ଅଜଣା ଫୋନ୍‌କଲ୍‌ରେ ଧମକ: ଥାନାରେ ଅଭିଯୋଗ କଲେ ସୋମାଲିକା

ଜଗତସିଂହପୁର ଟାଉନ୍: ତିର୍ତ୍ତୋଲ ବିଧାୟକ ବିଜୟ ଶଙ୍କର ଦାସଙ୍କ ବିରୋଧରେ ଦୁଷ୍କର୍ମ ମାମଲା ଆଣିଥିବା ସୋମାଲିକା ଦାଶଙ୍କ ପାଖକୁ ଅଜଣା ଫୋନ୍‌କଲ୍‌ ପରେ ସେ ଆଜି ରାତିରେ ଥାନାର ଦ୍ବାରସ୍ଥ ହୋଇଛନ୍ତି। ରାତି ପ୍ରାୟ ସାଢ଼େ ୯ଟାରେ ଜଗତସିଂହପୁର ଥାନାରେ ପହଞ୍ଚି ଫୋନ୍‌କଲ୍ ସଂକ୍ରାନ୍ତରେ ଲିଖିତ ଅଭିଯୋଗ କରିଛନ୍ତି। ଏପରିକି ତାଙ୍କୁ ପରୋକ୍ଷରେ ଧମକ ଦିଆଯାଉଥିବା ସେ ଅଭିଯୋଗରେ ଦର୍ଶାଇଛନ୍ତି। ସମାଜସେବୀ ସ୍ନିଗ୍ଧାରାଣୀ ବିଶ୍ବାଳଙ୍କୁ ମଧ୍ୟ ଫୋନ୍‌ରେ ଧମକ ଦିଆଯାଉଥିବା ନେଇ ଏଥିରେ ଅଭିଯୋଗ ହୋଇଛି।

ଗତକାଲି ଅଜଣା ବ୍ୟକ୍ତି ଜଣକ ସୋମାଲିକାଙ୍କ ପାଖକୁ ଫୋନ୍ କରି ମାମଲାକୁ ଦଫାରଫା କରିଦେବା ସହ କ’ଣ ଗୋଟେ ସମାଧାନ ବାହାର କରିବାକୁ କହିଥିଲେ। ପରୋକ୍ଷ ଚେତାବନୀ ‌ବି ଦେଇଥିଲେ । ସୋମାଲିକା ସେହି ଫୋନ୍‌କଲ୍ ସଂକ୍ରାନ୍ତରେ ଆଜି ଥାନାରେ ଲିଖିତ ଅଭିଯୋଗ କରିଛନ୍ତି। ଗୋଟିଏପଟେ ସୋମାଲିକା ଥାନାରେ ବସି ଏତଲା ଦେଉଥିବା ବେଳେ ତାଙ୍କ ଫେସବୁକ୍ ଆଇଡିରୁ ଭିଡିଓ ଓ ଫଟୋ କାଢ଼ି ଏହାକୁ ଏଡିଟିଂ କରି ଜଣେ ଯୁବକ ନିଜ ଫେସ୍‌ବୁକ୍‌ରେ ଭିଡିଓ ଭାଇରାଲ୍ କରୁଥିବା ସେ ଅଭିଯୋଗ କରିଛନ୍ତି। ଏ ନେଇ ଥାନା ଅଧିକାରୀଙ୍କୁ ସେ କାନ୍ଦିକାନ୍ଦି ଜଣାଇବା ସହ ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କୁ ଧରିବାକୁ ନିବେଦନ କରିଛନ୍ତି। ଜଣେ ଯୁବକଙ୍କ ସହ ଫଟୋକୁ ଯୋଡ଼ି ଭାଇରାଲ୍ କରାଯାଉଥିବା ସେ କହିଛନ୍ତି। ଭାଇରାଲ୍ କରୁଥିବା ଯୁବକ ତିର୍ତ୍ତୋଲ ନିର୍ବାଚନମଣ୍ଡଳୀ ଅଞ୍ଚଳର ଓ ୨୦୧୯ର ଫଟୋକୁ ଭାଇରାଲ୍ କରାଯାଉଛି। ପୁଲିସ କାର୍ଯ୍ୟାନୁଷ୍ଠାନ ନେଉ ନ ଥିବାରୁ ଏବେ ସେ ସାଂଘାତିକ ମାନସିକ ଚାପରେ ଥିବା କହିଛନ୍ତି।

ଏଠାରେ ଉଲ୍ଲେଖଯୋଗ୍ୟ ଯେ ବିଧାୟକ ବିଜୟଶଙ୍କରଙ୍କ ବିରୋଧରେ ଗତ ୨ ତାରିଖରେ ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ଜଗତସିଂହପୁର ଥାନାର ଦ୍ବାରସ୍ଥ ହୋଇ ଲିଖିତ ଅଭିଯୋଗ କରିଥିଲେ ସୋମାଲିକା। ପୁଲିସ ଏ ସଂକ୍ରାନ୍ତରେ ବିଜୟଶଙ୍କରଙ୍କ ବିରୋଧରେ ଦୁଷ୍କର୍ମ, ଗର୍ଭପାତ ମାମଲା ରୁଜୁ କରିଥିଲା। ଏହି ଘଟଣାରେ ସୋମାଲିକାଙ୍କ ବୟାନ ରେକର୍ଡ ସହ ଡାକ୍ତରୀମାଇନା ମଧ୍ୟ ଶେଷ ହୋଇଛି।