କୋଭିଡ୍-୧୯ର ଚିକିତ୍ସା ପ୍ରକ୍ରିୟା ବିଷୟରେ ଡାକ୍ତର, ପାରା ମେଡିକାଲ କର୍ମଚାରୀଙ୍କ ପାଇଁ ପ୍ରଶିକ୍ଷଣ ନିର୍ଦେଶ
ମେଡିକାଲ ପାଠ ପଢ଼ୁଥିବା ଛାତ୍ରଛାତ୍ରୀମାନେ ପ୍ରଶିକ୍ଷଣ କାର୍ଯ୍ୟକ୍ରମରେ ସାମିଲ ହେବେ
ପ୍ରଶିକ୍ଷଣ କାର୍ଯ୍ୟକ୍ରମ ପାଇଁ ଦୁଇ ବରିଷ୍ଠ ଆଇଏଏସ୍ ଅଧିକାରୀଙ୍କୁ ଦାୟିତ୍ବ
Sambad is now on WhatsApp
Join and get latest news updates delivered to you via WhatsApp
ଭୁବନେଶ୍ବର : କରୋନା ବା କୋଭିଡ୍-୧୯ର ଚିକିତ୍ସା ପ୍ରକ୍ରିୟା ବିଷୟରେ ଡାକ୍ତର, ମେଜିକାଲ କର୍ମଚାରୀ ଓ ପାରା ମେଜିକାଲ କର୍ମଚାରୀଙ୍କୁ ସ୍ବତନ୍ତ୍ର ତାଲିମ ପ୍ରଦାନ କରାଯିବ। ଏହି ତାଲିମ କାର୍ଯ୍ୟକ୍ରମ ପାଇଁ ରାଜ୍ୟର ଦୁଇଜଣ ବରିଷ୍ଠ ଆଇଏଏସ୍ ଅଧିକାରୀଙ୍କୁ ସରକାର ଦାୟିତ୍ବ ପ୍ରଦାନ କରିଛନ୍ତି। ଏ ନେଇ ଆଜି ସାଧାରଣ ପ୍ରଶାସନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏହି ପ୍ରଶିକ୍ଷଣ କାର୍ଯ୍ୟକ୍ରମରେ ରାଜ୍ୟରେ ଥିବା ସମସ୍ତ ମେଡିକାଲ୍ କଲେଜ୍ରେ ଏମ୍ବିବିଏସ୍ ପାଠ ପଢ଼ୁଥିବା ୭ମ, ୮ମ ଓ ୯ମ ସେମିଷ୍ଟର ବର୍ଗର ଛାତ୍ରଛାତ୍ରୀମାନଙ୍କୁ ବି ସାମିଲ କରିବା ନେଇ ମୁଖ୍ୟ ଶାସନ ସଚିବ ନିର୍ଦ୍ଦେଶନାମା ଜାରି କରିଛନ୍ତି।
ବିଜ୍ଞପ୍ତି ଅନୁଯାୟୀ, କରୋନା ରୋଗର ଲକ୍ଷଣ, ଏହାର ଚିକିତ୍ସା ପଦ୍ଧତି ଓ ବିଶେଷକରି ରୋଗୀକୁ ଚିକିତ୍ସା କଲାବେଳେ କି କି ଧ୍ୟାନ ଦେବାକୁ ପଡ଼ିବ ସେଥିପାଇଁ ଚିକିତ୍ସା ସେବା ଯୋଗାଉଥିବା ସମସ୍ତ ସରକାରୀ ଓ ଘରୋଇ ଡାକ୍ତରଖାନାର ଡାକ୍ତର ଓ ମେଡିକାଲ କର୍ମଚାରୀଙ୍କୁ ତାଲିମ ଦେବା ପାଇଁ ସରକାର ନିଷ୍ପତ୍ତି ନେଇଛନ୍ତି। ପ୍ରଶିକ୍ଷଣ ପରେ ଆବଶ୍ୟକ ମୁତାବକ ଯେ କୌଣସି ସ୍ଥାନକୁ ସ୍ବାସ୍ଥ୍ୟ କର୍ମୀଙ୍କୁ ପଠାଇବାକୁ ସରକାର ଲକ୍ଷ୍ୟ ରଖିଛନ୍ତି। ପ୍ରାଥମିକ ପର୍ଯ୍ୟାୟରେ ସରକାରୀ ଡାକ୍ତର ଓ କର୍ମଚାରୀଙ୍କୁ ତାଲିମ ଦିଆଯିବ। ମହିଳା ଓ ଶିଶୁ ବିକାଶ ତଥା ଶ୍ରମ ଓ ଇଏସ୍ଆଇ ବିଭାଗ ପ୍ରମୁଖ ଶାସନ ସଚିବ ଅନୁ ଗର୍ଗ ଓ ଓପେପା ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଥିବା ଭୂପିନ୍ଦର ସିଂହ ପୁନିଆଙ୍କୁ ଏହି ପ୍ରଶିକ୍ଷଣ କାର୍ଯ୍ୟକ୍ରମ ପାଇଁ ଦାୟିତ୍ବ ମିଳିଛି।