ଆଦିବାସୀଙ୍କ ସ୍ବାସ୍ଥ୍ୟ ଉପରେ ହେବ ଗବେଷଣା

କୋରାପୁଟ:ଓଡ଼ିଶାରେ ଆଦିବାସୀଙ୍କ ସ୍ୱାସ୍ଥ୍ୟ ଉପରେ ଗବେଷଣା କରିବା ପାଇଁ କୋରାପୁଟ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ଓ ମଧ୍ୟପ୍ରଦେଶର ଜବଲପୁର ସ୍ଥିତ ଭାରତୀୟ ଚିକିତ୍ସା ଗବେଷଣା ପରିଷଦ - ନ୍ୟାସନାଲ ଇନଷ୍ଟିଚ୍ୟୁଟ ଅଫ ରିସର୍ଚ୍ଚ ଇନ ଟ୍ରାଇବାଲ ହେଲଥ (ଆଇସିଏମଆର-ଏନଆଇଆରଟିଏଚ) ସହିତ ଏକ ଚୁକ୍ତିପତ୍ର ସ୍ୱାକ୍ଷର ହୋଇଛି। ଏହି ଅବସରରେ ବିଶ୍ଵବିଦ୍ୟାଳୟର ଭାରପ୍ରାପ୍ତ କୁଳପତି ପ୍ରଫେସର ଶରତ କୁମାର ପଳିତା ଏବଂ ଆଇସିଏମଆର-ଏନଆଇଆରଟିଏଚ ନିର୍ଦ୍ଦେଶକ ଡକ୍ଟର ଅପରୂପ ଦାସ ବିଶ୍ୱବିଦ୍ୟାଳୟ ପରିଦର୍ଶକ  ପ୍ରଫେସର, ଅଧ୍ୟାପକ ଅଧ୍ୟାପିକା, ଅଧିକାରୀ ଉପସ୍ଥିତ ଥିଲେ।

ପ୍ରଫେସର ପଳିତା ଏମଓୟୁର ବିଭିନ୍ନ ଉଦ୍ଦେଶ୍ୟ ଉପରେ ଆଲୋକପାତ କରି କହିଲେ ଯେ, ଆଦିବାସୀ ସ୍ୱାସ୍ଥ୍ୟ,  ପୁଷ୍ଟିକର ଖାଦ୍ୟ ଏବଂ ଏଥନୋମେଡିସିନ ଉପରେ ଗବେଷଣା ଦରକାର। ଏହି ଏମଓୟୁ ଦ୍ବାରା ସହଯୋଗ ମିଳିବ। ଏଥି ସହିତ ଉପରୋକ୍ତ ଦିଗ ଉପରେ ଛାତ୍ରଛାତ୍ରୀ  ଏବଂ ଅଧ୍ୟାପିକା ଅଧ୍ୟାପକମାନଙ୍କୁ ତାଲିମ ଦେବାକୁ ଯୋଜନା‌ ରହିଛି। ଏଥିରେ ଅଧ୍ୟାପକ ଏବଂ ବୈଜ୍ଞାନିକଙ୍କ ବିନିମୟ, ମିଳିତ ପ୍ରକଳ୍ପ ତଦାରଖ ଏବଂ ଗବେଷଣା ମାର୍ଗଦର୍ଶନ ମଧ୍ୟ ଅନ୍ତର୍ଭୁକ୍ତ ରହିଛି । ବିଶ୍ବବିଦ୍ୟାଳୟର ଜୈବ ବିବିଧତା ଏବଂ ପ୍ରାକୃତିକ ସମ୍ପଦ ସଂରକ୍ଷଣ, ନୃତତ୍ତ୍ୱ, ସମାଜବିଜ୍ଞାନ,  ଅର୍ଥନୀତି, ସାମ୍ବାଦିକତା ଏବଂ ଜନ ଯୋଗାଯୋଗ ଏବଂ ପରିସଂଖ୍ୟାନ ଭଳି ବିଭିନ୍ନ ବିଭାଗର ଛାତ୍ର-ଛାତ୍ରୀ ଏବଂ ଅଧ୍ୟାପିକା - ଅଧ୍ୟାପକମାନେ ଏହାଦ୍ବାରା ଉତ୍କର୍ଷତା ପାଇପାରିବେ । ଆଦିବାସୀ ଅଧ୍ୟୁଷିତ ଏହି ଅଞ୍ଚଳ ସ୍ବାସ୍ଥ୍ୟ କ୍ଷେତ୍ରରେ ଏକ ଅଗ୍ରଣୀ ଭୂମିକା ଗ୍ରହଣ କରିପାରିବ ।

