରରେ ବିଜେପି ନେତୃତ୍ୱାଧୀନ ମୋଦୀ ସରକାରକୁ ସବୁ ବିଲ୍ରେ ସମର୍ଥନ କରୁଛନ୍ତି । ତେଣୁ ନବୀନ ସ୍ପଷ୍ଟ କରନ୍ତୁ କେନ୍ଦ୍ରରେ କ’ଣ ବିଜେଡ଼ି-ବିଜେପି ମିଳିତ ସରକାର ଚାଲିଛି କି?
Sambad is now on WhatsApp
Join and get latest news updates delivered to you via WhatsApp
ବିଜେଡ଼ି ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଥିଲେ ଯେ, ବିଜେଡ଼ି ଉଭୟ କଂଗ୍ରେସ ଓ ବିଜେପି ସହିତ ସମଦୂରତା ରକ୍ଷା କରୁଛି । ବରଂ ପାଟକୁରା ଉପନିର୍ବାଚନରେ କଂଗ୍ରେସର ଭୋଟ ବିଜେପିକୁ ଯାଇଛି । ବିଜେଡ଼ି ବିଧାୟକ ଅମର ପ୍ରସାଦ ଶତପଥୀ ଦର୍ଶାଇଥିଲେ ଯେ, ତାଙ୍କ ଦଳ ମହିଳା ସଶକ୍ତିକରଣକୁ ପ୍ରାଥମିକତା ଦେଇ ଆସିଛି । ସେଥିପାଇଁ ତିନ୍ ତଲାକ୍ ବିଲ୍କୁ ସମର୍ଥନ କରିଛି ।