ବିଧାନସଭାରେ ଉଠିଲା ୪ ଫୁଟ ମୂର୍ତ୍ତି ପ୍ରସଙ୍ଗ: ନିଷ୍ପତ୍ତିର ପୁନର୍ବିଚାର କରିବା ପାଇଁ ବାଚସ୍ପତିଙ୍କ ନିର୍ଦ୍ଦେଶ
ଭୁବନେଶ୍ବର: କଟକ ସମେତ ରାଜ୍ୟରେ ଦୁର୍ଗାପୂଜାରେ ୪ ଫୁଟ ଉଚ୍ଚତାର ମା’ ଦୁର୍ଗାଙ୍କ ମୂର୍ତ୍ତି ଓ ପରଦା ଆଢ଼ୁଆଳରେ ପୂଜା ପାଇଁ କରାଯାଇଥିବା ନିୟମକୁ ନେଇ ବିଧାନସଭାରେ ଉଦ୍ବେଗ ପ୍ରକାଶ ପାଇଛି। ପ୍ରଶ୍ନକାଳ ପରେ କଂଗ୍ରେସ ବିଧାୟକମାନେ ପୂଜା କଟକଣା ହଟାଇବା ଦାବିରେ ଗୃହରେ ହୋହଲ୍ଲା କରିଥିଲେ। ଫଳରେ ବାଚସ୍ପତି ଗୃହକୁ ୧୦ ମିନିଟ୍ ମୁଲତବୀ ରଖିଥିଲେ। ଏହା ପରେ କଂଗ୍ରେସ ସଭ୍ୟ ମହମ୍ମଦ ମୋକିମ୍ ଏହି ପ୍ରସଙ୍ଗ ଉଠାଇ କହିଥିଲେ, କଟକ ସହର ହଜାର ବର୍ଷର ସହର। ଏହାର ପରମ୍ପରା, ଭାଇଚାରା ନିଆରା। ଏଠାରେ ଲୋକଙ୍କ ଧାର୍ମିକ ଭାବନାକୁ ସରକାର ଆଘାତ ଦେଇଛନ୍ତି। କରୋନା ପାଇଁ ୪ ଫୁଟର ମୂର୍ତ୍ତି ଓ ପରଦା ଆଢ଼ୁଆଳରେ ପୂଜା କରିବା ପାଇଁ ନିର୍ଦ୍ଦେଶ ଦିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ଏହାକୁ ଲୋକମାନେ ବିରୋଧ କରୁଛନ୍ତି। କୋଭିଡ୍ ଗାଇଡ୍ଲାଇନ୍ ଅନୁସାରେ ପୂଜାର୍ଚ୍ଚନା ହେଉ। କିନ୍ତୁ ମୂର୍ତ୍ତି ଉଚ୍ଚତା ଓ ପରଦା ପକାଇବା ପାଇଁ ଥିବା କଟକଣାକୁ ହଟାଇ ଦିଆଯାଉ। ସାରା ଓଡ଼ିଶା ପାଇଁ ଏହି କଟକଣାକୁ ହଟାଇ ଦିଆଯାଉ। କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ମଧ୍ୟ ଏଥିରେ ଏକମତ ହୋଇ କହିଥିଲେ, ସରକାର କରୋନା ପାଇଁ କଟକଣା ଜାରି କରିଛନ୍ତି ସତ। କିନ୍ତୁ ଲୋକଙ୍କର ଭାବାବେଗକୁ ସରକାର ନିଶ୍ଚିତ ବିଚାରକୁ ନେବା ଉଚିତ। ଲୋକଙ୍କ ଜୀବନକୁ ସୁରକ୍ଷା ଦେବା ମଧ୍ୟ ସମ ପରିମାଣରେ ଗୁରୁତ୍ବପୂର୍ଣ୍ଣ। ତେଣୁ ସରକାର ତୁରନ୍ତ ଏ ଦିଗରେ ବିଚାର କରି ପଦକ୍ଷେପ ନିଅନ୍ତୁ। କଂଗ୍ରେସର ବରିଷ୍ଠ ସଭ୍ୟ ସୁରେଶ ରାଉତରାୟ ମଧ୍ୟ ଏହାକୁ ସମର୍ଥନ କରିଥିଲେ। ଗୃହର ଉଦ୍ବେଗକୁ ଲକ୍ଷ୍ୟ କରି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର କହିଥିଲେ, କରୋନା ପାଇଁ ସରକାର ପୂଜାରେ କଟକଣା ଲଗାଇବାକୁ ନିଷ୍ପତ୍ତି ନେଇଛନ୍ତି। ତେବେ ଲୋକଙ୍କ ଦାବି ଓ ବିଧାୟକଙ୍କ ଉଦ୍ବେଗକୁ ନଜରରେ ରଖି ସରକାର ତାଙ୍କ ନିଷ୍ପତ୍ତି ଉପରେ ଆଉ ଥରେ ବିଚାର କରିବାକୁ ବାଚସ୍ପତି ନିର୍ଦ୍ଦେଶ ଦେଇଥିଲେ।