ଭୁବନେଶ୍ୱର: ରାଜ୍ୟ ସରକାର ଆଜି ଭଦ୍ରକର ୪ ଜଣ କରୋନା ଆକ୍ରାନ୍ତଙ୍କ ଗସ୍ତ ବିବରଣୀ ସଂପର୍କରେ ସୂଚନା ଦେଇଛନ୍ତି । ଏମାନେ ହେଲେ ରାଜ୍ୟର ୯୧ ରୁ ୯୪ ନମ୍ବର କରୋନା ଆକ୍ରାନ୍ତ । ରାଜ୍ୟର ୪୧ ନମ୍ବର କରୋନା ଆକ୍ରାନ୍ତ କୋଲକାତାର ବେଲଗଛଲା ଠାରୁ ଏକ ବାଇକରେ ଆସି ଜଣେ ସାଙ୍ଗଙ୍କ ସହିତ ଏପ୍ରିଲ ୧୮ ତାରିଖରେ ଫେରିଥିଲେ । ୪୦ ବର୍ଷିଅ ଯୁବକଙ୍କ ଘର ଭଦ୍ରକ ଜିଲ୍ଲାର ତିହିଡି ବ୍ଲକ ଅନ୍ତର୍ଗତ ମଠସାହି ଗାଁରେ । ସେ ସାଙ୍ଗଙ୍କ ଘରେ ୧୮ରୁ ୧୯ ମଧ୍ୟରେ ଭଦ୍ରକରେ ଥିଲେ । ଏପ୍ରିଲ ୨୦ରେ ସାଇକେଲରେ ଘରକୁ ଆସିଥିଲେ । ଏହା ପରେ ତାଙ୍କୁ ସରକାରୀ କ୍ୱାରେଣ୍ଟାଇନରେ ରଖାଯାଇଥିଲା । ତାଙ୍କ ପାଖରେ କୌଣସି ଲକ୍ଷଣ ନ ଥିଲେ ବି ଏପ୍ରିଲ ୨୪ରେ ପଜିଟିଭ ଚିହ୍ନଟ ହୋଇଥିଲେ । ତାଙ୍କୁ ଅଶ୍ୱିନୀ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ତିହିଡି ବ୍ଲକର କାନପୁର ଗାଁର ପୀରହାଟ ନିବାସୀ ୪୧ ବର୍ଷିଅ ଯୁବକ ହେଉଛନ୍ତି ରାଜ୍ୟର ୯୨ ନମ୍ବର କରୋନା ଆକ୍ରାନ୍ତ । ସେ ଯାଜପୁର ଜିଲ୍ଲାର କୁଆଖିଆ ଅଞ୍ଚଳର ସାହିଖଣ୍ଡ ଠାରେ ଏକ ଇଟା ଭାଟିରେ କାମ କରୁଥିଲେ । ଏପ୍ରିଲ ୧୨ରେ ୧୦ ଜଣ ଯାତ୍ରୀଙ୍କ ସହ ଏକ ଅଟୋରେ ଘରକୁ ଆସିଥିଲେ । ଏପ୍ରିଲ ୧୩ରୁ ୨୩ ଯାଏଁ ହୋମ କ୍ୱାରେଣ୍ଟାଇନରେ ଥିଲେ । ଏପ୍ରିଲ ୨୪ରେ କରୋନା ପଜିଟିଭ ଚିହ୍ନଟ ହେବା ପରେ ତାଙ୍କୁ ଅଶ୍ୱିନୀ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
#ଆସିଲା_ଆକ୍ରାନ୍ତଙ୍କ_ଟ୍ରାଭେଲ_ହିଷ୍ଟ୍ରି
ସରକାର ଦେଲେ କରୋନା ଆକ୍ରାନ୍ତ ନଂ ୯୧, ୯୨, ୯୩ ଏବଂ ୯୪ଙ୍କର ଗସ୍ତ ବିବରଣୀ । #OdishaFightsCorona #COVID19 #Odisha @IPR_Odisha @HFWOdisha pic.twitter.com/QpqgpdBwkQ— Sambad (ସମ୍ବାଦ) (@sambad_odisha) April 25, 2020
ରାଜ୍ୟର ୯୩ ନମ୍ବର କରୋନା ଆକ୍ରାନ୍ତ ମଧ୍ୟ କୋଲକାତାର ବୋହୂବଜାର ଠାରୁ ମାର୍ଚ୍ଚ ୨୭ରେ ଫେରିଥିଲେ । ତାଙ୍କ ସହିତ ତାଙ୍କ ବାପା ଓ ଅନ୍ୟ ୬ ଜଣ ମଧ୍ୟ ଥିଲେ । ୨୯ ବର୍ଷିଅ ଯୁବକ ବାଇକ ମାଧ୍ୟମରେ ମାର୍ଚ୍ଚ ୨୮ରେ ଘରକୁ ପହଞ୍ଚିଥିଲେ । ମାର୍ଚ୍ଚ ୨୮ରୁ ଏପ୍ରିଲ ୨୪ ଯାଏଁ ଧାମନଗର ବ୍ଲକ ଅନ୍ତର୍ଗତ ଖଡିପଦାର ଗାଁରେ ହୋମ କ୍ୱାରେଣ୍ଟାଇନରେ ଥିଲେ । ଏପ୍ରିଲ ୨୪ରେ ସେ କରୋନା ପଜିଟିଭ ଚିହ୍ନଟ ହେବା ପରେ ତାଙ୍କୁ କଟକସ୍ଥିତ ଅଶ୍ୱିନୀ କୋଭିଡ ହସ୍ପିଟାଲ ସ୍ଥାନାନ୍ତର କରାଯାଇଛି ।
ସେହିପରି ରାଜ୍ୟର ୯୪ ନମ୍ବର କରୋନା ଆକ୍ରାନ୍ତ କୋଲକାତାରୁ ଫେରିଥିଲେ । ଧାମନଗର ବ୍ଲକର କଲ୍ୟାଣୀ ଗାଁର ୨୪ ବର୍ଷିଅ ଯୁବକ ଏପ୍ରିଲ ୧୬ରୁ ୨୦ ଯାଏଁ ଘରେ ଥିଲେ । ସେ ଏପ୍ରିଲ ୨୧ରେ ହୋମ କ୍ୱାରେଣ୍ଟାଇନରେ ଥିଲେ । ଏପ୍ରିଲ ୨୪ରେ ପଜିଟିଭ ଚିହ୍ନଟ ହେବା ପରେ ତାଙ୍କୁ ଅଶ୍ୱିନୀ କୋଭିଡ ହସ୍ପିଟାଲରେ ଭର୍ତ୍ତି କରାଯାଇଛି ।