ଗଛରେ ପିଟି ହେଲା କାର୍; ୨ ସାଙ୍ଗ ମୃତ, ୩ ଗୁରୁତର

ଢେଙ୍କାନାଳ/ଭାପୁର : ଭୋଜି କରିବାକୁ ଏକ କାର୍‌ରେ ଖୁସିମନରେ ବନ୍ଧୁମାନେ ଆସିଥିଲେ। ଆଜି ଅପରାହ୍ଣ ପ୍ରାୟ ୩ଟାରେ ଏହି କାର୍‌ଟି ଏକ ଗଛରେ ଧକ୍କା ହେବାରୁ ୨ ବନ୍ଧୁଙ୍କ ମୃତ୍ୟୁ ହୋଇଛି। ଏହାସହିତ ୩ ଜଣ ଗୁରୁତର ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ଏଭଳି ଅଭାବନୀୟ ଘଟଣା ଢେଙ୍କାନାଳ ସଦର ଥାନା ଭାପୁର ଫାଣ୍ଡି ଅନ୍ତର୍ଗତ ମହୁଲପୁଞ୍ଜି ଗ୍ରାମ ନିକଟରେ ଘଟିଛି। ମୃତକ ଏବଂ ଆହତମାନେ ସମସ୍ତେ ଖୋର୍ଦ୍ଧା ଅଞ୍ଚଳର ବୋଲି ଜଣାଯାଇଛି।

ଖୋର୍ଦ୍ଧା ଅଞ୍ଚଳର ୧୧ ଜଣ ସାଙ୍ଗ ଭାପୁରର ନୂଆପାଟଣାସ୍ଥିତ ପନ୍ଥେଇ ମନ୍ଦିରଠାରେ ଭୋଜି କରିବାକୁ ଆସିଥିଲେ। ୬ ଜଣ ସାଙ୍ଗ ରୋଷେଇ କରୁଥିବା ବେଳେ ପାଣି ଆଣିବା ନିମନ୍ତେ ୫ ଜଣ ସାଙ୍ଗ ଏକ କାର୍‌ରେ (ଓଡି-୦୨-ବିପି-୫୧୪୯) ମହୁଲପୁଞ୍ଜି ଗ୍ରାମକୁ ଯାଉଥିଲେ। ମହୁଲପୁଞ୍ଜି ଗ୍ରାମଠାରେ କାର୍‌ଟି ଭାରସାମ୍ୟ ହରାଇ ଏକ ଗଛରେ ବାଡ଼େଇ ହୋଇଥିଲା। ଘଟଣାସ୍ଥଳରେ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୩ ଜଣ ଗୁରୁତର ଆହତ ହୋଇଥିଲେ। ସ୍ଥାନୀୟ ଅଞ୍ଚଳବାସୀ ଏବଂ ଅଗ୍ନିଶମବାହିନୀ ଘଟଣାସ୍ଥଳରେ ପହଞ୍ଚି  ଆହତମାନଙ୍କୁ ଉଦ୍ଧାର କରି ଢେଙ୍କାନାଳ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ସେମାନେ ସେଠାରେ ଚିକିତ୍ସିତ ହେଉଥିବା ଜଣାଯାଇଛି। ମୃତକଦ୍ବୟ ହେଲେ ନୟାଗଡ଼ର ସୋମନାଥ ସାହୁ (୪୬) ଓ ଖୋର୍ଦ୍ଧା ଅଞ୍ଚଳର ଭାସ୍କର ସାହୁ । ଗୁରୁତର ଆହତମାନେ ହେଲେ ଖୋର୍ଦ୍ଧା ଅଞ୍ଚଳର ଶ୍ରୀକାନ୍ତ ବେହେରା, ଦୁଃଖୀଶ୍ୟାମ ସାହୁ ଓ ସୁକାନ୍ତ ମାନସିଂ।