ଯାଜପୁର: ଛୁଟିରେ ଥିବା ବ୍ୟାସନଗର ପୌର ଅଧିକାରୀ ପ୍ରଦୀପ କୁମାର ପାଢ଼ୀ ଆଜିଠାରୁ କାର୍ଯ୍ୟରେ ଯୋଗଦେଇଛନ୍ତି। ତାଙ୍କୁ ନିର୍ଯାତନା ଦେବା ଘଟଣାରେ ଜିଲ୍ଲାର ଦୁଇ ବରିଷ୍ଠ ଅଧିକାରୀ (କଳିଙ୍ଗନଗର ଅତିରିକ୍ତ ଜିଲ୍ଲାପାଳ ଓ ଜିଲ୍ଲା ପରିଷଦ କାର୍ଯ୍ୟନିର୍ବାହୀ ଅଧିକାରୀ) ତଦନ୍ତ କରୁଥିବାରୁ ବର୍ତ୍ତମାନ କୌଣସି ପ୍ରତିକ୍ରିୟା ଦେବା ଠିକ୍ ହେବ ନାହିଁ ବୋଲି ସେ କହିଛନ୍ତି। ତେବେ ଘଟଣା ଦିନ ତାଙ୍କୁ ରୁମ୍ ଭିତରୁ ବନ୍ଦ କରି ଅଟକ ରଖିବା, ଜୋରଜବରଦସ୍ତ ଟେଣ୍ଡର ବାତିଲ ଓ ଅନ୍ୟ କାଗଜପତ୍ରରେ ଦସ୍ତଖତ କରାଇବା କଥାକୁ ସେ ସ୍ବୀକାର କରିଛନ୍ତି।
ଅନ୍ୟପକ୍ଷରେ ଏହି ଘଟଣାକୁ ନେଇ ବିଜେଡି-ବିଜେପି ମୁହାଁମୁହିଁ ହୋଇଛନ୍ତି। ଉଭୟ ଦଳ ସାମ୍ବାଦିକ ସମ୍ମିଳନୀ ଡାକି ପରସ୍ପରକୁ ଦୋଷ ଦେଇଛନ୍ତି। ବ୍ୟାସନଗର ବିକାଶରେ ସ୍ଥାନୀୟ ବିଧାୟକ ବାଧକ ସାଜିଥିବା ବିଜେଡି ଆରୋପ ଲଗାଇବା ସହିତ ପୌର ଅଧିକାରୀଙ୍କୁ ନିର୍ଯାତନା ଘଟଣା ମିଥ୍ୟା ଓ ଅଯଥା ରାଜନୀତି କରାଯାଉଥିବା ଅଭିଯୋଗ କରିଛି। ବିଜେପି ମଧ୍ୟ ଏହାର କଡ଼ା ଜବାବ ରଖିଛି। ଯାଜପୁରର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ (ବବି)ଙ୍କ ଇଙ୍ଗିତରେ ବ୍ୟାସନଗରରେ ଅସ୍ଥିରତା ସୃଷ୍ଟି କରିବାକୁ ଅପଚେଷ୍ଟା ଚାଲିଛି। ଏହି ଘଟଣାରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନ ହେଲେ ବିଜେପି ରାଜରାସ୍ତାକୁ ଓହ୍ଲାଇବ ବୋଲି ଚେତାବନୀ ଦେଇଛି। ଏ ସମସ୍ତ ଘଟଣା ଭିତରେ ଜିଲ୍ଲା ପ୍ରଶାସନର ଭୂମିକାକୁ ନେଇ ଏକ ବଡ଼ ପ୍ରଶ୍ନ ଉଠିଛି। ଅଭିଯୋଗ ୨୭ ତାରିଖରୁ ହୋଇଥିବାବେଳେ ଜିଲ୍ଲାପାଳ ଏହି ସମ୍ବେଦନଶୀଳ ଘଟଣାକୁ ୭ଦିନ ଧରି ଚାପି ରଖିବା, ଏ ନେଇ ‘ସମ୍ବାଦ’ରେ ଖବର ପ୍ରକାଶ ପରେ ତତ୍ପରତା ଦେଖାଇବା, ରାଜସ୍ବ ମନ୍ତ୍ରୀ ଓ ଆଇନ ମନ୍ତ୍ରୀଙ୍କ କଡ଼ା ପ୍ରତିକ୍ରିୟା ପରେ ବି ତଦନ୍ତରେ ଶିଥିଳତା ଅଭିଯୁକ୍ତଙ୍କୁ ସୁହାଇଛି। ପୁରୁଣା ସରକାର ପ୍ରତି କିଛି ଉପରିସ୍ଥ ପ୍ରଶାସନିକ ଅଧିକାରୀଙ୍କ ଭିତିରିଆ ସମ୍ପର୍କ ଥିବାରୁ ଏଭଳି ଏକ ସମ୍ବେଦନଶୀଳ ଘଟଣା ଚାପିଦେବାକୁ ଜୋରଦାର ପ୍ରୟାସ କରାଯାଉଥିବା ବିଭିନ୍ନ ମହଲରେ ଚର୍ଚ୍ଚା ହେଉଛି।
କଳିଙ୍ଗନଗର ଅତିରିକ୍ତ ଜିଲ୍ଲାପାଳ ସପନ କୁମାର ନନ୍ଦଙ୍କୁ ତଦନ୍ତ ସମ୍ପର୍କରେ ପଚାରିବାରୁ ସେ କହିଛନ୍ତି, ପୌର କାର୍ଯ୍ୟାଳୟରେ ସେଦିନର ସିସିଟିଭି ଫୁଟେଜ୍ ଯାଞ୍ଚ କରାଯିବା ସହ ପୌରାଧ୍ୟକ୍ଷଙ୍କୁ ଡାକି ପଚରାଉଚରା କରାଯାଇଛି। ଏବେ ଅନ୍ୟ ଅଭିଯୋଗ ଉପରେ ତଦନ୍ତ ଚାଲିଛି। ତଦନ୍ତ ସରିବା ପରେ ଦିନେ ଦୁଇଦିନ ମଧ୍ୟରେ ଜିଲ୍ଲାପାଳଙ୍କୁ ରିପୋର୍ଟ ପ୍ରଦାନ କରାଯିବ।
Advertisment

Sambad is now on WhatsApp
Join and get latest news updates delivered to you via WhatsApp