୭ ଆକ୍ରାନ୍ତଙ୍କ ଗସ୍ତ ବିବରଣୀ ଦେଲେ ରାଜ୍ୟ ସରକାର : ୨ କୋଲକାତା ଫେରନ୍ତା, ସଂପର୍କୀୟଙ୍କ ସଂସ୍ପର୍ଶରେ ଆସି ୫ ସଂକ୍ରମିତ
ଘରେ ଥାଇ ବି ସଂକ୍ରମଣ, ସଂପର୍କୀୟ ଛାଡ଼ିଦେଲେ ଭୂତାଣୁ
ଭୁବନେଶ୍ୱର: ରାଜ୍ୟ ସରକାର ଆଜି ୭ ଜଣ କରୋନା ଆକ୍ରାନ୍ତଙ୍କ ଗସ୍ତ ବିବରଣୀ ସଂପର୍କରେ ସୂଚନା ଦେଇଛନ୍ତି । ରାଜ୍ୟର ୮୪, ୮୫, ୮୬, ୮୭, ୮୮, ୮୯ ଓ ୯୦ତମ କରୋନା ଆକ୍ରାନ୍ତଙ୍କ ସଂପର୍କରେ ସୂଚନା ଜାରି କରିଛି ରାଜ୍ୟ ସୂଚନା ଓ ଲୋକ ସଂପର୍କ ବିଭାଗ । ଯାଜପୁର, ଭଦ୍ରକ ଓ ବାଲେଶ୍ୱର ଜିଲ୍ଲାର ଏହି କରୋନା ସଂକ୍ରମିତ ବ୍ୟକ୍ତିମାନେ ୫ ଜଣ ସଂପର୍କୀୟଙ୍କ ଦ୍ୱାରା ସଂକ୍ରମିତ ହୋଇଥିବା ବେଳେ କେବଳ ୨ ଜଣ କୋଲକାତାରୁ ସଂକ୍ରମଣ ନେଇ ଆସିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ସୂଚନା ଓ ଲୋକ ସଂପର୍କ ବିଭାଗ ପକ୍ଷରୁ ଟୁଇଟ ଜରିଆରେ କୁହାଯାଇଛି ଯେ, ରାଜ୍ୟର ୭୪ ନମ୍ବର କରୋନା ଆକ୍ରାନ୍ତଙ୍କ ସଂପର୍କୀୟ ହେଉଛନ୍ତି ୮୪ ନମ୍ବର କରୋନା ଆକ୍ରାନ୍ତ । ଯାଜପୁର ଜିଲ୍ଲାର ଦଶରଥପୁର ବ୍ଲକ ଅନ୍ତର୍ଗତ କୋଡେଇବାଟି ଗାଁର ୭୦ ବର୍ଷୀୟ ମହିଳା ଜଣକ ଗତ ମାର୍ଚ୍ଚ ୨୨ରେ ଲକଡାଉନ ଆରମ୍ଭ ହେବା ପରେ ଏପ୍ରିଲ ୨୦ ଯାଏଁ ବାହାରକୁ ଯାଇ ନ ଥିଲେ । ସେ ଘରେ ଥିଲେ । ଅସୁସ୍ଥ ଅନୁଭବ କରିବା ପରେ ଏପ୍ରିଲ ୨୧ରୁ ଏପ୍ରିଲ ୨୩ ଯାଏଁ ସରକାରୀ କ୍ୱାରେଣ୍ଟାଇନରେ ଥିଲେ । କିନ୍ତୁ ତାଙ୍କର ନମୁନା ଏପ୍ରିଲ ୨୩ରେ ପଜିଟିଭ ରିପୋର୍ଟ ଆସିବା ପରେ ତାଙ୍କୁ କଳିଙ୍ଗ ନଗରସ୍ଥିତ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି ।
Travel History of #Covid19 Patients
Case No: 84, 85, 86 & 87
Contact tracing and followup action is being done. pic.twitter.com/HvGbSnbAvA
— I & PR Department, Odisha (@IPR_Odisha) April 25, 2020
ରାଜ୍ୟର ୭୩ ନମ୍ବର କରୋନା ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିଲେ ୮୫ ନମ୍ବର କରୋନା ଆକ୍ରାନ୍ତ । ଭଦ୍ରକ ଜିଲ୍ଲା ବାସୁଦେବପୁର ଅଞ୍ଚଳର ଏହି ୨୧ ବର୍ଷିଅ ଯୁବକ ଯାଜପୁର ସଦର ବ୍ଲକ ଅନ୍ତର୍ଗତ ଯାହାଁପୁର ଦେଇ କୋଲକାତାରୁ ଫେରିଥିଲେ । ସେ କୋଲକାତାର ବଡ଼ବଜାରରୁ ଏକ ଭଡା ଗାଡ଼ିରେ ମାର୍ଚ୍ଚ ୨୯ରେ ଆସିଥିଲେ । ସାଥୀରେ ଥିଲେ ତାଙ୍କ ବାପା ଓ ଅନ୍ୟ ଜଣେ ସହଯାତ୍ରୀ । ମାର୍ଚ୍ଚ ୨୯ରୁ ଏପ୍ରିଲ ୨୩ ଯାଏଁ ସେ ବାସୁଦେବପୁରସ୍ଥିତ ଘରେ ହୋମ କ୍ୱାରେଣ୍ଟାଇନରେ ଥିଲେ । ତାଙ୍କୁ ଏପ୍ରିଲ ୨୧ରୁ ୨୩ ଯାଏଁ ସରକାରୀ କ୍ୱାରେଣ୍ଟାଇନରେ ରଖାଯାଇଥିଲା । କିନ୍ତୁ ଏପ୍ରିଲ ୨୩ରେ ନମୁନା ରିପୋର୍ଟ ପଜିଟିଭ ଆସିବା ପରେ ତାଙ୍କୁ କଳିଙ୍ଗ ନଗର କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା ।
