ଭାରତର ଯୋଗ ବିଶ୍ୱରେ ଲୋକପ୍ରିୟତା ହାସଲ କରିଛି: ଧର୍ମେନ୍ଦ୍ର ପ୍ରଧାନ

ନୂଆଦିଲ୍ଲୀ/ଭୁବନେଶ୍ୱର: ଭାରତର ପ୍ରାଚୀନ ସଂସ୍କୃତିରୁ ଆସିଥିବା ଅମୂଲ୍ୟ ଉପାଦାନ ‘ଯୋଗ’କୁ ଭାରତ ବିଶ୍ୱକୁ ଉପହାର ଭାବରେ ଦେଇଛି ବୋଲି ଶନିବାର ନୂଆଦିଲ୍ଲୀ ଠାରେ ତିନିଦିନିଆ ‘ଜାତୀୟ ଯୋଗ ଅଲମ୍ପିଆଡ୍ ୨୦୨୨’ ସମାରୋହକୁ ଉଦଘାଟନ କରିଛନ୍ତି ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଶିକ୍ଷା ମନ୍ତ୍ରଣାଳୟ ଓ ଜାତୀୟ ଶିକ୍ଷା ଗବେଷଣା ଓ ପ୍ରଶିକ୍ଷଣ ପରିଷଦ(ଏନସିଇଆରଟି) ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ ଶ୍ରୀ ପ୍ରଧାନ କହିଛନ୍ତି ଯେ, ଯୋଗ ହେଉଛି ଜୀବନର ଅବିଚ୍ଛେଦ୍ୟ ଅଙ୍ଗ। ଯୋଗ କଲେ ମନ ଓ ଶରୀର ପ୍ରଫୁଲ୍ଲିତ ହେବା ସହ ନୂଆ ଉର୍ଜା ଦେଇଥାଏ। ଜୁନ ୨୧ ତାରିଖକୁ ଆନ୍ତର୍ଜାତିକ ଯୋଗ ଦିବସ ଭାବରେ ପାଳନ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରସ୍ତାବକୁ ଆମେରିକାର ମିଳିତ ଜାତିସଂଘ ସାଧାରଣ ପରିଷଦ ସ୍ୱୀକୃତି ଦେବା ପର ଠାରୁ ଏହା ବିଶ୍ୱସ୍ତରରେ ଲୋକପ୍ରିୟତା ହାସଲ କରିଛି ।

ଯୋଗ ବିଶ୍ୱକୁ ଭାରତର ଉପହାର। ଉତ୍ତମ ସ୍ୱାସ୍ଥ୍ୟ ଆପଣାଇବା ଦିଗରେ ଯୋଗ ବିଶ୍ୱକୁ ଏକତ୍ରିତ କରିଛି। ବିଶେଷ ଭାବରେ କୋଭିଡ୍ ସମୟରେ ଯୋଗର ମହତ୍ୱ ବୁଝାପଡ଼ିଥିଲା। ପ୍ରଧାନମବୀ ନରେନ୍ଦ୍ର ମୋଦି ଲୋକଙ୍କୁ ଅଧିକ ନିକଟତର କରିବା ଏବଂ ସ୍ୱାସ୍ଥ୍ୟବାନ ଜୀବନକୁ ପ୍ରୋତ୍ସାହନ ଦେବା ଦିଗରେ ଚଳିତ ବର୍ଷ “ମାନବିକତା ପାଇଁ ଯୋଗ” ଥିମ୍ ରଖିଛନ୍ତି। ଯୋଗ କେବଳ ଏକ ଶାରିରୀକ ବାୟ୍ୟାମ ନୁହେଁ ବରଂ ଜୀବନର ଏକ ମାଧ୍ୟମ। ଜାତୀୟ ଶିକ୍ଷା ନୀତି ୨୦୨୦ରେ ଛାତ୍ର ଏବଂ ଶିକ୍ଷକଙ୍କ ଶାରୀରିକ ଏବଂ ମାନସିକ ସୁସ୍ଥତା ଉପରେ ମଧ୍ୟ ବିଶେଷ ଗୁରୁତ୍ୱ ଦିଆଯାଇଛି। କ୍ରୀଡ଼ା ଆଧାରିତ ଶିକ୍ଷା ଆରୋହଣ ଛାତ୍ରଛାତ୍ରୀଙ୍କୁ କ୍ରୀଡ଼ାବିତର ଉତ୍ସାହ ପ୍ରଦାନ କରିବ ଏବଂ ସେମାନଙ୍କୁ ଆଜୀବନ ଫିଟନେସ୍ ଆପଣାଇବାକୁ ପ୍ରୋତ୍ସାହିତ କରିବ। ଯୋଗ ହେଇଛି ଉତ୍ତମ ସ୍ୱାସ୍ଥ୍ୟ, କଲ୍ୟାଣ ଏବଂ ଶାରିରୀକ ଶିକ୍ଷାର ଅଭିନ୍ନ ଅଙ୍ଗ।

