ସୁରକ୍ଷା ସମ୍ପର୍କିତ କାର୍ଯ୍ୟ ପାଇଁ ପୁରୀ-ଜୟନଗର ଏକ୍ସପ୍ରେସ ବାତିଲ୍ ହେବ, ପୁରୀ-ପାଟନା ଓ ଏର୍ଣ୍ଣାକୁଲମ-ପାଟନାର ମାର୍ଗ ବଦଳିବ
ମାର୍ଚ୍ଚ ୧୭ରୁ କାର୍ଯ୍ୟକାରୀ
ଭୁବନେଶ୍ବର : ପୂର୍ବ କେନ୍ଦ୍ରୀୟ ରେଳପଥର ଦାନାପୁର ରେଳମଣ୍ଡଳ ଅନ୍ତର୍ଗତ କିଉଲ ଷ୍ଟେସନଠାରେ ସୁରକ୍ଷା ସମ୍ବନ୍ଧୀୟ ଆଧୁନିକୀକରଣ କାର୍ଯ୍ୟ ପାଇଁ ପୂର୍ବତଟ ରେଳପଥକୁ ଆସୁଥିବା ଏବଂ ଏହାର ପରିସୀମାରୁ ଛାଡ଼ିବାକୁ ଥିବା କେତେକ ଟ୍ରେନ ବାତିଲ ହୋଇଛି। ଆଉ କିଛି ଟ୍ରେନ୍ର ମାର୍ଗ ପରିବର୍ତ୍ତନ ହୋଇ ଚଳାଚଳ କରିବାକୁ ରେଳ ମନ୍ତ୍ରଣାଳୟ ପକ୍ଷରୁ ସ୍ଥିର କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ ପୁରୀ-ଜୟନଗର-ପୁରୀ ଏକ୍ସପ୍ରେସ(୧୮୪୧୯/୧୮୪୫୦) ମାର୍ଚ୍ଚ ୧୯ ଓ ୨୬ ତାରିଖରେ ପୁରୀଠାରୁ ଏବଂ ମାର୍ଚ୍ଚ ୨୧ ଓ ୨୮ ତାରିଖରେ ଜୟନଗରଠାରୁ ଉଭୟ ଦିଗରୁ ବାତିଲ ରହିବ। ଆଦ୍ରା-ଗୋମୋ-ଗୟା-ପାଟନା ମାର୍ଗ ଦେଇ ଚଳାଚଳ କରିବାକୁ ଥିବା ପୁରୀ-ପାଟନା-ପୁରୀ ଏକ୍ସପ୍ରେସ(୧୮୪୪୯/୧୮୪୫୦) ପୁରୀଠାରୁ ମାର୍ଚ୍ଚ ୨୩ ଓ ୩୦ ତାରିଖ ଏବଂ ପାଟନାଠାରୁ ମାର୍ଚ୍ଚ ୨୫ ଓ ଏପ୍ରିଲ ପହିଲା ଦିନ ଏହାର ସ୍ଥିରୀକୃତ ମାର୍ଗ ବର୍ଣ୍ଣପୁର-ଆସନସୋଲ-ଚିତ୍ତରଞ୍ଜନ-ଜଶିଡ଼ିହ-କିଉଲ-ବକ୍ତିଆରପୁର ମାର୍ଗରେ ନଯାଇ ପରିବର୍ତ୍ତିତ ମାର୍ଗ ଭାୟା ଆଦ୍ରା-ଗୋମୋ-ଗୟା ମାର୍ଗ ଦେଇ ଚଳାଚଳ କରିବ। ଏର୍ଣ୍ଣାକୁଲମ-ପାଟନା-ଏର୍ଣ୍ଣାକୁଲମ ଏକ୍ସପ୍ରେସ(୨୨୬୪୩/୨୨୬୪୪) ମାର୍ଚ୍ଚ ୧୭ରୁ ୩୧ ତାରିଖ ମଧ୍ୟରେ ଏର୍ଣ୍ଣାକୁଲମଠାରୁ ଓ ପାଟନାଠାରୁ ମାର୍ଚ୍ଚ ୧୯ରୁ ଏପ୍ରିଲ ୨ ତାରିଖ ମଧ୍ୟରେ ଏହାର ସ୍ଥିରୀକୃତ ମାର୍ଗ ଆସନସୋଲ-ଚିତ୍ତରଞ୍ଜନ-ଜଶିଡ଼ିହ-କିଉଲ-ବକ୍ତିଆରପୁର ମାର୍ଗରେ ନ ଯାଇ ପରିବର୍ତ୍ତିତ ମାର୍ଗ ଭାୟା ରାଜବେରା-ଗୋମୋ-ଗୟା ମାର୍ଗରେ ଉଭୟ ପାର୍ଶ୍ୱରୁ ଚଳାଚଳ କରିବ। ବର୍ଦ୍ଧମାନ-ରାମପୁର ହାଟ-ସାହିବ ଗଞ୍ଜ ମାର୍ଗ ଦେଇ ଚଳାଚଳ କରିବାକୁ ଥିବା ଯଶୋବନ୍ତପୁର-ଭାଗଲପୁର-ଯଶୋବନ୍ତପୁର ଏକ୍ସପ୍ରେସ(୧୨୨୫୩/୧୨୨୫୪) ଉଭୟ ଯଶୋବନ୍ତପୁର ଓ ଭାଗଲପୁରଠାରୁ ଫେବ୍ରୁଆରି ୨୬ରୁ ଏପ୍ରିଲ ୨ ମଧ୍ୟରେ ଆସନସୋଲ-ଜଶିଡ଼ିହ-କିଉଲ-ଜମଲପୁର ମାର୍ଗ ପରିବର୍ତ୍ତେ ବର୍ଦ୍ଧମାନ-ରାମପୁର ହାଟ-ସାହିବ ଗଞ୍ଜ ମାର୍ଗ ଦେଇ ଚଳାଚଳ କରିବ।