ପୁରୀ : କଠିନ ଅଧ୍ୟବସାୟ ଓ ନିଷ୍ଠା ଆଗରେ ଦାରିଦ୍ର୍ୟ ହାର ମାନିଥାଏ। ଏ କଥାକୁ ପ୍ରମାଣ କରି ଦେଖାଇଛନ୍ତି ଚଳିତ ବର୍ଷ ଯୁକ୍ତ ଦୁଇ କଳା ପରୀକ୍ଷାରେ ଶ୍ରେଷ୍ଠ ଦଶ ଜଣଙ୍କ ମଧ୍ୟରେ ସ୍ଥାନ ପାଇଥିବା ପୁରୀର ସାମନ୍ତ ଚନ୍ଦ୍ରଶେଖର (ଏସ୍ସିଏସ୍) ମହାବିଦ୍ୟାଳୟର ଛାତ୍ରୀ ଶକୁନ୍ତଳା ନାୟକ। ପୁରୀ ସହରର ଟ୍ରଲି ଚାଳକ ଘନ ନାୟକଙ୍କ ଝିଅ ଶକୁନ୍ତଳା କଳାରେ ୫୨୩ ନମ୍ବର ରଖି ଏବେ ଅନ୍ୟମାନଙ୍କ ପାଇଁ ଆଦର୍ଶ ପାଲିଟିଛନ୍ତି। ତେବେ ଏଥିପାଇଁ ତାଙ୍କୁ କଠିନ ପରିସ୍ଥିତିର ସମ୍ମୁଖୀନ ହେବାକୁ ପଡ଼ିଛି। ତାଙ୍କ ମା’ ମଧ୍ୟ ପର ଘରେ ବାସନ ମାଜନ୍ତି। ଶକୁନ୍ତଳା ନିଜେ ମଧ୍ୟ ପିଲାଙ୍କୁ ଟ୍ୟୁସନ୍ କରି ପାଠପଢ଼ନ୍ତି। ବାପା, ମା’ଙ୍କ ସ୍ୱଳ୍ପ ରୋଜଗାରରେ ତାଙ୍କ ସାନ ଭଉଣୀ ଓ ଭାଇ ପାଠ ପଢ଼ନ୍ତି।
Sambad is now on WhatsApp
Join and get latest news updates delivered to you via WhatsApp
ଶକୁନ୍ତଳାଙ୍କ ପରିବାର ପୁରୀ ସହରର ସିଦ୍ଧ ମହାବୀର ଅଞ୍ଚଳ କୁମୁଟିପାଟଣା ଅଞ୍ଚଳରେ ଏକ ଘରେ ଭଡ଼ାରେ ରହନ୍ତି। ପିଲାଙ୍କୁ ଭଲ ମଣିଷ କରିବା ଓ ଶିକ୍ଷା ଦେବା ପାଇଁ ବାପା ଘନ ନାୟକ ଓ ମା’ ବାସନ୍ତି ନିଜ ପୈତୃକ ଗ୍ରାମ ବୀରପ୍ରତାପପୁର ଅଞ୍ଚଳର ଦାମୋଦରପୁର ଛାଡ଼ି ପୁରୀରେ ରହୁଛନ୍ତି। ଶକୁନ୍ତଳା ପିଲାଟି ଦିନରୁ ମେଧାବୀ ବୋଲି ଶିକ୍ଷକମାନେ କହନ୍ତି। ମ୍ୟାଟ୍ରିକ ପରୀକ୍ଷାରେ ଶକୁନ୍ତଳା ୮୬ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହେବା ପରେ ଉଚ୍ଚଶିକ୍ଷା ଦେବା ପାଇଁ ଅର୍ଥାଭାବ ଥିବାରୁ ବାପା ଚିନ୍ତାରେ ପଡିଯାଇଥିଲେ। ଶକୁନ୍ତଳା ଏସ୍ସିଏସ୍ କଲେଜରେ କଳାରେ ନାମ ଲେଖାଇଥିଲେ। ଏବେ ସେ ୮୭ ପ୍ରତିଶତ ନମ୍ବର ରଖିଛନ୍ତି। ଶକୁନ୍ତଳା ଦୈନିକ ୬ ଘଣ୍ଟାରୁ ଅଧିକ ପାଠ ପଢୁଥିଲେ। ସେ ଘରର ବଡ ଝିଅ ହୋଇଥିବା ବେଳେ ସାନ ଭଉଣୀ ଏବେ ଦଶମ ଓ ସାନ ଭାଇ ସପ୍ତମ ଶ୍ରେଣୀରେ ପଢୁଛନ୍ତି। ସଫଳତା ପାଇଁ ସେ ତାଙ୍କ ବାପା, ମା ଓ କୋଚିଂ ସେଣ୍ଟରର ଅଧ୍ୟାପକମାନଙ୍କୁ ଶ୍ରେୟ ଦେଇଛନ୍ତି। ସେ ଜଣେ ଶିକ୍ଷକ ହେବାର ଲକ୍ଷ୍ୟ ରଖିଛନ୍ତି ।