ଦୁଇ ବାଇକ୍ ମୁହାଁମୁହିଁ ଧକ୍କା; ପୋଷ୍ଟମ୍ୟାନ୍ଙ୍କ ସମେତ ୩ ମୃତ, ଜଣେ ଗୁରୁତର
ପାଟଣା: କେନ୍ଦୁଝର ଜିଲ୍ଲା ପାଟଣା ଥାନା ୨୨୦ ନମ୍ବର ଜାତୀୟ ରାଜପଥ ଡିଆନାଳିରେ ଗତକାଲି ବିଳମ୍ବିତ ରାତ୍ରରେ ୨ ବାଇକ୍ ମୁହାଁମୁହିଁ ଧକ୍କା ହେବା ଫଳରେ ୩ ଜଣଙ୍କର ମୃତ୍ୟୁ ହେବା ଭଳି ଘଟଣା ଅଞ୍ଚଳରେ ଆଲୋଡନ ସୃଷ୍ଟି କରିଛି। ମୃତକମାନେ ହେଲେ କେନ୍ଦୁଝର ଜିଲ୍ଲା ଘଟଗାଁ ଥାନା ଆମ୍ବୁଆପଡା ଗ୍ରାମର ତ୍ରିଲୋଚନ ମହାନ୍ତ (୪୪)। ସେ ଏବେ କେନ୍ଦୁଝର ମୁଖ୍ୟ ଡାକଘରରେ ପୋଷ୍ଟମ୍ୟାନ୍ ଭାବେ କାର୍ଯ୍ୟରତ ଥିଲେ । ଅନ୍ୟ ୨ ଜଣ ହେଲେ ପାଟଣା ଥାନା ସରାସକୋଲା ଗ୍ରାମର ରମାକାନ୍ତ ମହାନ୍ତ (୨୯) ଓ ରୁଧିଅପଡ଼ା ଗ୍ରାମର ସୁନୀଲ ଦାସ(୨୬)। ଅନ୍ୟ ଜଣେ ପାଟଣା ଥାନା ପଡ଼ିଆପଶି ଗ୍ରାମର କମଳାକାନ୍ତ ମହାନ୍ତ (୨୮) ଗୁରୁତର ଅବସ୍ଥାରେ କଟକ ଡାକ୍ତରଖାନାରେ ଚିକିତ୍ସାଧୀନ ଥିବା ଜଣାପଡିଛି।
Sambad is now on WhatsApp
Join and get latest news updates delivered to you via WhatsApp
ଘଟଣାରୁ ପ୍ରକାଶ ତ୍ରିଲୋଚନ ମହାନ୍ତ ଓ କମଳାକାନ୍ତ ମହାନ୍ତ ଡ଼ିଆନାଳି ଗ୍ରାମର ଏକ ବିବାହ ଉତ୍ସବରୁ ବାହାରି ଏକ ବାଇକରେ ମଲ୍ଲୀପସି ଆଡକୁ ଯାଉଥିଲା ବେଳେ ମାଲିପସି ଆଡୁ ପାଟଣା ଡିଆନାଳୀ ଆଡକୁ ସୁନୀଲ ଦାସ ଓ ରମାକାନ୍ତ ମହାନ୍ତ ଅନ୍ୟ ଏକ ବାଇକ୍ରେ ଆସୁଥିଲେ। ଉଭୟ ବାଇକ ଡିଆନାଳି ଛକ ନିକଟରେ ମୁହାଁ ମୁହିଁ ଧକ୍କା ହୋଇଥିଲା। ବାଇକରୁ ଛିଟିକି ପଡି ୪ ଜଣ ରାସ୍ତାରେ ଗୁରୁତର ଅବସ୍ଥାରେ ପଡ଼ିଥିଲେ। ଖବର ପାଇ ପାଟଣା ଦମକଳ ବାହିନୀ ପହଁଚି ସମସ୍ତଙ୍କୁ ପାଟଣା ଡାକ୍ତରଖାନାରେ ଭର୍ତ୍ତି କରିଥିଲେ।
ତେବେ ସେଠାରେ ତ୍ରିଲୋଚନ ମହାନ୍ତ, ରମାକାନ୍ତ ମହାନ୍ତ ଓ ସୁନୀଲ ଦାସଙ୍କୁ ଡାକ୍ତର ମୃତ ଘୋଷଣା କରିଥିଲେ। ସଙ୍କଟାପନ୍ନ ଅବସ୍ଥାରେ କମଳାକାନ୍ତଙ୍କୁ କଟକ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ପାଟଣା ଥାନାରେ ଏ ନେଇ ଏକ ଦୁର୍ଘଟଣା ଜନିତ ମାମଲା ରୁଜ୍ଜୁ ହୋଇ ଘଟଣାର ତଦନ୍ତ ଅବ୍ୟାହତ ରହିଛି। ଦୁର୍ଘଟଣାଗ୍ରସ୍ତ ବାଇକକୁ ଥାନାରେ ଜବତ କରାଯାଇଛି। ଏହି ଘଟଣା ସମ୍ପ୍ରତି ଅଞ୍ଚଳରେ ଶୋକାକୁଳ ଅଵସ୍ଥା ସୃଷ୍ଟି କରିଛି।