ଧଉଳି: ଚୋରା ବ୍ରାଉନସୁଗାର କାରବାର ମାମଲାରେ ଆଜି ଭୁବନେଶ୍ବର ଅବକାରୀ ବିଭାଗ ଦୁଇଜଣ ବ୍ୟବସାୟୀଙ୍କୁ ଗିରଫ କରି କୋର୍ଟ ଚାଲାଣ କରିଛି । ଅଭିଯୁକ୍ତମାନେ ହେଲେ ପୁରୀ ଜିଲ୍ଲା ପିପିଲି ଥାନା ଅଞ୍ଚଳର ଜଗବନ୍ଧୁ ବୈଠାରୁ (୨୬) ଏବଂ ସଂଜୟ କୁମାର ସାହୁ (୨୫) । ଘଟଣାସ୍ଥଳରୁ ଜଗବନ୍ଧୁ ଓ ସଂଜୟ ଠାରୁ ଅଧିକାରୀମାନେ ୧୫୫ ଗ୍ରାମ ବ୍ରାଉନସୁଗାର ଜବତ କରିଥିଲେ । ଏଥିସହିତ ବ୍ରାଉନସୁଗାର କାରବାର ଘଟଣାରେ ବ୍ୟବହୃତ ଉକ୍ତ ବାଇକଟିକୁ ମଧ୍ୟ ଜବତ କରିଛନ୍ତି । ତେବେ ଜାମିନ ଆବେଦନ ନାଂମଜୁର ହେବାରୁ ଉଭୟଙ୍କୁ ଝାରପଡ଼ା ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୁପରିଟେଣ୍ଡେଣ୍ଟ ରାମଚନ୍ଦ୍ର ମିଶ୍ରଙ୍କ ସୂଚନାକ୍ରମେ ଅବକାରୀ ବିଭାଗ ଇନ୍ସପେକ୍ଟର ବିକାଶ କୁମାର ନାୟକଙ୍କ ତତ୍ବାବଧାନରେ ଓଆଇସି ନାରାୟଣ ଜେନାଙ୍କ ସମେତ ୮ ଜଣିଆ ଟିମ ଆଜି ଭୋର ସମୟରେ ସେମାନଙ୍କୁ ପିଛା କରିଥିଲେ । ଧଉଳି ଛକ ନିକଟରେ ଜଗବନ୍ଧୁ ଓ ସଂଜୟଙ୍କୁ କାବୁ କରି ନେଇଥିଲେ ।
ଜଗବନ୍ଧୁ ଏବଂ ସଂଜୟ ଦୁହେଁ ଅଭ୍ୟାସଗତ ନିଶା ବ୍ୟବସାୟୀ । ଦୁହେଁ ରୀତିମତ ଭାବେ ବାଲିଅନ୍ତା ଥାନା ଓ ଧଉଳି ଥାନା ଉପକଣ୍ଠ ଅଞ୍ଚଳରେ ବ୍ରାଉନସୁଗାର କାରବାର ଚଳାଇଥାନ୍ତି । ଆଜି ଭୋର ସମୟରେ ଧଉଳି ଛକ ଓ ବାଳକାଟି ଭାର୍ଗବୀ ବ୍ରିଜ ନିକଟରେ ଅପେକ୍ଷା କରିଥିବା ବ୍ୟବସାୟୀମାନଙ୍କ ନିକଟରେ ପହଞ୍ଚାଇବା ପାଇଁ ଜବତ ବ୍ରାଉନସୁଗାର ନେଇ ଯାଉଥିଲେ । ହେଲେ ଏସଂପର୍କରେ ଖବର ପାଇ ଅବକାରୀ ଟିମ ଆଜି ସେମାନଙ୍କୁ ପିଛା କରି ଧଉଳି ଛକରେ କାବୁ କରିନେଇଥିଲେ । ଜଗବନ୍ଧୁ ସଂଜୟ ନାମରେ ପିପିଲି ଥାନାରେ ଏସଂପର୍କିତ ମାମଲା ରହିଥିବା ଶ୍ରୀ ନାୟକ କହିଛନ୍ତି ।