ନକ୍ସଲ ଗୁଳିରୁ ବର୍ତ୍ତିଲେ ପୂର୍ବତନ ବିଧାୟକ, ଅଙ୍ଗରକ୍ଷୀ ନିହତ
ଜଣେ ଅଙ୍ଗରକ୍ଷୀ ନିଖୋଜ, ଜଣେ ଗୁରୁତର, କୋମ୍ବିଂ ଜୋରଦାର
ରାଉରକେଲା: ଓଡ଼ିଶା-ଝାଡ଼ଖଣ୍ଡ ସୀମାନ୍ତରେ ଗୋଟିଏ ପରେ ଗୋଟିଏ ହିଂସାକାଣ୍ଡ ଭିଆଇ ଚାଲିଛନ୍ତି ନକ୍ସଲ। ମଙ୍ଗଳବାର ମନୋହରପୁର ପୂର୍ବତନ ବିଧାୟକ ତଥା ବିଜେପିର ବରିଷ୍ଠ ନେତା ଗୁରୁଚରଣ ନାୟକଙ୍କୁ ନକ୍ସଲମାନେ ଗୁଳିମାଡ଼ କରିଛନ୍ତି। ଗୁରୁଚରଣ ନିଶ୍ଚିତ ମୃତ୍ୟୁମୁଖରୁ ଅଳ୍ପକେ ବର୍ତ୍ତି ଯାଇଛନ୍ତି। ଗୁରୁଚରଣଙ୍କ ୩ ଅଙ୍ଗରକ୍ଷୀଙ୍କ ମଧ୍ୟରୁ ଜଣଙ୍କର ଗଳାକାଟି ନିର୍ମମ ଭାବେ ହତ୍ୟା କରିଛନ୍ତି। ମୃତକ ହେଲେ ଶଙ୍କର ନାୟକ। ଠାକୁର ହେମ୍ବ୍ରମ୍ ଘଟଣାସ୍ଥଳରୁ ନିଖୋଜ ହୋଇଯାଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ତୃତୀୟ ଅଙ୍ଗରକ୍ଷୀ ଗୁରୁତର ଆହତ ହୋଇଛନ୍ତି। ତାଙ୍କର ଏକେ-୪୭ ବନ୍ଧୁକ ଲୁଟି ନେଇଛନ୍ତି। ପୂର୍ବତନ ବିଧାୟକ ସୋନୁଆ ଥାନାରେ ପହଞ୍ଚି ଥାନା ଅଧିକାରୀଙ୍କୁ ଘଟଣା ସଂକ୍ରାନ୍ତରେ ଜଣାଇଛନ୍ତି। ତାଙ୍କର ସୂଚନା ଆଧାରରେ ପୁଲିସଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୂର୍ବତନ ବିଧାୟକ ଗୁରୁଚରଣ ବିଶ୍ରା ଠାରୁ ମାତ୍ର ୩୦ କି.ମି. ଦୂର ଗୋଏଲକେରା ଝିଲରୁଆଁରେ ଚାଲିଥିବା ଫୁଟବଲ ପ୍ରତିଯୋଗିତାରେ ମୁଖ୍ୟ ଅତିଥି ଭାବେ ଯୋଗଦେବାକୁ ଯାଇଥିଲେ। ଫୁଟବଲ୍ ପ୍ରତିଯୋଗିତାରେ ସାମିଲ ହୋଇ ତିନି ଅଙ୍ଗରକ୍ଷୀଙ୍କ ସହ ଘରକୁ ଫେରୁଥିଲେ।
କିଛି ବାଟ ଆସିବା ପରେ ଅସ୍ତ୍ରଶସ୍ତ୍ର ସହ ନକ୍ସଲମାନେ ଗୁରୁଚରଣ ଓ ତାଙ୍କ ତିନି ଅଙ୍ଗରକ୍ଷୀଙ୍କୁ ଘେରାବନ୍ଦୀ କରି ଗୁଳି ମାଡ଼ କରିଥିଲେ। ଜଣେ ଅଙ୍ଗରକ୍ଷୀଙ୍କ ଏକେ-୪୭ ବନ୍ଧୁକ ଲୁଟି ନେଇଥିଲେ। ନିଖୋଜ ଅଙ୍ଗରକ୍ଷୀ ଠାକୁର ହେମ୍ବ୍ରମଙ୍କୁ ହତ୍ୟା କରିଥିବା ଅନୁମାନ କରାଯାଉଛି। ତଥାପି ଏ ସଂକ୍ରାନ୍ତରେ ପୁଲିସ କିଛି କହିବାକୁ ମନାକରି ଦେଇଛି। ଗତ ୨୦୧୨ରେ ନକ୍ସଲମାନେ ପୂର୍ବତନ ବିଧାୟକ ଗୁରୁଚରଣଙ୍କୁ ହତ୍ୟା ଉଦ୍ୟମ କରିଥିଲେ। ମାତ୍ର ସେ ବର୍ତ୍ତି ଯାଇଥିଲେ। ଘଟଣା ଜଣାପଡ଼ିବା ପରେ ସ୍ଥାନୀୟ ଅଞ୍ଚଳରେ କମ୍ବିଂ ଅପରେସନ୍କୁ ଜୋରଦାର କରାଯାଇଛି।