ବିଶୋଇ: ରାସ୍ତାକଡ଼ରେ ଠିଆ ହୋଇଥିବା ବେଳେ ୪ ଜଣଙ୍କୁ ଖଣ୍ଡେ ବାଟ ଘୋଷାଡ଼ି ନେଲା ଟ୍ରକ୍। ଗାଡ଼ି ତଳେ ଚାପିହୋଇ ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ଘଟିଥିବା ବେଳେ ଜଣେ ଜୀବନ ସହ ସଂଗ୍ରାମ କରୁଛନ୍ତି। ମୟୂରଭଞ୍ଜ ଜିଲ୍ଲା ବିଶୋଇ ଥାନା ନୂଆଗାଁ ଛକଠାରେ ଘଟିଛି ଏହି ମର୍ମନ୍ତୁଦ ସଡ଼କ ଦୁର୍ଘଟଣା। ମୃତକମାନେ ହେଲେ; ବାଙ୍ଗରିପୋଷି ଥାନା ପଳାଶବଣି ଗ୍ରାମର ସୁକୁରା ମାହାଲି (୫୦), କଦମଡ଼ିହି ଗ୍ରାମର ସାଲଖାନ ହାଁସଦା (୪୧) ଓ ବେଢ଼ାକୁଦର ଗ୍ରାମର ସୁଶାନ୍ତ ମହାନ୍ତ (୪୫)। ଗତକାଲି ରାତି ପ୍ରାୟ ୧୨ଟା ସମୟରେ ୭ ଜଣ ଗୋରୁ ବେପାରୀ ଅଙ୍ଗାରପଦା ହାଟରୁ ଗୋରୁ ନେଇ ସାରସକଣା ଅଞ୍ଚଳକୁ ଫେରୁଥିବା ବେଳେ ୪୯ ନମ୍ବର ଜାତୀୟ ରାଜପଥର ନୂଆଗାଁ ଛକଠାରେ ରାତି ପାଟ୍ରୋଲିଂ ଦାୟିତ୍ବରେ ନିୟୋଜିତ ଥିବା ୨ ଜଣ ପୁଲିସ କର୍ମଚାରୀ ଉକ୍ତ ଗୋରୁ ବେପାରୀଙ୍କୁ ରାସ୍ତାକଡ଼ରେ ଅଟକାଇ ପଚରାଉଚରା କରୁଥିଲେ।
Sambad is now on WhatsApp
Join and get latest news updates delivered to you via WhatsApp
ଏହି ସମୟରେ କୋଲକାତା ଅଭିମୁଖେ ଯାଉଥିବା ଏକ କେମିକାଲ୍ ପାଉଡର୍ ବୋଝେଇ ଟ୍ରକ୍ ଦ୍ରୁତଗତିରେ ସେମାନଙ୍କ ଆଡ଼କୁ ମାଡ଼ି ଆସିଥିଲା। ୩ ଜଣ ରାସ୍ତା ଆରପଟକୁ ଧାଇଁ ରକ୍ଷାପାଇ ଯାଇଥିବା ବେଳେ ଅନ୍ୟ ୪ ଜଣଙ୍କୁ କିଛି ବାଟ ଘୋଷାଡ଼ି ନେଇ ଟ୍ରକ୍ଟି ଭାରସାମ୍ୟ ହରାଇ ଓଲଟି ପଡିଥିଲା। ଘଟଣାସ୍ଥଳରେ ୩ ଜଣ ପ୍ରାଣ ହରାଇଥିଲେ। ଝାରପୋଖରିଆ ଥାନା ସିଲିଫଡ଼ି ଗ୍ରାମର ଦୁର୍ଗାଚରଣ ନାଏକ (୫୦)ଙ୍କୁ ବିଶୋଇ ଅଗ୍ନିଶମ ବିଭାଗ କର୍ମଚାରୀ ଗାଡ଼ି ତଳୁ ଗୁରୁତର ଅବସ୍ଥାରେ ଉଦ୍ଧାର କରି ମଣଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ଏ ସଂକ୍ରାନ୍ତରେ ବିଶୋଇ ଥାନା କେସ୍ ନଂ ୬୦/୨୨ରେ ଏକ ମାମଲା ରୁଜୁ କରାଯାଇଥିବା ବେଳେ ଦୁର୍ଘଟଣା ଘଟାଇଥିବା ଟ୍ରକ୍ ଡ୍ରାଇଭର ବିହାର ଛେପରା ଥାନା ବାରାଗୋପାଲ ଗ୍ରାମର ୱାକିଲ ରାୟ (୩୩)କୁ ପୁଲିସ ଗିରଫ କରିଛି।