ଛେଳି​ ଚୋରକୁ ଧରି ପୁଲିସ୍ ଜିମା ଦେଲେ ଗ୍ରାମବାସୀ   

ବାମରା: ବାମରା (ମଇନା ପଡ଼ା)ରେ ଜଣେ ଛେଳି ଚୋରକୁ ଧରି ଗ୍ରାମବାସୀ ପୁଲିସରେ ଜିମା ଦେଇଥିବା ଜଣାପଡ଼ିଛି। ସୂଚନାନୁସାରେ ମଙ୍ଗଳବାର ରାତି ପ୍ରାୟ ୨ ଟା ବେଳେ ୨ ଜଣ ଯୁବକ ବାମରା (ମଇନାପଡ଼ା)ର ଅନିଲ ମାଝିଙ୍କ ଘରୁ ୨ଟି ଛେଳି ଚୋରି କରି ଫେରାର ମାରୁଥିଲେ। କିନ୍ତୁ ସେମାନେ ଗ୍ରାମବାସୀଙ୍କ ହାବୁଡ଼ରେ ପଡ଼ି ଯାଇଥିଲେ। ତେବେ ଜଣେ କୌଶଳ କ୍ରମେ ଦୌଡ଼ି ଫେରାର ମାରିଥିବା ବେଳେ ଅନ୍ୟ ଚୋର ସୀମାବର୍ତ୍ତି ଲଇକେରା ବ୍ଲକ ଗଞ୍ଜୁଡିହି ଗ୍ରାମର ମାନସ ରଞ୍ଜନ ପଣ୍ଡା (୩୦)କୁ ଗ୍ରାମବାସୀ ଧରି ଉତ୍ତମ ମାଧ୍ୟମ ଦେଇଥିଲେ।

ଖବର ପାଇ ଗୋବିନ୍ଦପୁର ଥାନା ଏସ୍‌ଆଇ ବାସୁଦେବ ସେଠ ପହଞ୍ଚି ଚୋରକୁ ଗିରଫ କରିବା ପରେ ବୁଧବାର କୁଚିଣ୍ଡା କୋର୍ଟକୁ ଚାଲାଣ କରାଯାଇଥିବା ଜଣାପଡ଼ିଛି। ଫେରାର ଅଭିଯୁକ୍ତକୁ ଶୀଘ୍ର ଗିରଫ କରାଯିବ ବୋଲି ପୁଲିସ କହିଛି। ଏ ନେଇ ଥାନାରେ ମାମଲା ରୁଜୁ କରାଯାଇଥିବା ବେଳେ ଚୋରିରେ ବ୍ୟବହୃତ ବାଇକ (ଓଆର୍ ୧୬-୨୧୨୬)କୁ ଜବତ କରାଯାଇଛି। ଉଦ୍ଧାର ଛେଳିକୁ ଶ୍ରୀ ମାଝୀଙ୍କୁ ହସ୍ତାନ୍ତର କରାଯାଇଥିବା ଜଣାପଡ଼ିଛି।