ଯୋଗର ମହତ୍ୱକୁ ନୂଆପିଢ଼ିଙ୍କୁ ଶିଖାଇବା ପାଇଁ ଏନସିଇଆରଟି ପାଠ୍ୟକ୍ରମରେ ଯୋଡ଼ିବା ଦରକାର। ଯୋଗର ପ୍ରାଚୀନ ପରମ୍ପରାକୁ ପାଠ୍ୟକ୍ରମରେ ସାମିଲ କରାଯିବା ଦରକାର। ଆମେ ଜାତୀୟ ପାଠ୍ୟକ୍ରମ ରୂପରେଖ(ଏନସିଏଫ)ର ବିକାଶ ପ୍ରକ୍ରିୟାରେ ଥିବା ବେଳେ ପୌଢ଼ ଶିକ୍ଷା ସମୟରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ମଧ୍ୟରେ ଯୋଗ ଶିକ୍ଷାକୁ ପ୍ରାଥମିକତା ଦେବା ଦରକାର। କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଜାତୀୟ ଯୋଗ ଅଲିମ୍ପିଆଡ ପାଇଁ ଚୟନ ହୋଇଥିବା ସବୁ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳର ଛାତ୍ରଛାତ୍ରୀଙ୍କୁ ଶୁଭେଚ୍ଛା ଜଣାଇଛନ୍ତି। ଏନସିଇଆରଟି ଦୀର୍ଘ ୮ ବର୍ଷ ଧରି ଏପରି କାର୍ଯ୍ୟକ୍ରମ ଆୟୋଜନ କରାଯିବା ଖୁସିର ବିଷୟ। ଏନସିଇଆରଟିକୁ ସ୍କୁଲ, ବ୍ଲକ, ଜିଲ୍ଲା ଏବଂ ରାଜ୍ୟ ସ୍ତରରେ ଯୋଗ ଅଲମ୍ପିଆଡ ଆୟୋଜନ କରିବାକୁ ପରାମର୍ଶ ଦେଇଛନ୍ତି କେନ୍ଦ୍ରମନ୍ତ୍ରୀ। ପ୍ରତ୍ୟେକ ବ୍ଲକରେ ସ୍କୁଲ ଛାତ୍ରଛାତ୍ରୀଙ୍କୁ ଯୋଡ଼ିଲେ ଯୋଗର ପରମ୍ପରା ସୁଦୃଢ଼ ହେବ ଏବଂ ଯୋଗକୁ ଏକ ଜୀବନଶୈଳି ଭାବରେ ଗ୍ରହଣ କରିବା ଦିଗରେ ସହଜ ହେବ ବୋଲି କେନ୍ଦ୍ରମନ୍ତ୍ରୀ କହିଛନ୍ତି। ଏହି ସମାହୋହରେ ଶିକ୍ଷା ରାଷ୍ଟ୍ରମନ୍ତ୍ରୀ ସୁବାଷ ସରକାର, ଏନସିଇଆରଟିର ନିର୍ଦେଶକ ପ୍ରଫେସର ଦିନେଶ ପ୍ରସାଦ ସକଲାନୀ, ଏନସିଇଆରଟିର ବରିଷ୍ଠ କାର୍ଯ୍ୟାଧିକାରୀ, ଶିକ୍ଷାବିତ୍ ପ୍ରମୁଖ ଯୋଗ ଦେଇଥିଲେ।