ରତ୍ନଗିରି : ବରୀ ଶିକ୍ଷାମଣ୍ତଳ ଅନ୍ତର୍ଗତ ରତ୍ନଗିରି ଉଚ୍ଚବିଦ୍ୟାଳୟର ପ୍ରଧାନଶିକ୍ଷକ ବିଦ୍ୟାଳୟରେ ମଦ୍ୟପାନ କରିବା ସହ ଶୋଇରହିଥିବା ଭିଡିଓ ଏବେ ଭାଇରାଲ୍ ହେବାରେ ଲାଗିଛି। ଯାହାକୁ ନେଇ ଛାତ୍ରଛତ୍ରୀମାନେ ବିଦ୍ୟାଳୟ ଫାଟକରେ ତାଲା ପକାଇ ପ୍ରଧାନଶିକ୍ଷକ ପ୍ରକାଶ ମଲିକଙ୍କୁ ଅନ୍ୟତ୍ର ବଦଳି କରିବାକୁ ଦାବି କରିଥିଲେ।

Advertisment

ପ୍ରଧାନଶିକ୍ଷକ ଉପରିସ୍ଥ ଅଧିକାରୀଙ୍କ ବିନା ଅନୁମତିରେ ବିଦ୍ୟାଳୟରେ ଅନୁପସ୍ଥିତ ରହୁଥିଲେ। ବିଦ୍ୟାଳୟକୁ ମଦ୍ୟପାନ କରି ଆସୁଥିଲେ। ଏ ନେଇ  ଯାଜପୁର ଜିଲ୍ଲା ଶିକ୍ଷାଧିକାରୀଙ୍କ ନିକଟରେ ଅଭିଭାବକ ଓ ଛାତ୍ରଛାତ୍ରୀ ଲିଖିତ ଅଭିଯୋଗ କରିଥିଲେ। ଯାଜପୁର ଜିଲ୍ଲା ଶିକ୍ଷାଧିକାରୀ ଏହାର ତଦନ୍ତ ପାଇଁ ଏଡିଇଓ ରାଜେଶ ସ୍ବାଇଁ, ବ୍ଲକ୍ ଶିକ୍ଷାଧିକାରୀ ସୁଦର୍ଶନ ମଲିକଙ୍କୁ ବିଦ୍ୟାଳୟକୁ ପଠାଇଥିଲେ। ଦୁଇ ଅଧିକାରୀ  ଗତ ମାର୍ଚ୍ଚ ୧୩ ତାରିଖରେ ସେମାନେ ତଦନ୍ତ କରିଥିଲେ। ତଦନ୍ତକୁ ୬ମାସ ବିତିଯାଇଥିଲେ ମଧ୍ୟ ପ୍ରଧାନଶିକ୍ଷକଙ୍କ ଉପରେ  କୌଣସି କାର୍ଯ୍ୟାନୁଷ୍ଠାନ ହୋଇନଥିଲା।

ଗତ ଜୁଲାଇ ମାସରେ ପ୍ରଧାନଶିକ୍ଷକ ମାତାଲ୍ ଅବସ୍ଥାରେ ଏକ ମଦକମ୍ପାନି ପେଟିରେ ଶୋଇରହିଥିବାର ଭିଡିଓ ଭାଇରାଲ୍ ହୋଇଥିଲା। ସେହିପରି ତିନିଦିନ ତଳେ ସ୍କୁଲ୍ ଚାଲୁରହିଥିବା ବେଳେ ମାତାଲ୍ ଅବସ୍ଥାରେ ଶୋଇରହିଥିବା ବେଳେ ଜଣେ ଅଭିଭାବକ ତାଙ୍କୁ ଉଠାଇବା ସହ ମଦ୍ୟପାନ କରି ସ୍କୁଲ୍ ନଆସିବାକୁ ତାଗିଦ୍‌ କରୁଥିବା ଭିଡିଓ ଭାଇରାଲ୍ ହୋଇଥିଲା। ଏହାକୁ ନେଇ ଛାତ୍ରଛାତ୍ରୀମାନେ ବିଦ୍ୟାଳୟ ଫାଟକରେ ତାଲାପକାଇ ସ୍ଲୋଗାନ ଦେବା ସହ ପ୍ରଧାନଶିକ୍ଷକଙ୍କୁ ଅନ୍ୟତ୍ର ବଦଳି କରିବା ପାଇଁ ଦାବି କରିଛନ୍ତି। ଅଭିଯୋଗ ପାଇ ସିଆର୍‌ସିସି ତାରାକାନ୍ତ ମଲିକ ଘଟଣାସ୍ଥଳରେ ପହଞ୍ଚି ବୁଝାଇବାକୁ ଚେଷ୍ଟା କରିଥିଲେ। ଏନେଇ ପ୍ରଧାନଶିକ୍ଷକ ପ୍ରକାଶ ମଲିକଙ୍କ ପ୍ରତିକ୍ରିୟା ମିଳିପାରିନି।