ଭୁବନେଶ୍ବର: ଦେଶରେ ଯୁଦ୍ଧ ପରିସ୍ଥିତି ସୃଷ୍ଟି ହେବା ପରେ ରାଜ୍ୟ ସରକାରଙ୍କର ସିଭିଲ୍ ଡିଫେନ୍ସ (ବେସାମରିକ ସୁରକ୍ଷା) ସ୍ବେଚ୍ଛାସେବୀଙ୍କ କଥା ମନେପଡ଼ିଲା। ଶତ୍ରୁ ପକ୍ଷ ଏୟାର ଷ୍ଟ୍ରାଇକ୍ କଲେ କିପରି ଧନଜୀବନ ହାନି ହେବନି, ସେଥିପାଇଁ ରାଜ୍ୟର ୧୨ଟି ସ୍ଥାନରେ ସରକାର ବେସାମରିକ ସୁରକ୍ଷା ସ୍ବେଚ୍ଛାସେବୀଙ୍କୁ ନେଇ ମକ୍‌ ଡ୍ରିଲ୍ କଲେ। ‌ଏହା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟବାସୀଙ୍କୁ ବିଶେଷ କରି ଯୁବବର୍ଗଙ୍କୁ ଆହ୍ବାନ ଦେଲେ ଜାତୀୟତାର ମନୋଭାବ ରଖି ବେସାମରିକ ସୁରକ୍ଷା ସଙ୍ଗଠନରେ ସାମିଲ ହୁଅନ୍ତୁ। ଏହାପରେ ଗୃହ ବିଭାଗ ଅଧୀନସ୍ଥ ଅଗ୍ନିସେବା, ଗୃହରକ୍ଷୀ ଓ ସିଭିଲ୍‌ ଡିଫେନ୍ସ ପକ୍ଷରୁ ରାଜ୍ୟର ୨୨ଟି ଜିଲ୍ଲାରେ ୨୦ହଜାର ବେସାମରିକ ସ୍ବେଚ୍ଛାସେବୀଙ୍କୁ ‌ସାମିଲ କରିବାକୁ ନିଷ୍ପତ୍ତି ହୋଇଛି। ହେଲେ ଦିନକୁ ମାତ୍ର ୩୧ଟଙ୍କାରେ କାହିଁକି କିଏ କାମ କରିବ ବୋଲି ଏବେ ପ୍ରଶ୍ନ ଉଠିଲାଣି। ବର୍ତ୍ତମାନ ସବୁଠୁ ବଡ଼ ସମସ୍ୟା ହେଉଛି ଦିନକୁ ମାତ୍ର ୩୧ଟଙ୍କାରେ ନୂଆ ସ୍ବେଚ୍ଛାସେବୀଙ୍କୁ ପ୍ରଶିକ୍ଷଣ ଦେବାକୁ କେହି ରାଜି ହେଉନାହାନ୍ତି।

Advertisment

ମିଳିଥିବ‌ା ସୂଚନା ଅନୁଯାୟୀ, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଅଗ୍ନିସେବା, ଗୃହରକ୍ଷୀ ଓ ସିଭିଲ୍‌ ଡିଫେନ୍ସ ସଂସ୍ଥା ପକ୍ଷରୁ ନୂଆ ବେସାମରିକ ‌ସୁରକ୍ଷା ସ୍ବେଚ୍ଛାସେବୀଙ୍କୁ ସାମିଲ କରିବା ନେଇ ଏକ ପ୍ରସ୍ତୁତି ବୈଠକ ବସିଥିଲା। ଏଥିରେ କୁହାଯାଇଥିଲା ଯେ ରାଜ୍ୟର ୨୨ଟି ଜିଲ୍ଲାରେ ଥିବା ୨୨୩୮ଟି ଉଚ୍ଚମାଧ୍ୟମିକ ସ୍କୁଲ, କଲେଜର ଏନ୍‌ସିସି, ଏନ୍‌ଏସ୍‌ଏସ୍‌, ଏନ୍‌ୱାଇକେରେ ସାମିଲ ହୋଇଥିବା ଛାତ୍ରଛାତ୍ରୀଙ୍କୁ ଅଗ୍ରାଧିକାର ଭିତ୍ତିରେ ଏଥିରେ ସାମିଲ କରାଯିବ। ସ୍ବତନ୍ତ୍ର ଡ୍ରାଇଭ୍ ମାଧ୍ୟମରେ ପ୍ରଶିକ୍ଷଣ ଦେଇ ୨୦ହଜାର ସ୍ବେଚ୍ଛାସେବୀଙ୍କୁ ସାମିଲ କରାଯିବ। ଏବେ ରାଜ୍ୟରେ ପ୍ରାୟ ୧୦ହଜାର ବେସାମରିକ ସୁରକ୍ଷା ସ୍ବେଚ୍ଛାସେବୀ ଥିବାବେଳେ ଏହାକୁ ୩୦ହଜାରରେ ପହଞ୍ଚାଯିବ। ସେମାନଙ୍କୁ ବାତ୍ୟା, ବନ୍ୟା, ଯୁଦ୍ଧ ପରିସ୍ଥିତି, ଜରୁରୀ ପରିସ୍ଥିତିରେ ଲୋକଙ୍କ ସୁରକ୍ଷା ପାଇଁ ମୁତୟନ କରାଯିବ।

