ଗାଁକୁ ପୁଲିସ ଆସୁଥିବାରୁ ଥାନା ଘେରାଉ

ଯୋଡା : ବାମେବାରି ଥାନା ଅନ୍ତର୍ଗତ ଉଚ୍ଚବାଲି ଗ୍ରାମକୁ ବାରମ୍ବାର ପୁଲିସ ଆସୁଥିବାରୁ ଅସନ୍ତୋଷ ପ୍ରକାଶ କରି ଗ୍ରାମବାସୀ ରବିବାର ସନ୍ଧ୍ୟାରେ ବାମେବାରି ଥାନା ଘେରାଉ କରିବା  ସହିତ ଏ ନେଇ ଲିଖିତ ଅଭିଯୋଗ ଦେଇଛନ୍ତି।

ଗ୍ରାମବାସୀଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ ରବିବାର ପୂର୍ବାହ୍ନ ସମୟରେ ଗ୍ରାମରେ ଠାକୁରାଣୀ ଓଷା ନେଇ ଏକ ବୈଠକ ଚାଲିଥିଲା। ସେହି ସମୟରେ ବାମେବାରି ପୁଲିସ ସେଠାକୁ ପହଞ୍ଚି କ’ଣ ବୈଠକ ବୋଲି ପଚାରିବା ସହିତ ପ୍ରାୟ ୫/୬ ଥର  ପୁଲିସ ଗାଡ଼ି ଗ୍ରାମରେ ପଇନ୍ତରା ମାରିଥିଲା। ଗ୍ରାମବାସୀ ଚୋରି କରିଛନ୍ତି ନା କୌଣସି ଅପରାଧ କାର୍ଯ୍ୟ କରିଛନ୍ତି ଯେ ପୁଲିସ ବାରମ୍ବାର ଗାଁକୁ ଆସି ଭୟଭୀତ କରୁଛି ବୋଲି  ଅଭିଯୋଗ କରି ଶତାଧିକ ଗ୍ରାମବାସୀ ରବିବାର ସନ୍ଧ୍ୟାରେ ଥାନା ଘେରାଉ କରିଥିଲେ। ଥାନାରେ ଲୋକେ ବିଜେଡି ପତାକା ଧରି ପୁଲିସର ଏପରି କାର୍ଯ୍ୟକଳାପକୁ ତୀବ୍ର ବିରୋଧ କରିଥିବା ଦେଖିବାକୁ ମିଳିଥିଲା।