ପ୍ରଶାସନ ଛଡ଼ାଇ ନେଲା ବିସ୍ଥାପିତଙ୍କ ମତଦାନ ଅଧିକାର!

ଠାକୁରମୁଣ୍ଡା: ଏକାଧିକ ପରିବାରକୁ ପ୍ରଶାସନ ବିସ୍ଥାପନ କରାଗଲା। ସେମାନଙ୍କୁ ସବୁ ପ୍ରକାର ସୁବିଧା ସୁଯୋଗ ଯୋଗାଇ ଦିଆଗଲା। ହେଲେ ନାଗରିକ ଭାବେ ଶତାଧିକ ଲୋକଙ୍କ ଭୋଟ୍‌ଦାନ ଅଧିକାର କଥା ସମସ୍ତେ ଭୁଲିଗଲେ। ନୂଆ ପଞ୍ଚାୟତରେ ବିସ୍ଥାପିତଙ୍କ ନାମ କିପରି ଭୋଟର ତାଲିକାଭୁକ୍ତ କରାଯିବ, ସେ ନେଇ କେହି ଚିନ୍ତା କଲେନି। ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ୍‌ ସାଲେଇବେଡ଼ା ପଞ୍ଚାୟତରେ।

ଶିମିଳିପାଳ ବ୍ୟାଘ୍ର ଆଭୟାରଣ୍ୟ ଅନ୍ତର୍ଗତ ଖେଜୁରୀ ଗ୍ରାମରେ ଖଡ଼ିଆ ସମ୍ପ୍ରଦାୟର ଲୋକମାନେ ବସବାସ କରୁଥିଲେ। ବ୍ୟାଘ୍ର ସଂରକ୍ଷଣ ପ୍ରକଳ୍ପର ବିକାଶ ପାଇଁ ସେମାନଙ୍କୁ ୨୦୨୦ ମସିହା ଜାନୁଆରି ୨୪ ତାରିଖରେ ସେଠାରୁ ବସ୍ଥାପିତ କରି ଠାକୁରମୁଣ୍ଡା ବ୍ଲକ୍‌ ସାଲେଇବେଡ଼ା ପଞ୍ଚାୟତକୁ ଅଣାଗଲା। ୧୧୪ଟି ପରିବାର ମଧ୍ୟରୁ ୧୦୭ଟି ପରିବାରକୁ ସାଲେଇବେଡ଼ାରେ ସରକାରୀ ବାସଗୃହ ଯୋଗାଇ ଦିଆଗଲା। ଏହା ସହିତ ଅନ୍ୟ ‌ମୌଳିକ ସୁବିଧା ମଧ୍ୟ ମିଳିଲା। ପରିବାରର ସବୁ ସଦସ୍ୟଙ୍କ ପାଇଁ ଆଧାରକାର୍ଡ ବ୍ୟବସ୍ଥା ସହ ବ୍ୟାଙ୍କରେ ପାସ୍‌ବୁକ୍‌ ଖୋଲାଗଲା। ସେହିପରି ପଟ୍ଟା ଏବଂ ଲେବର କାର୍ଡ ମଧ୍ୟ ପ୍ରଦାନ କରିଥିଲା ପ୍ରଶାସନ। ହେଲେ ସାଲେଇବେଡ଼ା ପଞ୍ଚାୟତର ଅଧିବାସୀ ଭାବେ ସେମାନଙ୍କ ନାମ ନୂତନ ଭୋଟର ତାଲିକାରେ ସାମିଲ କରିବାକୁ ଭୁଲିଗଲା। ଫଳରେ ୨୫୦ରୁ ଅଧିକ ଲୋକ ଚଳିତ ପଞ୍ଚାୟତ ନିର୍ବାଚନରେ ଭୋଟ୍‌ଦାନରୁ ବଞ୍ଚିତ ହୋଇଛନ୍ତି।

ଘଟଣା ବାବଦରେ ବିଡିଓ ଶ୍ୟାମସୁନ୍ଦର ଟୁଡୁଙ୍କୁ ପଚାରିବାରୁ ସେ ବିଏଲ୍‌ଓ ଭୋଟର ତାଲିକା ସଂଶୋଧନ ପାଇଁ କ୍ୟାମ୍ପ୍‌ କରିଥିଲେ ହେଲେ ଜଣେ ବି ବିସ୍ଥାପିତ ଉକ୍ତ କ୍ୟାମ୍ପ୍‌କୁ ଆସିଲେ ନାହିଁ ବୋଲି କହିଛନ୍ତି। ଅନ୍ୟପଟେ ଭୋଟର ତାଲିକା ସଂଶୋଧନ ନେଇ କେହି କିଛି ଜଣାଇ ନ ଥିବା ବିସ୍ଥାପିତ ରାମଚନ୍ଦ୍ର ସୋରେନ ଅଭି‌ଯୋଗ କରିଛନ୍ତି। ବିସ୍ଥାପିତମାନେ ଘଟଣା ବାବଦରେ ନିର୍ବାଚନ କମିଶନ ଓ ଉଚ୍ଚ ଅଧିକାରୀଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଛନ୍ତି।