ଦିନକୁ ୩୧ଟଙ୍କାରେ କାମ କରିବାକୁ ନାରାଜ
ଶ୍ରମିକଙ୍କ ସର୍ବନିମ୍ନ ମଜୁରି ୪୬୨ଟଙ୍କା, ଯିଏ ସୁରକ୍ଷା ଦେବେ ତାଙ୍କ ପାଇଁ କାର୍ପଣ୍ୟତା
୨୨ଜିଲ୍ଲାରୁ ୨୦ହଜାର ଯୁବବର୍ଗଙ୍କୁ ସାମିଲ କରିବାକୁ ଯୋଜନା

ଏଥି ପାଇଁ ତାଲିମ ଦେବାକୁ ସାରା ରାଜ୍ୟରୁ ୧୦୦ଜଣ ବରିଷ୍ଠ ବେସାମରିକ ସୁରକ୍ଷା ସ୍ବେଚ୍ଛାସେବୀଙ୍କୁ ଚୟନ କରାଯାଇଛି। କିନ୍ତୁ ସେମାନେ କହିଛନ୍ତି ଯେ ଆମେ ୩୧ଟଙ୍କାରେ କିପରି ବାହାର ଜିଲ୍ଲାକୁ ଯାଇ ତାଲିମ ଦେବୁ। ଗାଡ଼ିରେ ତେଲ ପକାଇ ଯିବାଆସିବା କରିବା, ରହିବା, ଖାଇବା ପିଇବାରେ ତ ଦିନକୁ ଦେଢ଼ଶହରୁ ୨ହଜାର ଟଙ୍କା ଖର୍ଚ୍ଚ ହେବ। ଆମର ଦୈନିକ ଭତ୍ତାକୁ ବଢ଼ାଯାଉ। ବେସାମରିକ ସୁରକ୍ଷା ସ୍ବେଚ୍ଛାସେବୀଙ୍କୁ ତାଲିମ ଦେବାକୁ ଚୟନ ହୋଇଥିବା ଜଣେ ବରିଷ୍ଠ ସ୍ବେଚ୍ଛାସେବୀଙ୍କ କହିବାନୁଯାୟୀ, ମୁଖ୍ୟମନ୍ତ୍ରୀ ରାଜ୍ୟରେ ସିଭିଲ୍ ଡିଫେନ୍ସକୁ ସଶକ୍ତ କରିବାକୁ ଚାହୁଥିଲେ ହେଁ ବିଭାଗୀୟ ଅଧିକାରୀଙ୍କର ଆନ୍ତରିକତା ନାହିଁ। କାଳେ ଅଗ୍ନିଶମ ବିଭାଗ, ଓସ୍‌ଡମାର ଗୁରୁତ୍ବ କମିଯିବ ସେଥିପାଇଁ କେତେକ ଅଧିକାରୀ ସିଭିଲ୍ ଡିଫେନ୍ସକୁ ବଢ଼ାଇବାକୁ ଚାହୁନାହାନ୍ତି। ରାଜ୍ୟରେ ଏବେ ଓସ୍‌ଡମା, ଏନ୍‌ଡିଏମ୍‌ଏ ପକ୍ଷରୁ ହେଉଥିବା ପ୍ରଶିକ୍ଷଣ ଶିବିରକୁ ଗଲେ ଆ‌ମକୁ ସେମାନେ ରହିବା, ଖାଇବାକୁ ଦେଇ ଦୈନିକ ୧ହଜାର ଟଙ୍କା ପାରିଶ୍ରମିକ ଦେଉଛନ୍ତି।

