ଘରେ ପଶି ମହିଳାଙ୍କୁ ଦୁଷ୍କର୍ମ ଅଭିଯୋଗରେ ବୃଦ୍ଧ ଗିରଫ

ରାଉରକେଲା: ସ୍ବାମୀ ରାସନ ସାମଗ୍ରୀ କିଣିବାକୁ ବଜାରକୁ ଯାଇଥିଲେ। ଏତିକିବେଳେ ତାଙ୍କ ପତ୍ନୀ(୪୭) ଘରେ ଏକୁଟିଆ ଥିଲେ। ଏହାର ସୁଯୋଗ ନେଇ ଘର ଭିତରେ ପଶି ଜଣେ ବୃଦ୍ଧ(୬୫) ବଳପୂର୍ବକ ଦୁଷ୍କର୍ମ କରିଥିଲା। ଏନେଇ ଏତଲା ହେବାପରେ ବ୍ରାହ୍ମଣୀତରଙ୍ଗ ଥାନା ଅନ୍ତର୍ଗତ ଏକ ଗାଁରୁ ଅଭିଯୁକ୍ତ ଅର୍ଜୁନ ଏକ୍କାଙ୍କୁ ଗିରଫକରି କୋର୍ଟଚାଲାଣ କରାଯାଇଛି।

ଗତ ଗୁରୁବାର ଦିନର ଘଟଣା। ରାତି ପ୍ରାୟ ୮ଟା ହେବ। ପୀଡ଼ିତାଙ୍କ ଘର ପାଖରେ ଅଭିଯୁକ୍ତ ରହୁଛନ୍ତି। ଅଭିଯୁକ୍ତ କୌଣସି ବାହାନାକରି ପୀଡ଼ିତାଙ୍କ ଘରକୁ ଯାଇଥିଲେ। ସେତେବେଳେ ମହିଳାଙ୍କ ସ୍ବାମୀ ବଜାରକୁ ଯାଇଥିବା ଅଭିଯୁକ୍ତ ଜାଣିବାକୁ ପାଇଥିଲା। ଏହାର ସୁଯୋଗ ନେଇ ଅଭିଯୁକ୍ତ ଦୁଷ୍କର୍ମ କରିବାସହ ଘଟଣା ପ୍ରଘଟ ନ କରିବାକୁ କୁଆଡ଼େ ଧମକଚମକ ଦେଇଥିଲା। ତେବେ ପୀଡ଼ିତା ଭୟଭୀତ ନ ହୋଇ ଘଟଣା ବିଷୟରେ ସ୍ବାମୀଙ୍କୁ ସବିଶେଷ ଜଣାଇଥିଲେ। ଉକ୍ତ ଦିନ ରାତିରେ ହିଁ ବ୍ରାହ୍ମଣୀତରଙ୍ଗ ଥାନାରେ ଏତଲା ହୋଇଥିଲା। ପୁଲିସ ଛାନ୍‌ଭିନ ଆରମ୍ଭ କରିଥିଲା। ତେବେ ଘଟଣାର ୫ ଦିନ ପରେ ଆଜି ଅଭିଯୁକ୍ତକୁ ଗିରଫ କରିବାରେ ସଫଳ ହୋଇଛି।