ମାଲକାନଗିରି: ମାଲକାନଗିରି ଜିଲ୍ଲାର ତିନି ଉଉଣୀ ନିଜ ବାପାଙ୍କ ଶବକୁ କାନ୍ଧେଇ.ନେଇ ଅନ୍ତିମ ସଂସ୍କାର କରି ଚାରିଆଡେ ଚର୍ଚ୍ଚାରେ ରହିଛନ୍ତି। ଏହାରି ଭିତରେ ବାପାଙ୍କ ମୃତ୍ୟୁପଛର କାରଣ ସେମାନଙ୍କ ମନକୁ ଆନ୍ଦୋଳିତ କରୁଛି । ସରକାରୀ ଡାକ୍ତରଖାନାରେ ଉଚିତ ସ୍ୱାସ୍ଥ୍ୟସେବା ନପାଇ ବାପାଙ୍କ ମୃତ୍ୟୁ ହୋଇଥିବା ତିନି ଭଉଣୀ ଅଭିଯୋଗ ଆଣିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟଠାରୁ ଆରମ୍ଭ କରି କୋରାପୁଟ ମେଡିକାଲ କଲେଜ, ସବୁଠି ଚିକିତ୍ସାରେ ଚରମ ଅବହେଳା କରାଯାଇଥିବା ମୃତକଙ୍କ ଝିଅ ଅଭିଯୋଗ ଆଣିଛନ୍ତି । ଏମିତି କି ବାପାଙ୍କୁ ଚିକିତ୍ସା ପାଇଁ ମାଲକାନଗିରିରୁ କୋରାପୁଟ ନେବା ପାଇଁ ମାଗଣା ଆମ୍ବୁଲାନ୍ସ ମିଳି ନଥିଲା କି ମୃତ୍ୟୁ ପରେ ଶବ ଆଣିବା ପାଇଁ କୋରାପୁଟ ମେଡିକାଲ କଲେଜରେ ମିଳି ନ ଥିବା ମହାପ୍ରାୟଣ ସେବା । ଭାଇ ନଥିବାରୁ ୩ ଝିଅ ସଙ୍ଗୀତା, ସ୍ମିତା ଓ ସଶ୍ମିତା ବାପା ସୁକାନ୍ତ ପଟ୍ଟନାୟକଙ୍କ ଅନ୍ତିମ ସଂସ୍କାର କରି ରକ୍ଷଣଶୀଳ ସମାଜକୁ ପରିବର୍ତ୍ତନର ବାର୍ତ୍ତା ଦେଇଥିଲେ । ବାପାଙ୍କ କ୍ରିୟାକର୍ମ କରି ଯେତେ ଗର୍ବିତ, ବାପାଙ୍କୁ ଡାକ୍ତରଖାନାରୁ ସୁସ୍ଥ କରି ଫେରାଇ ନ ପାରି ସେତିକି ଦୁଃଖିତ ।
ସେମାନଙ୍କ ଅଭିଯୋଗ ଅନୁସାରେ, ଗତ ୧୭ ତାରିଖ ଦିନ ସୁକାନ୍ତ ପଟ୍ଟନାୟକ ଅସୁସ୍ଥ ଅବସ୍ଥାରେ ମାଲକାନଗିରି ଡାକ୍ତରଖାନାରେ ଭର୍ତ୍ତି ହୋଇଥିଲେ । ସେଠାରେ ତାଙ୍କ ସ୍ୱାସ୍ଥ୍ୟବସ୍ଥା ବିଗିଡିବାରୁ ଡାକ୍ତର କୋରାପୁଟ ମେଡିକାଲ କଲେଜକୁ ସ୍ଥାନାନ୍ତର କରିଥିଲେ । ହେଲେ ରୋଗୀଙ୍କୁ କୋରାପୁଟ ନେବା ପାଇଁ ପରିବାରକୁ ମିଳି ନ ଥିଲା ମାଗଣା ଆମ୍ବୁଲାନ୍ସ । ବାପାଙ୍କୁ ସ୍ଥାନାନ୍ତର ପାଇଁ ୧୦୮ ଲେଖା ଥିବା ଆମ୍ବୁଲାନ୍ସକୁ ୪ ହଜାର ଟଙ୍କା ମୃତକଙ୍କ ଝିଅ ଦେଇଥିଲେ।
ମାଲକାନଗିରିରେ ତ ଠିକ୍ ସ୍ୱାସ୍ଥ୍ୟସେବା ମିଳି ନ ଥିଲା, କୋରାପୁଟ ମେଡିକାଲ କଲେଜରେ ମଧ୍ୟ ଚିକିତ୍ସାରେ ଅବହେଳା କରାଯାଇଥିବା ଅଭିଯୋଗ ଆଣିଛନ୍ତି ମୃତକଙ୍କ ଝିଅ । ରୋଗୀ ଗୁରୁତର ଥିବା କହି ଆଡମିଶନ କରାଇ ଦେଲେ, ହେଲେ ଦିନ ୯ଟାରେ ଚିକିତ୍ସା ଆରମ୍ଭ ହେବ କହି ଡାକ୍ତର ଚାଲିଗଲେ । ପରେ ପ୍ରାଥମିକ ଚିକିତ୍ସା ପାଇଁ ଲେଖା ହୋଇଥିବା ଇଂଜେକ୍ସନ ଓ ସାଲାଇନ୍ ନିରାମୟ କେନ୍ଦ୍ରରେ ନମିଳିବାରୁ ବାହାରୁ କିଣିଥିଲେ ସୁକାନ୍ତଙ୍କ ଝିଅ । କିନ୍ତୁ ଝିଅମାନଙ୍କ ସବୁ ଚେଷ୍ଟା ବାପାଙ୍କ ମୃତ୍ୟୁ ପାଖରେ ହାର ମାନିଥିଲା । ମୃତ୍ୟୁ ପରେ ଶବକୁ କୋରାପୁଟରୁ ମାଲକାନଗିରି ଆଣିବା ପାଇଁ ମୃତକଙ୍କ ପରିବାରକୁ ମିଳି ନ ଥିଲା ମହାପ୍ରୟାଣ ଯୋଜନା । ମାଗଣା ଆମ୍ବୁଲାନ୍ସ ନମିଳିବାରୁ ୬ ହଜାର ଟଙ୍କା ଦେଇ ଘରୋଇ ଆମ୍ବୁଲାନ୍ସରେ ବାପାଙ୍କ ଶବକୁ ମାଲକାନଗିରି ଆଣିଥିଲେ ପରିବାର ।
ନିକଟରେ ମାଲକାନଗିରି ଡାକ୍ତରଖାନାରେ ଜିଲ୍ଲାପାଳ ନିଜ ସ୍ତ୍ରୀଙ୍କ ପ୍ରସବ କରାଇ ସୁସ୍ଥ ସରକାରୀ ସାସ୍ଥ୍ୟ ସେବାର ବାର୍ତ୍ତା ଦେବା ପାଇଁ ଉଦ୍ୟମ କରିଥିଲେ । କିନ୍ତୁ ସୁକାନ୍ତଙ୍କ ମୃତ୍ୟୁ ପରେ ତାଙ୍କ ଝିଅଙ୍କ ଅଭିଯୋଗ ଉପାନ୍ତ ଅଂଚଳରେ ସ୍ୱସ୍ଥ୍ୟସେବାର ଅସଲ ଚିତ୍ରକୁ ସାମ୍ନାକୁ ଆଣିଛି ।