ଭାପୁର: କରୋନା ପରିସ୍ଥିତିରେ ଅଜାର ହଜାର ବୁଣାକାର ପରିବାର ଦୁର୍ଦ୍ଦିନ ଭିତରେ କାଳାତିପାତ କରୁଛନ୍ତି। ତନ୍ତରେ ଲୁଗା ବୁଣି ପରିବାର ପ୍ରତିପୋଷଣ କରୁଥିବା ବୁଣାକାରମାନେ ଜୀବିକା ହରାଇ ଅସହାୟ ହୋଇପଡ଼ିଛନ୍ତି। ମିଳିଥିବା ସୂଚନାରୁ ଜଣାପଡ଼ିଛି, ନୟାଗଡ଼ ଜିଲ୍ଲା ଭାପୁର ବ୍ଲକ୍‌ ବାଇଗୁଣିଆ, ବଡ଼ସହରା ଓ କଇଁଫୁଲିଆ ଗ୍ରାମରେ ପ୍ରାୟ ଦେଢ଼ ହଜାରରୁ ଊର୍ଦ୍ଧ୍ବ ତନ୍ତରେ ଲୁଗାବୁଣୁଥିବା ବୁଣାକାର ପରିବାର ବସବାସ କରିଥାନ୍ତି। ସେମାନେ ପ୍ରତିଦିନ ତନ୍ତରେ ଲୁଗା ବୁଣି ପରିବାର ପୋଷଣ କରିଥାନ୍ତି। ବର୍ତ୍ତମାନ କରୋନା ଲକ୍‌ଡାଉନ୍ ପରିସ୍ଥିତିରେ କଞ୍ଚା ମାଲ୍‌ର ଅଭାବ ଏବଂ ଲୁଗା ବୁଣି ବିକ୍ରି କରିବା ମଧ୍ୟ ସମ୍ଭବ ହୋଇପାରୁ ନଥିବାରୁ, ସେମାନେ ଜୀବିକା ହରାଇ ଘରେ ବସି ରହିଛନ୍ତି। ଏମାନଙ୍କ ପ୍ରତି ଦୃଷ୍ଟି ଦେଇ ରାଜ୍ୟ ସରକାର ବୁଣାକାରମାନଙ୍କୁ ସହାୟତା ପ୍ରଦାନ କରିବାକୁ ଦାବି ହୋଇଛି।