ହାତଗୋଡ଼ ବନ୍ଧା ଅବସ୍ଥାରେ ନାବାଳିକା ଉଦ୍ଧାର 

ଗାଇସିଲାଟ୍‌: ସୋମବାର ଅପରାହ୍ଣରୁ ନିଖୋଜ ଥିବା ଜଣେ ନାବାଳିକାକୁ ହାତଗୋଡ଼ ବନ୍ଧା ଏବଂ ଅଚେତ୍ ଅବସ୍ଥାରେ ଗାଇସିଲାଟ ପୁଲିସ୍‌ ଉଦ୍ଧାର କରିଛି। ନାବାଳିକାଙ୍କୁ ଗାଇସିଲାଟ ନିକଟସ୍ଥ ମଇଧନୁମୁଣ୍ଡା ଗାଁ ନିକଟରେ ଅଚେତ ଅବସ୍ଥାରେ ପଡ଼ିଥିବା ଦେଖିବାକୁ ମିଳିଥିଲା। ତାଙ୍କୁ ପ୍ରଥମେ ଗାଇସିଲାଟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ ବଲାଂଗୀର ମେଡିକାଲ୍‌କୁ ଚିକିତ୍ସା ପାଇଁ ପଠାଯାଇଛି।

ଗାଇସିଲାଟ୍‌ ଥାନା ଅଂଚଳର ଏହି ନାବାଳିକା ନିଖୋଜ ଥିବା ପରିବାର ଲୋକେ ସୋମବାର ସନ୍ଧ୍ୟାରେ ଥାନାରେ ଅଭିଯୋଗ କରିଥିଲେ। ଏ ନେଇ ପୁଲିସ୍‌ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଏହି ଘଟଣାରେ ପୁଲିସ୍‌ ଅପହରଣ ସନ୍ଦେହ କରି ପାଞ୍ଚ ଜଣକୁ ଅଟକ ରଖି ପଚରାଉଚରା ଜାରି ରଖିଛି। ଘଟଣାଟି ସ୍ଥାନୀୟ ଅଂଚଳରେ ଚାଞ୍ଚଲ୍ୟ ଖେଳାଇ ଦେଇଛି।