ଆଇସିଏମଆର ବୈଜ୍ଞାନିକ ତଥା ନିର୍ଦ୍ଦେଶକ ଡକ୍ଟର ଅପରୂପ ଦାସ ଭାରତରେ ଆଦିବାସୀ ସମ୍ପ୍ରଦାୟର ସ୍ୱାସ୍ଥ୍ୟ ଉପରେ ଆଇସିଏମଆର ଦ୍ୱାରା ନିଆଯାଇଥିବା ଅନେକ ନୂତନ ଗବେଷଣାତ୍ମକ ପଦକ୍ଷେପ ବିଷୟରେ ବର୍ଣ୍ଣନା କରିଥିଲେ ।  ସେ ବିଶେଷ କରି ଆଦିବାସୀଙ୍କ ପାରମ୍ପରିକ ଚିକିତ୍ସକଙ୍କୁ ଜନସ୍ୱାସ୍ଥ୍ୟ ବ୍ୟବସ୍ଥା ସହିତ ସଂଯୋଗ କରିବା ଉପରେ ଗୁରୁତ୍ୱ ଦେଇଥିଲେ। ସେ କହିଛନ୍ତି ଯେ ଉତ୍ତମ ସ୍ୱାସ୍ଥ୍ୟ ବିକାଶର ଅନ୍ୟତମ ଉପାଦାନ ସ୍ୱାସ୍ଥ୍ୟ ଯାହା ବିନା ବିକାଶ ଅସମ୍ଭବ । ଯଦି ଆମେ ବିକାଶ ବିଷୟରେ ଚିନ୍ତା କରୁ ତେବେ ଆମକୁ ଆଦିବାସୀ ଲୋକଙ୍କ ଉତ୍ତମ ସ୍ୱାସ୍ଥ୍ୟ ଅବସ୍ଥା ଉପରେ ଧ୍ୟାନ ଦେବା ଆବଶ୍ୟକ।

ମିଳିତ ଭାବେ ଭାରତର ଦୁଇଟି ପ୍ରତିସ୍ତରିତ ଶିକ୍ଷା ଓ ଗବେଷଣା ଅନୁଷ୍ଠାନ ଉଭୟ ଶିକ୍ଷା ଏବଂ ସ୍ୱାସ୍ଥ୍ୟ କ୍ଷେତ୍ରରେ ଏହି ଅଞ୍ଚଳର ବିକାଶ କରିପାରିବ ଏବଂ ଏ ନେଇ ଯେଉଁମାନେ ଅପହଞ୍ଚ ସେମାନଙ୍କ ପାଖରେ ପହଞ୍ଚିପାରିବ ।ବିଶ୍ୱବିଦ୍ୟାଳୟ ପାଞ୍ଚଟି ସଂଲଗ୍ନ ଗ୍ରାମକୁ ପୋଷ୍ୟ ଗ୍ରାମ ଭାବେ ଗ୍ରହଣ କରି ସେମାନଙ୍କ ସ୍ୱାସ୍ଥ୍ୟ, ଶିକ୍ଷା ଏବଂ ସାମାଜିକ କାର୍ଯ କରୁଥିବାରୁ ସେ ସନ୍ତୋଷ ବ୍ୟକ୍ତ କରିଥିଲେ ।

ଡକ୍ଟର ଦାସ ତାଙ୍କ ନୋଡାଲ ଅଫିସର ବୈଜ୍ଞାନିକ ଡକ୍ଟର ସାହାଙ୍କ ସହ ଶୁକ୍ରବାର ବିଶ୍ୱବିଦ୍ୟାଳୟ ପରିଦର୍ଶନରେ ଆସିଥିଲେ । ତାଙ୍କ ଗସ୍ତ ସମୟରେ ସେ କୁଳପତି ପ୍ରଫେସର ଏସ.କେ.ପଳିତାଙ୍କ ଅଧ୍ୟକ୍ଷତାରେ ବିଶ୍ୱବିଦ୍ୟାଳୟ ପରିସରରେ ଆୟୋଜିତ ‘ଆଦିବାସୀଙ୍କ ସ୍ୱାସ୍ଥ୍ୟ ଏବଂ ବିକାଶ’ ଉପରେ ଏକ ସ୍ୱତନ୍ତ୍ର ସେମିନାରରେ ଯୋଗ ଦେଇଥିଲେ । ସେ ସଂକ୍ରାମକ ବିକୃତି, ହିମୋଗ୍ଲୋବୋନୋପାଥି ସମେତ ଆଦିବାସୀ ଜନସଂଖ୍ୟା ମଧ୍ୟରେ ପ୍ରମୁଖ ସ୍ୱାସ୍ଥ୍ୟ ଗବେଷଣା କାର୍ଯ୍ୟକଳାପ ବିଷୟରେ ବକ୍ତବ୍ୟ ପ୍ରଦାନ କରିଥିଲେ ।

