ପାନବରଜ ଗୁଳିକାଣ୍ଡ ମାମଲା: ମୁଖ୍ୟ ଅଭିଯୁକ୍ତ ରଣା ସହ ୩ ଅଟକ
ଶତ୍ରୁତାର କାରଣ ଅସ୍ପଷ୍ଟ, ଘଟଣାସ୍ଥଳରେ ୩ଟି ବେଆଇନ ବନ୍ଧୁକ
ଖୋର୍ଦ୍ଧା: ଖୋର୍ଦ୍ଧା ପୌରାଂଚଳର ପାନବରଜ ଅଙ୍ଗନବାଡ଼ି କେନ୍ଦ୍ର ପାଶ୍ୱର୍ସ୍ଥ ସ୍ଥାନରେ ସୋମବାର ସନ୍ଧ୍ୟାରେ ଘଟିଥିବା ଗୁଳିକାଣ୍ଡ ଘଟଣାର ୨୪ ଘଂଟା ପୂରିଛି । ଗୁଳି କରିଥିବା ମୁଖ୍ୟ ଅଭିଯୁକ୍ତ ଧରାପଡ଼ିଥିବା ବେଳେ ଜଣେ ମହିଳାଙ୍କ ସମେତ ଅନ୍ୟ ଦୁଇଜଣଙ୍କୁ ମଧ୍ୟ ଅଟକ ରଖି ପଚରାଉଚୁରା କରୁଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗୁଳିମାଡ଼ରେ ଆହତ ହୋଇଥିବା ସେକ୍ ନସିମ୍ ଓରଫ ବବୁଲୁର ପତ୍ନୀ ଦେବିରୂପା ନରେନ୍ଦ୍ର ଖୋର୍ଦ୍ଧା ଟାଉନ୍ ଥାନାରେ ଦେଇଥିବା ଲିଖିତ ଅଭିଯୋଗ ଅନୁସାରେ, ଅଙ୍ଗନୱାଡ଼ି କେନ୍ଦ୍ର-୧ ଠାରେ ତାଙ୍କ ସ୍ୱାମୀ, ସୂର୍ଯ୍ୟ ମହାନ୍ତି ଓରଫ ମିକୁ, ପ୍ରଦୀପ୍ତ ଓରଫ ତାରିଣୀ ପ୍ରସାଦ ମହାନ୍ତି, ଆଶିଷ ପଟ୍ଟନାୟକ, ରୋସନ ମହାରଣା, ମେହେରାଜ ଖାଁ ଓରଫ ରାଜା ପ୍ରମୁଖ ନିୟମିତ ଭାବେ ଖଟି କରିଥାନ୍ତି । ଗତକାଲି ରାତିରେ, ଭାଲିଆବାଡ଼ିର ସତ୍ୟ ରଂଜନ ପ୍ରଧାନ (ରାଣା) ସେଠାରେ ପହଂଚିଥିଲା । ତାରିଣୀ ପ୍ରସାଦ ସହ ତା’ର ବଚସା ହୋଇଥିଲା । ଏହାପରେ ନିଜ ପକେଟ୍ରୁ ବନ୍ଧୁକ ବାହାର କରି ତାକୁ ମାରିବାକୁ ଉଦ୍ୟତ ହେବା ବେଳେ ନିସମ ବନ୍ଧୁକ ଆଗରେ ଠିଆ ହୋଇ ବିରୋଧ କରିଥିଲା । ଏଥିରେ ରାଗିଯାଇ ସତ୍ୟରଂଜନ ନସିମ ଉପରକୁ ଦୁଇଟି ରାଉଣ୍ଡ ଗୁଳି କରିଥିଲା । ଗୋଟିଏ ଗୁଳି ନସିମରେ ଛାତିରେ ବାଜିଥିଲା ।
ତେବେ ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ ଉଭୟ ନସିମ ଓ ସତ୍ୟରଂଜନ ପରସ୍ପର ବନ୍ଧୁଥିଲେ । ଦୁଇଦିନ ପୂର୍ବେ ଉଭୟ ମୋଟରସାଇକଲରେ ଖୋର୍ଦ୍ଧା ସହରରେ ବୁଲାବୁଲି କରୁଥିଲେ । ଏପରିକି ସେଠାରେ ଥିବା ଅନ୍ୟମାନଙ୍କ ସହ ମଧ୍ୟ ସତ୍ୟରଂଜନର ଉତ୍ତମ ବନ୍ଧୁତା ଥିଲା । ଏପରିକି ସମସ୍ତେ ବ୍ରାଉନସୁଗାର, ଜାଗା ଆଦି ବ୍ୟବସାୟ, ରାସ୍ତା ଉପରେ ଥିବା ଟ୍ରକ୍ ଆଦିରୁ ବେଆଇନ ବଟି ଆଦାୟ କରିବା ଆଦି ଘଟଣାରେ ସମ୍ପୃକ୍ତ ଥିଲେ । କେତେକଙ୍କ ନାମରେ ଏକାଧିକ ମାମଲା ମଧ୍ୟ ରହିଥିବା ଜଣାଯାଇଛି । ସମସ୍ତ ଯୁବକ ଜଣେ ଜଣାଶୁଣା ବ୍ରାଉନସୁଗାର ବେପାରୀଙ୍କ ଅଧୀନରେ କାମ କରୁଥିବା ମଧ୍ୟ ଜଣାଯାଇଛି । ଘଟଣା ପରେ ପୁଲିସ ସତ୍ୟରଂଜନକୁ ବେଗୁନିଆ-ଗୁଡ଼ୁମ ରାସ୍ତାରୁ ଧରିଥିବା ବେଳେ ତା’ ନିକଟରୁ ବ୍ୟବହୃତ ବନ୍ଧୁକ ମଧ୍ୟ ଜବତ କରିଥିବା ସୂଚନା ରହିଛି । ଅପରପକ୍ଷରେ, ଗୁଳିକାଣ୍ଡ ଦିନ ସତ୍ୟରଂଜନ ଯେଉଁ ମୋଟରସାଇକଲ (ଓଡି୦୨ଏଚ୍୩୨୫୩)ଟି ବ୍ୟବହାର କରିଥିଲା ସେହି ମୋଟର ସାଇକଲଟି ଦ୍ୱତୀୟ ଥର କିଣାଯାଇ ଜଣେ ମହିଳାଙ୍କ ନାମରେ ପଂଜୀକୃତ ହୋଇଛି । ଏହାର ଆଧାରରେ ପୁଲିସ ଉକ୍ତ ମୋଟର ସାଇକଲର ମାଲିକ (ମହିଳା) ଓ ତାଙ୍କ ଭାଇକୁ ଆଣି ଥାନାରେ ପଚରା ଉଚୁରା କରୁଥିବା ଜଣାଯାଇଛି ।