ଭୁବନେଶ୍ବର: ବନ୍ୟା ସମୟରେ ଅତ୍ୟାବଶ୍ୟକ ସେବା ଯୋଗାଣ ଓ ବିପନ୍ନଙ୍କୁ ଉଦ୍ଧାର କାର୍ଯ୍ୟରେ ମୁଖ୍ୟ ଭୂମିକା ଗ୍ରହଣ କରିଆସୁଥିବା ଡଙ୍ଗା ନାବିକ ଓ ଖଲାସି ଆଜି ପର୍ଯ୍ୟନ୍ତ ସମସ୍ତ ଜିଲ୍ଲାରେ ନିଯୁକ୍ତି ହୋଇ ପାରିନାହିଁ। ରାଜ୍ୟରେ ସ୍ଥାୟୀ ନାବିକ ଓ ଖଲାସି ଖୁବ୍ କମ୍ ଥିବା ବେଳେ ଅସ୍ଥାୟୀ କର୍ମଚାରୀ ଏହାକୁ ସମ୍ଭାଳି ଆସିଛନ୍ତି। ବନ୍ୟା ଦ୍ବାରା ନିୟମିତ ପ୍ରଭାବିତ ହେଉଥିବା ୧୯ ଜିଲ୍ଲା ମଧ୍ୟରୁ କେବଳ ୫ଟି ଜିଲ୍ଲାରେ ଏହି ଅସ୍ଥାୟୀ ନାବିକ ଓ ଖଲାସି ନିଯୁକ୍ତି ହୋଇଛି। ଏଥିରେ ମଧ୍ୟ ଦୁର୍ନୀତି ଅଭିଯୋଗ ହୋଇଛି। ନୌକା ଚାଳନା ଜାଣିନଥିବା ଅନଭିଜ୍ଞ ବ୍ୟକ୍ତିମାନଙ୍କୁ ନିଯୁକ୍ତି ପ୍ରଦାନ କରାଯାଇଛି। ଏପରିକି ଯାଜପୁରର କୋରେଇରେ ବସ୍ ମାଲିକ ଓ ଅନ୍ୟ ବ୍ଲକ୍ଗୁଡ଼ିକରେ ବିଭିନ୍ନ କାମରେ ନିୟୋଜିତ ଲୋକଙ୍କୁ ଅସ୍ଥାୟୀ ନାବିକ, ଖଲାସି ଭାବେ ନିଯୁକ୍ତି ମିଳିଛି। ଯାହାର ତଦନ୍ତ ପାଇଁ ଏସଆରସି ନିର୍ଦ୍ଦେଶ ଦେଇଛନ୍ତି।
ମୌସୁମୀ ବର୍ଷା ସମୟରେ ନଦୀଗୁଡ଼ିକରେ ବନ୍ୟା ଆଶଙ୍କା କରି ପ୍ରତିବର୍ଷ ଜୁନ୍ରୁ ନଭେମ୍ବର ୬ମାସ ପର୍ଯ୍ୟନ୍ତ ଅସ୍ଥାୟୀ ନାବିକ ଓ ଖଲାସି ନିଯୁକ୍ତି ପ୍ରଦାନ କରଯାଏ। ଚଳିତ ବର୍ଷ ଏସଆରସି ୧୯ ଜଣ ଜିଲ୍ଲାପାଳଙ୍କୁ ଚିଠି ଲେଖି ଅସ୍ଥାୟୀ ଭାବେ ୨୭୭ ଜଣ ନାବିକ ଓ ୨୪୩ ଜଣ ଖଲାସି ନିଯୁକ୍ତ କରିବା ପାଇଁ ଗତ ମାସ ପ୍ରଥମ ସପ୍ତାହରେ ନିର୍ଦ୍ଦେଶ ଦେଇଥିଲେ। ଏହାମଧ୍ୟରେ କେବଳ ବାଲେଶ୍ବର, ଯାଜପୁର, ଜଗତସିଂହପୁର, ନୟାଗଡ଼ ଓ ଭଦ୍ରକ ଜିଲ୍ଲାରେ ଅସ୍ଥାୟୀ ନାବିକ, ଖଲାସି ନିଯୁକ୍ତି ହୋଇଥିବା ବେଳେ ଅନ୍ୟ ବନ୍ୟା ପ୍ରଭାବିତ ଅଞ୍ଚଳରେ ଏ ଯାଏଁ ପ୍ରକ୍ରିୟା ଆଦୌ ଆରମ୍ଭ ହୋଇ ନଥିବା ଜଣାପଡ଼ିଛି।
Advertisment

Sambad is now on WhatsApp
Join and get latest news updates delivered to you via WhatsApp