ଅଣ-ସଂକ୍ରାମକ ବ୍ୟାଧି, ଭୂତାଣୁ ଏବଂ ଜୁନୋଟିକ୍ ରୋଗ, ସାମାଜିକ ବିଜ୍ଞାନ ଏବଂ ଏଥନୋ ଔଷଧ,  ସେ ପୁଷ୍ଟିହୀନତା, ମ୍ୟାଲେରିଆ, ଶିଶୁ ମୃତ୍ୟୁହାର, ମାତୃ ଏବଂ ମହିଳାଙ୍କ ସ୍ୱାସ୍ଥ୍ୟ, ଜନସଂଖ୍ୟା ବୃଦ୍ଧି, ବନ୍ଧ୍ୟାତ୍ୱ, ସ୍ୱାସ୍ଥ୍ୟ ଏବଂ ବିଦ୍ୟାଳୟ ସ୍ୱାସ୍ଥ୍ୟ, ଆଦିବାସୀ ଜନସଂଖ୍ୟା ଉପରେ ଜ୍ଞାନ ବ୍ୟବଧାନ ସମେତ ଆଦିବାସୀ ସ୍ୱାସ୍ଥ୍ୟ ପାଇଁ ଯେଉଁ ଆହ୍ବାନ ରହିଛି ସେଥି ଉପରେ ସୂଚନା ଦେଇଥିଲେ। ବିଶ୍ୱବିଦ୍ୟାଳୟର କୁଳପତି ପ୍ରଫେସର ଶରତ କୁମାର ପଳିତା କାର୍ଯ୍ୟକ୍ରମକୁ ଉଦଘାଟନ କରିଥିଲେ। ସମାଜବିଜ୍ଞାନର ମୁଖ୍ୟ ତଥା ବିଶ୍ୱବିଦ୍ୟାଳୟର ଆଦିବାସୀ କଲ୍ୟାଣ ଏବଂ ସମ୍ପ୍ରଦାୟ ବିକାଶ କେନ୍ଦ୍ରର ସମ୍ମାନନୀୟ ନିର୍ଦ୍ଦେଶକ ଡକ୍ଟର କପିଳ ଖେମୁଣ୍ଡୁ  ସ୍ୱାଗତ ଭାଷଣ ଦେଇଥିଲେ ।

ଆଦିବାସୀ ସ୍ୱାସ୍ଥ୍ୟ ଉପରେ ଗବେଷଣା କାର୍ଯ୍ୟକଳାପ ସମ୍ବନ୍ଧରେ ସେ ଅଧ୍ୟାପକ ଏବଂ ଗବେଷଣା ବିଦ୍ୱାନଙ୍କ ସହ ଆଲୋଚନା କରିଥିଲେ। ସେ କହିଥିଲେ ଯେ ଆମେ ପ୍ରମୁଖ କେନ୍ଦ୍ରୀୟ ଅନୁଷ୍ଠାନ ହୋଇଥିବାରୁ ବିକାଶ କ୍ଷେତ୍ରରେ ଆଦିବାସୀ ସମ୍ପ୍ରଦାୟର ସହଭାଗିତା  ବୃଦ୍ଧି କରି ସାମାଜିକ-ଅର୍ଥନୈତିକ ବିକାଶ ଏବଂ ସ୍ୱାସ୍ଥ୍ୟ ପାଇଁ ହାତ ମିଳାଇବା ଆବଶ୍ୟକ । ବିଶ୍ୱବିଦ୍ୟାଳୟର ଲୋକସମ୍ପର୍କ ଅଧିକାରୀ  ଡକ୍ଟର ଫଗୁନାଥ ଭୋଇ କାର୍ଯ୍ୟକ୍ରମ ସଂଯୋଜନା କରିଥିଲେ ।