ସମ୍ବଲପୁର: ‘ମୁଁ ଯମ, ହେଲମେଟ ପିନ୍ଧ ନଚେତ ମୋ ଦ୍ୱାର ଖୋଲା ଅଛି’ କିଛି ଏଭଳି କହି ଆଜି ସମ୍ବଲପୁରରେ ସଚେତନତା ବାର୍ତ୍ତା ବାଣ୍ଟିଛନ୍ତି ଜଣେ ପୁଲିସ କନେଷ୍ଟବଳ | ସମ୍ୱଲପୁର ପୁଲିସ ଜେଲ ଛକଠାରେ ଟ୍ରାଫିକ ସଚେତନତା ସପ୍ତାହରେ ଏଭଳି ଅଭିନବ ଉପାୟରେ ଆଜି ଲୋକଙ୍କୁ ଟ୍ରାଫିକ ସଚେତନ କରାଯାଇଛି | ରାସ୍ତାରେ ଦିନକୁ ଦିନ ବଢୁଥିବା ଦୁର୍ଘଟଣା ଓ ହେଲମେଟ ନ ପିନ୍ଧିବା ଦ୍ଵାରା ବାଇକ ଚାଳକଙ୍କ ମୃତ୍ୟୁ ସଂଖ୍ୟାକୁ ନଜରରେ ରଖି ଏହି ସଚେତନତା କାର୍ଯ୍ୟକ୍ରମ ଆୟୋଜନ କରାଯାଇଥିଲା | ଯମ ଗେଟଅପରେ ନିଜକୁ ସଜ୍ଜିତ କରି କନେଷ୍ଟବଳ ଜଣକ ରାସ୍ତାରେ ବିନା ହେଲମେଟରେ ଯାଉଥିବା ବାଇକ ଚାଳକଙ୍କୁ ଅଟକାଇ ହେଲମେଟ ପିନ୍ଧିବାର ଉପାଦେୟତା ଓ ହେଲମେଟ ନ ପିନ୍ଧିଲେ କିଭଳି ଜୀବନ ଚାଲିଯାଇଥାଏ ସେ ବାବଦରେ ବୁଝାଇଥିଲେ |
Sambad is now on WhatsApp
Join and get latest news updates delivered to you via WhatsApp
ଖାକି ପୋଷାକ ପିନ୍ଧି ଟ୍ରାଫିକ ନିୟନ୍ତ୍ରଣ କରୁଥିବା ଏହି ବେଶରେ ସଜ୍ଜିତ ହୋଇ ଲୋକଙ୍କୁ ସଚେତନ କରିବାକୁ ନେଇ ସହକର୍ମୀ ମଧ୍ୟ ଉତ୍ସାହିତ କରିଥିଲେ | ଯେଉଁମାନେ ରାସ୍ତାରେ ବିନା ହେଲମେଟରେ ଯାଉଥିଲେ ସେମାନଙ୍କ ପାଖରୁ ଫାଇନ ମଧ୍ୟ ଆଦାୟ କରାଯାଇଥିଲା | କନେଷ୍ଟବଳ ଜଣକ କହିଛନ୍ତି ଯେ ଲୋକଙ୍କୁ ସଚେତନ କରିବା ପାଇଁ ଏଭଳି ବେଶରେ ସେ ସଜ୍ଜିତ ହୋଇଛନ୍ତି, ବିନା ହେଲମେଟରେ ମୃତ୍ୟୁର ଦ୍ୱାର କିଭଳି ଖୋଲା ରହିଛି ତାହା ସେ ଲୋକଙ୍କୁ ବୁଝାଇଛନ୍ତି |
ଏଠାରେ ସୂଚନା ଥାଉ କି ୨୦୧୭ ମସିହାରେ ପ୍ରକାଶିତ ରିପୋର୍ଟ ଅନୁସାରେ ପ୍ରତିଦିନ ଭାରତରେ ହେଲମେଟ ନ ପିନ୍ଧିବା ଯୋଗୁଁ ୯୮ ଜଣଙ୍କର ମୃତ୍ୟୁ ଘଟିଥାଏ | ସେହିପରି ୨୦୧୯ରେ ପ୍ରକାଶିତ ରିପୋର୍ଟ ଅନୁସାରେ ହେଲମେଟ ନ ପିନ୍ଧିବା ଯୋଗୁଁ ରାସ୍ତା ଦୁର୍ଘଟଣାରେ ପ୍ରତି ଘଣ୍ଟାରେ ୪ ଜଣଙ୍କର ଜୀବନ ଚାଲିଯାଇଥାଏ |