ଭାରସାମ୍ୟ ହରାଇ ଓଲଟିଲା ଟ୍ରାକ୍ଟର: ଜଣେ ମୃତ, ଜଣେ ଗୁରୁତର

ମୋହନା: ମୋହନା ଥାନା କଳାମେରି ନିକଟରେ ଟ୍ରାକ୍ଟର ଓଲଟି ଡ୍ରାଇଭରଙ୍କ ମୃତ୍ୟୁ ଘଟିଛି। ଏହି ଦୁର୍ଘଟଣାରେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ମୃତକ ହେଉଛନ୍ତି ମୋହନା ଥାନା ପାଟୁପଦର ଗାଁର ୪୫ ବର୍ଷୀୟ ଟୁକୁନା ଦଳାଇ। ଗୁରୁତର ଆହତ ଜଣକ ହେଲେ ସେହି ଗାଁର ୨୨ବର୍ଷୀୟୀ ଲିଶା ନାୟକ।

ବୁଧବାର ବିଳମ୍ୱିତ ରାତିରେ ଏହି ଦୁର୍ଘଟଣା ଗଜପତି ଜିଲ୍ଲା ମୋହନା ଥାନା କଳାମେରି ନିକଟ ରେ ଘଟିଛି। ରାତିରେ କଳମେରୀ ନିକଟସ୍ଥ ଡି.ଡି କଲୋନୀରେ ଟ୍ରାକ୍ଟରରେ ଜମିଚାଷ ଚାଲିଥିଲା। ଟୁକୁନା ଚାଷ କାମ ସାରି ବିଳମ୍ୱିତ ରାତିରେ ଟ୍ରାକ୍ଟର ନେଇ ପାଟୁପଦର ଫେରୁଥିଲେ। କଳାମେରି ନିକଟରେ ଭାରସାମ୍ୟ ହରାଇ ଟ୍ରାକ୍ଟର ରାସ୍ତା କଡକୁ ଓଲଟି ପଡ଼ିଥିଲା ।
ଏଥିରେ ଡ୍ରାଇଭର ଟୁକୁନା ଏବଂ ଶ୍ରମିକ ଏଲିଶା ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ସେମାନଙ୍କୁ ଉଦ୍ଧାର କରି ମୋହନା ମେଡିକାଲରେ ଭର୍ତ୍ତି କରିଥିଲେ । ତେବେ ଡାକ୍ତର ଟୁକୁନାକୁ ମୃତ ଘୋଷଣା କରିଥିଲେ । ଗୁରୁତର ଆହତ ହୋଇଥିବା‌ ଏଲିଶାଙ୍କର ଚିକିତ୍ସା ଚାଲିଥିବା ବେଳେ ମୋହନା ପୋଲିସ୍ ଘଟଣାର ତଦନ୍ତ କରୁଛି।