ଛଛାନପାଲିରେ ଟ୍ରକ୍ ଧକ୍କାରେ ଯୁବକ ମୃତ

ଧମା: ସମ୍ବଲପୁର-ସୋନପୁର ୧୫ ନଂ ରାଜ୍ୟ ରାଜପଥ ଛଛାନପାଲି ଠାରେ ମଙ୍ଗଳବାର ରାତି ଟ୍ରକ୍‌ ଧକ୍କାରେ ଜଣେ ଯୁବକଙ୍କର ମୃତ୍ୟୁ ଘଟିଥିବା ବେଳେ ଜଣେ ଆହତ ହୋଇଛନ୍ତି। ମୃତକ ଜଣକ ହେଉଛନ୍ତି ଛଛାନପାଲିର ଲକ୍ଷ୍ମୀନାରାୟଣ ପଧାନ(୩୬) ଏବଂ ଆହତ ହୋଇଥିବା ବ୍ୟକ୍ତି ହେଉଛନ୍ତି ଅକ୍ଷୟ ବରାଳ। ସୂଚନା ଅନୁଯାୟୀ, ଉଭୟେ ଏକ ବାଇକ୍‌ରେ ଗାଁରୁ ସାହାସପୁର ଆଡ଼କୁ ଆସୁଥିବା ବେଳେ ରାତି ୯ଟା ୩୦ ପାଖାପାଖି ଧମା ପାର୍ଶ୍ବରୁ ଆସୁଥିବା ଏକ ଟ୍ରକ୍‌(ଓଡି ୧୭ଏ ୫୮୫୫) ତାଙ୍କୁ ପଛପଟୁ ଧକ୍କା ଦେଇଥିଲା।

ଗାଡ଼ି ଧକ୍କା ଦେବା ପରେ ପାଖାପାଖି ୨ ଶହ ମିଟର ପର୍ଯ୍ୟନ୍ତ ଉକ୍ତ ବାଇକ୍‌କୁ ଘୋଷାଡ଼ି ନେଇଥିଲା। ଫଳରେ ଘଟଣାସ୍ଥଳରେ ଲକ୍ଷ୍ମୀନାରାୟଣଙ୍କ ମୃତ୍ୟୁ ଘଟିଥିବା ବେଳେ ଅକ୍ଷୟଙ୍କୁ ଉଦ୍ଧାର କରି ସ୍ଥାନୀୟ ଲୋକେ ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ଅନ୍ୟପଟେ ଟ୍ରକ୍‌ ଘଟଣାସ୍ଥଳରେ ଛାଡ଼ି ଚାଳକ ଫେରାର୍‌ ହୋଇଯାଇଥିବା ବେଳେ ଉତ୍ୟକ୍ତ ଲୋକେ ଟ୍ରକ୍‌କୁ ଜାଳି ଦେଇଥିଲେ। ଅନ୍ୟପଟେ ଟ୍ରକ୍‌ରେ ଥିବା ହେଲ୍‌ପର୍‌କୁ ଲୋକେ କାବୁ କରି ପୁଲିସର ଜିମା ଦେଇଥିଲେ। ଖବର ଲେଖାହେବା ଯାଏ(ରାତି ୧୧ଟା) ଲୋକେ ରାସ୍ତା ଉପରେ ଲକ୍ଷ୍ମୀନାରାୟଣଙ୍କ ମୃତଦେହ ରଖି ରାସ୍ତାରୋକ କରିଛନ୍ତି। ଫଳରେ ଯାତାୟାତ ବାଧାପ୍ରାପ୍ତ ହୋଇଛି। ରାସ୍ତାର ଉଭୟ ପାର୍ଶ୍ବରେ ବହୁ ସଂଖ୍ୟାରେ ଗାଡ଼ି ଅଟକି ରହିଛି।