ବଲାଙ୍ଗୀର/ଦେଓଗାଁ : ଜାତୀୟ ରାଜପଥ-୨୬ର ବଲାଙ୍ଗୀର-ଦେଓଗାଁ ମଝି ସିନଖମନ ଛକ ନିକଟରେ ଘଟିଥିବା ସଡ଼କ ଦୁର୍ଘଟଣାରେ ଗୋଟିଏ ପରିବାର ପୂରା ଛାରଖାର ହୋଇଯାଇଛି। ଦୁର୍ଘଟଣାସ୍ଥଳରେ ସରୋଜ ପଶାୟତଙ୍କ ମୃତ୍ୟୁ ହୋଇଥିବା ବେଳେ ବୁର୍ଲା ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ସ୍ତ୍ରୀ କରିସ୍ମା ଓ ତିନିବର୍ଷ ବୟସର ଝିଅ ରମ୍ୟା ଆଖିବୁଜିଛନ୍ତି। ଅନ୍ୟପଟେ ଏବେ ବି ବୁର୍ଲା ଡାକ୍ତରଖାନାରେ ଜୀବନ ସହ ସଂଗ୍ରାମ କରୁଛି ୧୫ ମାସର ପୁଅ ରେୟାଂଶ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ଗୁରୁବାର ଟିଟିଲାଗଡ଼ ବ୍ଲକ୍ ଉଡ଼ାର ଗାଁର ସରୋଜ ପଶାୟତ ତାଙ୍କ ପରିବାର ସହ ବାଇକ୍ ଯୋଗେ ଏକ ବାହାଘର କାର୍ଯ୍ୟକ୍ରମରେ ଯୋଗଦେବା ପାଇଁ ସକାଳୁ ବାହାରିଥିଲେ। ବଲାଙ୍ଗୀର ସଦର ଥାନା ଖୁଜେନପାଲି ଗାଁର ତାଙ୍କ ମାମୁଶ୍ୱଶୁରଙ୍କ ଝିଅ ବାହାଘର କାର୍ଯ୍ୟକ୍ରମରେ ଯୋଗଦେବାର ଥିଲା। ଭଉଣୀର ବାହାଘରରେ ଯୋଗଦେବାକୁ ଥିବାରୁ ବେଶ୍ ଖୁସିଥିଲେ କରିସ୍ମା। ହସଖୁସିରେ ପୂରା ପରିବାର ବାହାରିଥିଲେ। କିନ୍ତୁ ରାସ୍ତାରେ ଛକି ବସିଥିଲା ମୃତ୍ୟୁ। ସିନଖମନ ଛକଠାରେ ବଲାଙ୍ଗୀରରୁ ଟିଟିଲାଗଡ଼ ପଟକୁ ଯାଉଥିବା ଗଣପତି ବସ୍ ସହିତ ପିଟି ହୋଇଥିଲା ବାଇକ୍। ଘଟଣା ସ୍ଥଳରେ ସରୋଜଙ୍କ ମୃତ୍ୟୁ ଘଟିଥିଲା। ଗୁରୁତର ତିନିଜଣଙ୍କୁ ସ୍ଥାନୀୟ ଲୋକେ ଆମ୍ବୁଲାନ୍ସ ଯୋଗେ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲକୁ ଆଣିଥିଲେ। ଅବସ୍ଥା ସଂକଟାପନ୍ନ ହେବାରୁ ସେମାନଙ୍କୁ ବୁର୍ଲା ପଠାଯାଇଥିଲା। ଏବେ ହସପିଟାଲରେ ଜୀବନ ସହ ସଂଗ୍ରାମ କରୁଛି ସରୋଜଙ୍କ କୁଳନନ୍ଦନ ୧୫ ମାସର ପୁଅ ରେୟାଂଶ।