ରାଜ୍ୟର ୪୪୧ ବାଳିକା ଓ ୧୪୮୫ ବାଳକ ବିଦ୍ୟାଳୟରେ ଶୌଚାଳୟ ନାହିଁ : ବିଧାନସଭାରେ ଶାସକ ଓ ବିରୋଧୀଙ୍କ ଉଦବେଗ
ଭୁବନେଶ୍ବର: ବିଧାନସଭାରେ ଆଜି ସରକାରୀ ସ୍କୁଲଗୁଡିକରେ ଶୌଚାଳୟ ନ ଥିବା ପ୍ରସଙ୍ଗ ଆଲୋଚିତ ହୋଇଛି । ଏ ପ୍ରସଙ୍ଗରେ ଉତ୍ତର ରଖି ଭାରପ୍ରାପ୍ତ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି, ୨୦୧୭-୧୮ ତଥ୍ୟ ଅନୁସାରେ ରାଜ୍ୟର ୫୪୨୯୮ଟି ସରକାରୀ ସ୍କୁଲ ରହିଛି । ସେଥିମଧ୍ୟରୁ ୫୩୭୬୩ ଟି ବିଦ୍ୟାଳୟରେ ବାଳିକା ଶୌଚାଳୟ ଓ ୫୨୫୨୧ଟି ବିଦ୍ୟାଳୟରେ ବାଳକ ଶୌଚାଳୟ ରହିଛି । ମୋଟ ୪୪୧ଟି ବାଳିକା ଓ ୧୪୮୫ ବାଳକ ବିଦ୍ୟାଳୟରେ ଶୌଚାଳୟ ନାହିଁ । ଅନ୍ୟପଟେ ସମସ୍ତ ୫୪୨୯୮ଟି ବିଦ୍ୟାଳୟରେ ପାନୀୟ ଜଳ ବ୍ୟବସ୍ଥା ରହିଛି ।
Sambad is now on WhatsApp
Join and get latest news updates delivered to you via WhatsApp
ସମସ୍ତ ବିଦ୍ୟାଳୟରେ ପାଇଖାନା ତଥା ଉତ୍ତମ ପାନୀୟ ଜଳ ଉପଲବ୍ଧ କରାଇବା ପାଇଁ ସରକାର ପ୍ରତିଶ୍ରୁୁତିବଦ୍ଧ ବୋଲି ସୂଚନା ଦେଇଛନ୍ତି ଭାରପ୍ରାପ୍ତ ମନ୍ତ୍ରୀ । କିଛି ବିଦ୍ୟାଳୟରେ ସ୍ଥାୟୀ ପାନୀୟ ଯୋଗାଣ ବ୍ୟବସ୍ଥା ନଥିବାରୁ ସେଠାରେ ମାଠିଆ ଦ୍ୱାରା ପାନୀୟ ଜଳ ଯୋଗାଇବା ପାଇଁ ନିର୍ଦ୍ଦେଶ ଦେଇଛନ୍ତି ସରକାର । ଯେଉଁ ସବୁ ସରକାରୀ ବିଦ୍ୟାଳୟରେ ଶୌଚାଳୟ ନିର୍ମାଣ ହୋଇପାରିନାହିଁ, ସେଠାରେ ଅସ୍ଥାୟୀ ଶୌଚାଳୟ ତିଆରି କରାଯାଇଛି । ବିଦ୍ୟାଳୟରେ ତୁରନ୍ତ ଶୌଚାଳୟ ଓ ପାନୀୟ ଜଳ ବ୍ୟବସ୍ଥା ଯୋଗାଇବା ପାଇଁ ସରକାରଙ୍କ ପକ୍ଷରୁ ପଞ୍ଚାୟତିରାଜ ଓ ପାନୀୟ ଜଳ ବିଭାଗକୁ ନିର୍ଦ୍ଦେଶ ଦିଆଯାଇଛି ।
ତେବେ ବିଦ୍ୟାଳୟରେ ଶୌଚାଳୟ ନ ଥିବା ନେଇ ଉଦବେଗ ପ୍ରକାଶ କରିଛନ୍ତି ଉଭୟ ଶାସକ ଓ ବିରୋଧୀ ଦଳ ସଦସ୍ୟ । ଏ ପ୍ରସଙ୍ଗରେ ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି । ସରକାରଙ୍କୁ ସମାଲୋଚନା କରିବା ସହ ତାରା କହିଛନ୍ତି ସମସ୍ତ ବିଦ୍ୟାଳୟରେ ଶୌଚାଳୟ ହୋଇ ନପାରିବା ଅତି ଦୁର୍ଭାଗ୍ୟଜନକ ।