ବାଚସ୍ପତିଙ୍କ ଉପରକୁ ଜୋତା ଫୋପାଡ଼ିବା ଘଟଣା : ନିଲମ୍ବିତ ବିଧାୟକ କହିଲେ ଆମେ ଅନୁତପ୍ତ ନୁହେଁ
ମୁଁ କୌଣସି ଅନୈତିକ କାମ କରିନାହିଁ, ଯେ ଅନୁତପ୍ତ ହେବି: ମୋହନ ମାଝୀ
ଭୁବନେଶ୍ବର: ବିଧାନସଭା ଅଧିବେଶନ ଚାଲିଥିବା ବେଳେ ବାଚସ୍ପତିଙ୍କ ଉପରକୁ ଚପଲ ଫୋପାଡ଼ିବା ଘଟଣାରେ ୩ ଜଣ ବିଧାୟକଙ୍କୁ ନିଲମ୍ବନ ପାଇଁ ଆଦେଶ ହୋଇଛି। ନିଲମ୍ବିତ ହୋଇଛନ୍ତି ବିଧାୟକ ବିଷ୍ଣୁ ସେଠୀ, ଜୟନାରାୟଣ ମିଶ୍ର ଓ ମୋହନ୍ ମାଝୀ। ସେମନେଙ୍କୁ ଗୃହରୁ ବାହାରି ଯିବା ଲାଗି ନିର୍ଦ୍ଦେଶ ଦିଆଯିବା ପରେ ସେମାନେ ଓ ବିଜେପିର ଅନ୍ୟ ବିଧାୟକ ବିଧାନସଭା ପରିସରରେ ଥିବା ଗାନ୍ଧୀମୂର୍ତ୍ତି ତଳେ ଧାରଣାରେ ବସି ଏହି ନିଷ୍ପତ୍ତିର ପ୍ରତିବାଦ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଗୃହରୁ ନିଲମ୍ବିତ ହେବା ପରେ ବିଧାୟକ ଜୟନାରାୟଣ ମିଶ୍ର ନିଜର ପ୍ରତିକ୍ରିୟାରେ କହିଛନ୍ତି, ବାଚସ୍ପତି ଯେତେବେଳେ ସମ୍ବିଧାନ ଅନୁସାରେ କାମ କଲେ ନାହିଁ, ସେତେବେଳେ ଏପରି ପ୍ରତିକ୍ରିୟା ଆସିଥିଲା। ଯଦି ଅତ୍ୟାଚାର, ଅନାଚାର ବିରୋଧରେ ସ୍ବର ଉତ୍ତୋଳନ କଲେ ନିଲମ୍ବନ କରାଯାଏ, ମୁଁ ଏହାକୁ ସ୍ବାଗତ କରୁଛି। କିନ୍ତୁ ମୁୁଁ ଏହି ନିଲମ୍ବନକୁ ଖାତିର କରୁ ନାହିଁ।
ସେହିଭଳି ଗୃହରୁ ନିଲମ୍ବିତ ହେବା ପରେ ବିଧାୟକ ମୋହନ ମାଝୀ କହିଛନ୍ତି ଯେ, ମୁଁ କୌଣସି ଭାବେ ଦୁଃଖୀ ନୁହେଁ। ମୁଁ କୌଣସି ଅନୈତିକ କାମ କରିନାହିଁ, ଯେ ଅନୁତପ୍ତ ହେବି। ବାଚସ୍ପତି ଠିକ୍ ଭାବେ ଗୃହ କାର୍ଯ୍ୟ ଚଳାଇ ନାହାନ୍ତି ବୋଲି ସେ ଅଭିଯୋଗ ଆଣିଛନ୍ତି। ଅନ୍ୟ ପକ୍ଷରେ ବିଧାୟକ ବିଷ୍ଣୁ ସେଠୀ ମଧ୍ୟ ନିଜ ପ୍ରତିକ୍ରିୟାରେ କହିଥିଲେ ଯେ ବାଚସ୍ପତି ସମ୍ବିଧାନିକ ବିଧିବ୍ୟବସ୍ଥା ଅନୁସାରେ କାର୍ଯ୍ୟ କରୁନାହାନ୍ତି।