ବାରିପଦା: ଛେଳି ଚରାଇବାକୁ ଯାଇଥିଲେ । ଘଡ଼ଘଡ଼ି ସହ ବର୍ଷା ହେବାରୁ ଗଛତଳେ ଆଶ୍ରୟ ନେଇଥିଲେ ୩ ଜଣ ନାବାଳକ ଓ ନାବାଳିକା । ଏହି ସମୟରେ ଗଛ ଉପରେ ପଡ଼ିଲା ଚଡ଼କ ଏବଂ ଏଠାରେ ଥିବା ୩ ଜଣ ନାବାଳକ ଓ ନାବାଳିକାଙ୍କର ଘଟଣାସ୍ଥଳରେ ମୃତ୍ୟୁ ହୋଇଯାଇଛି । ମୟୂରଭଂଜ ଜିଲ୍ଲା ଚାନ୍ଦୁଆ ଥାନା ଅନ୍ତର୍ଗତ ବାଘୁଆଶୋଳ ଗାଁରେ ଆଜି ଅପରାହ୍ନରେ ଏହି ଅଭାବନୀୟ ଘଟଣା ଘଟିଛି । ମୃତକମାନେ ହେଲେ ବାବଲୁ ନାଏକ (୧୪), ସୁଜିତ ନାଏକ (୧୪) ଓ ବର୍ଷା ନାଏକ (୧୨) ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଚାନ୍ଦୁଆ ଥାନା ଅନ୍ତର୍ଗତ ବାଘୁଆଶୋଳ ଗାଁର କାଳୀଚରଣ ନାଏକଙ୍କ ପୁଅ ବାବଲୁ, ରାଧାକାନ୍ତ ନାଏକଙ୍କ ପୁଅ ସୁଜିତ ଓ ଜଗନ୍ନାଥ ନାଏକଙ୍କ ଝିଅ ବର୍ଷା ଆଜି ଅପରାହ୍ନ ସମୟରେ ଛେଳି ଚରାଉଥିଲେ । ଏହି ୩ ଜଣ ପିଲା ଘରଠାରୁ ମାତ୍ର ୫୦ ମିଟର ଦୂରରେ ଥିବା ପଡ଼ିଆରେ ଛେଳି ଚରାଉଥିଲେ । ସମୟ ପାଖାପାଖି ଦିନ ଗୋଟିଏ ହେବ, ଏତିକି ବେଳେ ଅଚାନକ ଘଡ଼ଘଡ଼ି ସହ ବର୍ଷା ହୋଇଥିଲା । ବାବଲୁ, ସୁଜିତ ଓ ବର୍ଷା ପଡ଼ିଆରେ ଥିବା ଏକ ଗଛ ତଳେ ଛିଡ଼ା ହୋଇଥିବା ସମୟରେ ବଜ୍ରପାତ ହୋଇଥିଲା । ଫଳରେ ଘଟଣାସ୍ଥଳରେ ହିଁ ତିନି ଅଚେତ ହୋଇଯାଇଥିଲେ ।
ବଜ୍ରପାତ ନେଇ ପରିବାର ଲୋକେ ଘଟଣାସ୍ଥଳକୁ ପହଂଚିଥିଲେ । ସେମାନେ ତିନି ଜଣଙ୍କୁ ହସ୍ପିଟାଲ ନେବା ପାଇଁ ଆମ୍ବୁଲାନ୍ସକୁ ଫୋନ୍ କରିଥିଲେ । କିନ୍ତୁ ଦୁଃଖର ବଷୟ ଯେ, ଆମ୍ବୁଲାନ୍ସ ଘଟଣାସ୍ଥଳକୁ ପହଂଚିବା ବେଳେକୁ ବାବଲୁ, ସୁଜିତ ଓ ବର୍ଷାଙ୍କର ମୃତ୍ୟୁ ହୋଇସାରିଥିଲା । ଏହି ଅଭାବନୀୟ ଘଟଣାକୁ ନେଇ ସ୍ଥାନୀୟ ଅଂଚଳରେ ଶୋକ ଖେଳିଯାଇଛି ।