ପୋଲସରା: ସଂଗରୋଧ କେନ୍ଦ୍ରରେ ମଦ ଯୋଗାଣକୁ ନେଇ ଆଜି ରାସ୍ତାରୋକ ହୋଇଛି । ଗଂଜାମ ଜିଲ୍ଲାର ପୋଲସରା ଥାନା ଅନ୍ତର୍ଗତ କଳମ୍ବ ନୋଡାଲ ପ୍ରାଥମିକ ବିଦ୍ୟାଳୟରେ ମଦ ଯୋଗାଣ ହେଉଥିଲା । ଏହାକୁ ଦେଖି ଗ୍ରାମବାସୀ ବିରୋଧ କରିଥିଲେ । କଳମ୍ବ ପଂଚାୟତର ସରପଞ୍ଚ ପ୍ରଶାନ୍ତ କୁମାର ପ୍ରଧାନଙ୍କୁ ମଦ ବିକାଳିମାନେ ଧକ୍କା ମାରିଥିଲେ । ସେମାନେ ଶତ୍ରୁଘ୍ନ ସାହୁ ନାମରେ ଜଣେ ବ୍ୟକ୍ତିଙ୍କୁ ମଧ୍ୟ ମାଡ଼ ମାରିଥିଲେ । ଶେଷରେ ମଦ ବିକାଳିମାନେ ସରପଞ୍ଚ ଓ ଶତ୍ରୁଘ୍ନଙ୍କୁ ଧମକ ଦେଇ ସେଠାରୁ ଫେରାର ହୋଇଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହି ଘଟଣା ପରେ ଗ୍ରାମବାସୀ ସଂଗଠିତ ହୋଇ ଆଜି ଦିନ ୨ଟାରୁ ଅଢ଼େଇଟା ମଧ୍ୟରେ ନୋଡାଲ ସ୍କୁଲ ନିକଟ ଦେଇ ଯାଇଥିବା ମୁଖ୍ୟ (କଳମ୍ବ ଠାରୁ କବିସୂର୍ଯ୍ୟନଗର) ରାସ୍ତାରେ କାଠଗଣ୍ଡି ପକାଇ ରାସ୍ତା ଅବରୋଧ କରିଥିଲେ । ଗ୍ରାମବାସୀ ଟାୟାର ଜଳାଇ ମଦ ବିକାଳିମାନଙ୍କର ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ସହ ଗିରଫ ଦାବି କରିଛନ୍ତି । ରିପୋର୍ଟ ଲେଖାଯିବା ବେଳକୁ ନୋଡାଲ ଅଧିକାରୀ, ତହସିଲଦାର ଅଥବା ଥାନା ଅଧିକାରୀ ପହଞ୍ଚି ନାହାନ୍ତି ।
ସଂଗରୋଧ କେନ୍ଦ୍ର ବାହାର ଫେରନ୍ତାଙ୍କ ପାଇଁ ରୋଷେଇ କରୁଥିବା ସ୍ୱେଚ୍ଛାସେବୀମାନଙ୍କର କହିବା ଅନୁସାରେ, ଘଟଣାର ସମାଧାନ ନ ହେଲେ ଆମେ ରାତ୍ରୀ ଭୋଜନ ପ୍ରସ୍ତୁତ କରିବୁ ନାହିଁ । ସୂଚନାଯୋଗ୍ୟ, କଳମ୍ବରେ ଦୀର୍ଘ ୩୦ ବର୍ଷ ଧରି ମଦ ବିକିବା ସଂପୂର୍ଣ୍ଣ ନିଷେଧ ରହିଛି । କିନ୍ତୁ କରୋନା ଭାଇରସ ସଂକଟ ସମୟରେ ଏଠାରେ ମଦ ବିକ୍ରି କରାଯିବାକୁ ସାଧାରଣରେ ଗ୍ରହଣ ହୋଇପାରି ନାହିଁ ।