‘ଓଡ଼ିଶା ମୋ ପରିବାର’ର ଅନନ୍ୟ ପ୍ରୟାସ; ଆୟୋଜନ ହେଲା ଝୋଟି ପ୍ରତିଯୋଗିତା
ଭୁବନେଶ୍ୱର: ବିଭିନ୍ନ କ୍ଷେତ୍ର ଯଥା- କଳା, ସଙ୍ଗୀତ ଏବଂ କ୍ରୀଡ଼ାରେ ପାରଙ୍ଗମ ଥିବା ପ୍ରତିଭାମାନଙ୍କୁ ଲୋକଲୋଚନକୁ ଆଣିବାକୁ ‘ଓଡ଼ିଶା-ମୋ ପରିବାର’ ପ୍ରୟାସ ଜାରି ରଖି ଝୋଟି ଏବଂ ଚିତ୍ରାଙ୍କନ ପ୍ରତିଯୋଗିତା ଭଳି କାର୍ଯ୍ୟକ୍ରମ ଆୟୋଜନ କରିଆସୁଛି । ଏହି କ୍ରମରେ ଆଜି ଭୁବନେଶ୍ୱରସ୍ଥିତ ସିଅନ ଶ୍ରମିକ ବସ୍ତି, ବିଡିଏ କଲୋନିଠାରେ ପ୍ରଥମ ଥରପାଇଁ ଏକ ଝୋଟି ପ୍ରତିଯୋଗିତା ଓଡ଼ିଶା-ମୋ ପରିବାର ଆନୁକୁଲ୍ୟରେ ଆୟୋଜନ କରାଯାଇଥିଲା । ପୁରାତନ କାଳରୁ ମାଣବସା ଗୁରୁବାର ଦିନ ଓଡ଼ିଶାର ଘରେ ଘରେ ମହିଳାମାନେ ଝୋଟି ଆଙ୍କି ମା’ ଲକ୍ଷ୍ମୀଙ୍କୁ ଆବାହନ କରିଥାନ୍ତି । ବର୍ତ୍ତମାନର ଆଧୁନିକ ଯୁଗରେ ଏହି ପରମ୍ପରାକୁ ଉଦ୍ଜୀବିତ କରି ରଖିବାପାଇଁ ‘ଓଡ଼ିଶା-ମୋ ପରିବାର’ର ଏହା ପ୍ରୟାସ ।
Sambad is now on WhatsApp
Join and get latest news updates delivered to you via WhatsApp
ସ୍ଥାନୀୟ ଅଞ୍ଚଳର ପ୍ରାୟ ୩୦ରୁ ଊର୍ଦ୍ଧ୍ୱ ମହିଳା ନିକଟସ୍ଥ ଏକ ସାମୁହିକ ସ୍ଥାନରେ ଉତ୍ସାହର ସହିତ ଝୋଟି ଆଙ୍କି ଏହି ପ୍ରତିଯୋଗିତାରେ ଭାଗ ନେଇଥିଲେ। ପ୍ରତିଯୋଗିତାକୁ ପାରମ୍ପରିକ ଚିତ୍ରକଳା କ୍ଷେତ୍ରରେ ବହୁ ସମ୍ମାନର ଅଧିକାରୀ କୁମାରୀ ପାଢୀଙ୍କ ଦ୍ୱାରା ବଛାଯାଇଥିବା ପ୍ରଥମ ତିନିଜଣଙ୍କୁ ଓଡ଼ିଶା-ମୋ ପରିବାର ଆବାହକ ପୁରଷ୍କାର ଓ ସାର୍ଟିଫିକେଟ୍ ପ୍ରଦାନ କରିଥିଲେ। ଭୁବନେଶ୍ୱରସ୍ଥିତ ୱାର୍ଡ ନଂ- ୧୩ ଅଞ୍ଚଳର କର୍ପୋରେଟର ଇତିଶ୍ରୀ ଦାସ ଉପସ୍ଥିତ ରହି ପ୍ରତିଯୋଗୀମାନଙ୍କୁ ଉତ୍ସାହିତ କରିଥିଲେ । ଏହି ସମସ୍ତ ପ୍ରକ୍ରିୟାକୁ ଓଡ଼ିଶା ମୋ ପରିବାର ଯୁଗ୍ମ ସମ୍ପାଦକ ରୁଦ୍ର ନାରାୟଣ ସାମନ୍ତରାୟ ପରିଚାଳନା କରିଥିଲେ । ଅନ୍ୟମାନଙ୍କ ମଧ୍ୟରେ କଟକ ନଗର ଜୀବନବିନ୍ଦୁ ଜିଲ୍ଲା ସଂଯୋଜକ ରଞ୍ଜନ ବିଶ୍ୱାଳ ଏବଂ କେନ୍ଦ୍ରୀୟ ରେଡ୍ କ୍ରସ୍ର ନିର୍ଦ୍ଦେଶକ ଚନ୍ଦ୍ରିକା ପ୍ରସାଦ ଦାସଙ୍କ ସମେତ ଓଡ଼ିଶା-ମୋ ପରିବାରର ସଦସ୍ୟମାନେ ଉପସ୍ଥିତ ଥିଲେ ।