ରାଜ୍ୟ ସରକାର ଅଣକୁଶଳୀ ଶ୍ରମିକଙ୍କ ପାଇଁ ସର୍ବନିମ୍ନ ଦୈନିକ ମଜୁରି ୪୬୨ ଟଙ୍କା, ଅର୍ଦ୍ଧକୁଶଳୀ ଶ୍ରମିକଙ୍କର ୫୧୨ ଟଙ୍କା, କୁଶଳୀ ଶ୍ରମିକଙ୍କର ୫୬୨ଟଙ୍କା ଏବଂ ଉଚ୍ଚ-କୁଶଳୀ ଶ୍ରମିକଙ୍କର ୬୧୨ ଟଙ୍କା କରିଛନ୍ତି। ହେଲେ ଆମକୁ ଦୈନିକ ୩୧ଟଙ୍କା କେଉଁ ହିସାବରେ ଦେଉଛନ୍ତି ପଚାରିବାରୁ ଆମକୁ କର୍ତ୍ତୃପକ୍ଷ କହୁଛନ୍ତି ସିଭିଲ୍ ଡିଫେନ୍ସ କୋମାରେ ଥିଲା, ଏବେ ଆଇସିୟୁକୁ ଆସିଛି। ବ୍ୟସ୍ତ ହୁଅନି। ଯଦି ବିଭାଗୀୟ ଅଧିକାରୀମାନେ ଆମର ପାରିଶ୍ରମିକ ବଢ଼ାଇବା ନେଇ ମୁଖ୍ୟମନ୍ତ୍ରୀଙ୍କ ଦୃଷ୍ଟିକୁ ଆଣିବେନି ତେବେ କିପରି ଏହା ବଢ଼ିବ? ଯିଏ ସିଭିଲ୍‌ ଡିଫେନ୍ସରେ ସାମିଲ ହେବେ, ନିଜ ଜୀବନକୁ ବାଜି ଲଗାଇ ଦିନ ଦିନ ଧରି କାମ କରିବେ। ସେମାନଙ୍କୁ ଯଦି ଉଚିତ ପାରିଶ୍ରମିକ ନମିଳିବ ତେବେ କାହିଁକି କିଏ ସ୍ବେଚ୍ଛାକୃତ ଭାବେ ସାମିଲ ହେବେ। ଯଦି ବି କେହି ସାମିଲ ହେଲେ ସେମାନେ ଜରୁରୀ ପରିସ୍ଥିତିରେ ବିଭିନ୍ନ କାରଣ ଦର୍ଶାଇ କାର୍ଯ୍ୟରେ ସାମିଲ ହେବେନି। ଏହାବାଦ୍ ରାଜ୍ୟ ସରକାରଙ୍କ କର୍ମଚାରୀଙ୍କୁ କାର୍ଯ୍ୟ ସମୟରେ ମୃତ୍ୟୁ ହେଲେ ଅନୁକମ୍ପାମୂଳକ ସହାୟତା ବାବଦକୁ ବହୁତ ଅର୍ଥ ପ୍ରଦାନ କରାଯାଉଛି। ହେଲେ ଆମ ପାଇଁ କିଛି ବୀମା ହୋଇନି କି ରାଜ୍ୟ ସରକାରଙ୍କର କୌଣସି ଯୋଜନା ନାହିଁ। ସାରା ଦେଶରେ ଓଡ଼ିଶା ଏକମାତ୍ର ରାଜ୍ୟ ଯେଉଁଠି ବେସାମରିକ ସ୍ବେଚ୍ଛାସେବୀଙ୍କୁ ଦୈନିକ ସବୁଠୁ କମ୍‌ ୩୧ଟଙ୍କା ମିଳୁଛି।