ରାଜ୍ୟର ୭୩ ନମ୍ବର କରୋନା ଆକ୍ରାନ୍ତଙ୍କ ସଂପର୍କୀୟ ହେଉଛନ୍ତି ୮୬ ଓ ୮୭ ନମ୍ବର କରୋନା ଆକ୍ରାନ୍ତ । ବାସୁଦେବପୁର ଅଞ୍ଚଳର ୪୮ ବର୍ଷୀୟ ମହିଳା ଓ ୮୦ ବର୍ଷୀୟ ମହିଳା ମାର୍ଚ୍ଚ ୨୨ରେ ଲକଡାଉନ ଆରମ୍ଭ ହେବା ପରେ ବାହାରକୁ ଯାଇ ନଥିଲେ । ସେ ଏପ୍ରିଲ ୨୦ ଯାଏଁ ଘରେ ଥିଲେ। ସେମାନେ ଏପ୍ରିଲ ୨୧ରୁ ୨୩ ଯାଏଁ ସରକାରୀ କ୍ୱାରେଣ୍ଟାଇନରେ ଥିଲେ । ତାଙ୍କର ନମୁନା ଏପ୍ରିଲ ୨୩ରେ ପଜିଟିଭ ଚିହ୍ନଟ ହୋଇଥିଲା । ଏହା ପରେ ତାଙ୍କୁ କଳିଙ୍ଗ ନଗରସ୍ଥିତ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି ।
Travel History of #Covid19 Patients
Case No:
88, 89 & 90Contact tracing and followup action is being done. pic.twitter.com/Wil1omAp6U
— I & PR Department, Odisha (@IPR_Odisha) April 25, 2020
ସେହିପରି ବାଲେଶ୍ୱର ଜିଲ୍ଲାର .ନେଳିଆବାଗର ୩୬ ବର୍ଷିଅ ଯୁବକ ତଥା ରାଜ୍ୟର ୮୮ ନମ୍ବର କରେନା ଆକ୍ରାନ୍ତ ଏବଂ ୫୫ ବର୍ଷୀୟ ମହିଳା ତଥା ରାଜ୍ୟର ୮୯ ନମ୍ବର କରୋନା ଆକ୍ରାନ୍ତ ୬୧ ନମ୍ବର କରୋନା ଆକ୍ରାନ୍ତଙ୍କ ସଂପର୍କୀୟ ଅଟନ୍ତି । ସେମାନେ ମାର୍ଚ୍ଚ ୨୨ରେ ଲକଡାଉନ ଆରମ୍ଭ ହେବା ପରଠାରୁ ବାହାରକୁ ଯାଇ ନ ଥିଲେ । ସେମାନେ ଏପ୍ରିଲ ୨୩ରେ କରୋନା ଭାଇରସ ପଜିଟିଭ ଚିହ୍ନଟ ହେବା ପରେ ତାଙ୍କୁ କଟକସ୍ଥିତ ଅଶ୍ୱିନୀ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା ।
କୋଲକାତା ଫେରନ୍ତା ଭଦ୍ରକ ଜିଲ୍ଲାର ବାସୁଦେବପୁର ବ୍ଲକ ଅନ୍ତର୍ଗତ ବ୍ରାହ୍ମଣୀଶାସନ ଗାଁର ୪୩ ବର୍ଷିଅ ଯୁବକ ହେଉଛନ୍ତି ରାଜ୍ୟର ୯୦ତମ କରୋନା ଆକ୍ରାନ୍ତ । ସେ କୋଲକାତାର ଖରିଦପୁର ଠାରୁ ଏପ୍ରିଲ ୧୬ ସକାଳ ୯ଟାରେ ବାହାରିଥିଲେ । ଗାଁକୁ ଅପରାହ୍ନ ୧ଟା ୩୦ରେ ପହଞ୍ଚିଥିଲେ । ସେ ଏପ୍ରିଲ ୧୬ରୁ ୨୦ ଯାଏଁ ହୋମ କ୍ୱାରେଣ୍ଟାଇନରେ ରହିଥିଲେ । ଏପ୍ରିଲ ୨୧ ରୁ ୨୩ ଯାଏଁ ସରକାରୀ କ୍ୱାରେଣ୍ଟାଇନରେ ରହିଥିଲେ । ଏପ୍ରିଲ ୨୩ କରୋନା ପଜିଟିଭ ଚିହ୍ନଟ ହେବା ପରେ ଏପ୍ରିଲ ୨୪ରେ ତାଙ୍କୁ ଅଶ୍ୱିନୀ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।