ସାତକୋଶିଆରେ ବାଘ ହତ୍ୟା: କୁଆଡ଼େ ଗଲା ବାଘ ଚମଡ଼ା?
ବନ ବିଭାଗ ତଦନ୍ତ ଶିଥିଳ, ନା ବନ୍ଧାହେଲେ ଅଭିଯୁକ୍ତ, ନା ଧରାପଡ଼ିଲା ଛାଲ
ଅନୁଗୁଳ : ଗଲାବର୍ଷ ଡିସେମ୍ବର ମାସରେ ସାତକୋଶିଆ ଅଭୟାରଣ୍ୟରୁ ବାଘ ହତ୍ୟା ଘଟଣାକୁ ଠଉରାଇଥିଲେ ସାତକୋଶିଆ କର୍ତୃପକ୍ଷ। ଦୀର୍ଘ ପ୍ରାୟ ଦେଢ଼ ବର୍ଷ ପରେ ଏ ଘଟଣା ସାମ୍ନାକୁ ଆଣିଥିବାରୁ ବନ ବିଭାଗ ସେତେବେଳେ ବେଶ୍ ବାଃ ବାଃ ସାଉଁଟିଥିଲା। ଘଟଣାକୁ ଇତିମଧ୍ୟରେ ପ୍ରାୟ ଦେଢ଼ ମାସ ହୋଇଗଲାଣି। କିନ୍ତୁ, ବାଘ ହତ୍ୟା ଘଟଣାର ମୁଖ୍ୟ କାର୍ପଟ୍ଦାର ଏଯାବତ୍ ବନ୍ଧା ହୋଇନାହିଁ। କେବଳ ସେତିକି ନୁହେଁ, ବାଘର ମୂଲ୍ୟବାନ ଚମଡ଼ାକୁ ବି ସାତକୋଶିଆ କର୍ତୃପକ୍ଷ ଏଯାବତ୍ ଖୋଜି ବାହାର କରି ନ ଥିବା ବେଳେ ଆନ୍ଧ୍ରକୁ ଫେରାର୍ ହୋଇଯାଇଥିବା ଅଭିଯୁକ୍ତ ପାଖରେ ବି ବନ ବିଭାଗ ପହଞ୍ଚି ପାରିନାହିଁ। ଏଥିରୁ ବନ୍ୟଜନ୍ତୁ ଅପରାଧ ଘଟଣାରେ ବନ ବିଭାଗ କେତେ ସମ୍ବେଦନଶୀଳ, ବନ୍ୟଜନ୍ତୁ ମାମଲାର ତଦନ୍ତ କେତେ ଗତିଶୀଳ ତାହା ଦର୍ଶାଇ ଦେଉଛି।
Sambad is now on WhatsApp
Join and get latest news updates delivered to you via WhatsApp
୨୦୨୧ ମସିହା ଜୁଲାଇ ୧ତାରିଖ ଦିନ ସାତକୋଶିଆ ଅଭୟାରଣ୍ୟ ପମ୍ପାସର ରେଞ୍ଜ୍ କୁମୁରୀ ଗାଁରେ କଲରାପତରିଆ ବାଘକୁ ଶିକାର କରାଯାଇଥିଲା। କୁମୁରୀ ଗାଁର ଦୁଇ ପ୍ରମୋଦ ବିଶ୍ବାଳ ଏବଂ ତାର ପୁଅ ପୁପୁନ୍ ବିଶ୍ବାଳ ଏ କାରନାମା କରିଥିଲେ। ବାଘକୁ ଫାଶରେ ପକାଇ ହତ୍ୟା କରିବା ପରେ ତାର ଚମଡ଼ା ଉତାରି ଘରକୁ ଆଣିଥିଲେ। ପରେ ଚମଡ଼ାକୁ ଅନୁଗୁଳରେ ପାଠ ପଢ଼ୁଥିବା ଜଣେ ଯୁବକ ସହିତ ଡିଲ୍ କରି ବିକ୍ରି କରିଥିଲେ। ବାଘକୁ ମାରିବାଠାରୁ ଚମଡ଼ା ବିକ୍ରି କରିବା ଯାଏ ପୂରା ଘଟଣାରେ ମୋଟ୍ ଚାରି ଜଣଙ୍କ ସମ୍ପୃକ୍ତି ଥିବା ବେଳେ ସାତକୋଶିଆ କର୍ତୃପକ୍ଷ କେବଳ ଅଭିଯୁକ୍ତ ପୁଅ ପୁପୁନ୍କୁ ଗିରଫ କରିଥିଲା। ତା’ର ବାପା ସହିତ ଅନ୍ୟ ତିନି ଜଣ ଅଭିଯୁକ୍ତ କୁଆଡ଼େ ଫେରାର୍ ହୋଇଯାଇଥିଲେ ବୋଲି ବନ ବିଭାଗ ସେତେବେଳେ ସଫେଇ ଦେଇଥିଲା।
ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଲା, ବାଘ ଚମଡ଼ାକୁ ବିକ୍ରି କରିବାକୁ ନେଇଥିବା ଯୁବକ ଜଣ ଅନୁଗୁଳ ସହରରେ ଏକ କମ୍ପ୍ୟୁଟର ଇନ୍ଷ୍ଟିଚ୍ୟୁଟରେ ପାଠ ପଢ଼ୁଥିଲା। ଘଟଣା ପରଠାରୁ ଏ ମୁଖ୍ୟ ଅଭିଯୁକ୍ତ କେଉଁ ଆଡ଼େ ଫେରାର୍ ହୋଇଯାଇଛି। ବିଭାଗୀୟ ତଦନ୍ତ ବେଳେ ଯୁବକ ଜଣକ ଆନ୍ଧ୍ରର ଏକ ସହର ଆଡ଼କୁ ପଳାଇଥିବା ଜଣାପଡ଼ିଥିଲା। କିନ୍ତୁ, ସେବେଠାରୁ ଅଭିଯୁକ୍ତ ଯୁବକର କୌଣସି ପତ୍ତା ମିଳି ନଥିବା ବେଳେ ବାଘ ଚମଡ଼ା କୁଆଡ଼େ ଗଲା ତାହା ବି ଜଣାନାହିଁ। ମାତ୍ର ଜଣେ ଅଭିଯୁକ୍ତକୁ ଗିରଫ କରିବା ପରେ ବନ ବିଭାଗର ତଦନ୍ତ ପୂରା ଶିଥିଳ ହୋଇଛି ବୋଲି ଅଭିଯୋଗ ହେଉଛି।