ଦାଦାବଟି ମାଗି ଦୁଇ ଗିରଫ
ପୁରୀ : ପୁରୀ ବ୍ରହ୍ମଗିରି ରାସ୍ତା ମଶାଣୀଚଣ୍ଡୀ ଛକରେ ଛୁରି ଦେଖାଇ ଦାଦାବଟି ମାଗି ଆତଙ୍କରାଜ ସୃଷ୍ଟି କରୁଥିବା ଦୁଇ ଜଣ ଦୁର୍ବୃତ୍ତଙ୍କୁ ବାସେଳିସାହି ଥାନା ପୁଲିସ ଗିରଫ କରିଛି। ଏ ସଂକ୍ରାନ୍ତରେ ୧୫୬/୨୨ ନମ୍ବରରେ ଏକ ମାମଲା ରୁଜୁ କରି ପୁଲିସ ଦୁଇ ଜଣଙ୍କୁ କୋର୍ଟଚାଲାଣ କରିଛି। ସେମାନଙ୍କ ନିକଟରୁ ପୁଲିସ ଗୋଟିଏ ଛୁରି, ଓଡି-୧୩-ଜେ-୨୦୧୨ ନମ୍ବର ବିଶିଷ୍ଟ ପଲସର ଗାଡ଼ି ଏବଂ ୨୧ଶହ ଟଙ୍କା ଜବତ କରିଛି। ପୁଲିସ ସୂତ୍ରରୁ ପ୍ରକାଶ ଯେ ଟାଉନ ଥାନା ଅନ୍ତର୍ଗତ ଦଇତାପଡ଼ାସାହିର ଦେବଦର୍ଶୀ ପୃଷ୍ଟି(୨୭) ଓ ବାସେଳିସାହି ଥାନା ଅନ୍ତର୍ଗତ ମାର୍କଣ୍ଡେଶ୍ବରସାହି ମିଶ୍ର ନୋଳିଆସାହିର ତ୍ରିପତି ବେହେରା(୨୮) ଗତକାଲି ମଶାଣୀଚଣ୍ଡି ଛକରେ ଟୁରିଷ୍ଟ ବସ୍କୁ ଅଟକାଇ ଦାଦାବଟି ମାଗୁଥିଲେ। ଏହି ଖବର ପାଇ ବାସେଳିସାହି ଥାନା ପୁଲିସ ସେଠାରେ ପହଞ୍ଚି ଏହି ଦୁଇ ଜଣଙ୍କୁ ଧରିଥିଲା।