ବାଇକ୍ ଧକ୍କା ପରେ ଚଢ଼ିଗଲା ହାଇୱା; ଦୁଇ ଯୁବକ ମୃତ, ଜଣେ ଗୁରୁତର

ଚାନ୍ଦବାଲି : ଚାନ୍ଦବାଲି-ଭଦ୍ରକ ରାଜ୍ୟ ରାଜପଥର ଉଗ୍ରତରା ଛକ ନିକଟରେ ସଡ଼କ ଦୁର୍ଘଟଣାରେ ଦୁଇଜଣ ଯୁବକଙ୍କର ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି।

ସାବିତ୍ରୀ ଓଷା ପାଇଁ ଶାଢ଼ି ଓ ଭୋଗ କିଣି ଚାନ୍ଦବାଲି ଏନ୍‌ଏସି ତାଡୁସାହିର ରମେଶ ବେହେରାଙ୍କ ପୁଅ ପ୍ରଶାନ୍ତ ବେହେରା (୩୩) ଓ ସାଏନ୍ତା ଗ୍ରାମର ମୁନା ସାହୁ ଗତକାଲି ରାତିରେ ଘରକୁ ବାଇକ୍‌ ଯୋଗେ ଫେରୁଥିଲେ। ଉଗ୍ରତରା ଛକ ନିକଟରେ ବିପରୀତ ପଟୁ ଆସୁଥିବା ମୃଗନୟନୀ ଗ୍ରାମର ଜଗନ୍ନାଥ ପରିଡ଼ାଙ୍କ ପୁଅ ଶୁଭମ୍‌ ପରିଡ଼ା (୨୨)ଙ୍କ ବାଇକ୍‌ ସହ ମୁହାଁମୁହିଁ ଧକ୍କା ହେବା ପରେ ସମସ୍ତେ ରାସ୍ତାରେ ପଡ଼ି ଯାଇଥିଲେ। ଏହିସମୟରେ ଚାନ୍ଦବାଲିରୁ ଭଦ୍ରକ ଅଭିମୁଖେ ଯାଉଥିବା ହାଇଓ୍ୱା ଗାଡ଼ି (ଓଡି୨୯ଏଲ୍-୬୫୦୦) ପ୍ରଶାନ୍ତ ଓ ଶୁଭମ୍‌ଙ୍କ ଉପରେ ମାଡ଼ି ଯାଇଥିଲା। ଘଟଣାସ୍ଥଳରେ ପ୍ରଶାନ୍ତ ଓ ଶୁଭମ୍‌ଙ୍କର ମୃତ୍ୟୁ ଘଟିଥିବା ବେଳେ ମୁନା ସାହୁଙ୍କୁ ଗୁରୁତର ଅବସ୍ଥାରେ ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ସେଠାରୁ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା।

ଅନ୍ୟପକ୍ଷରେ, ଦମକଳ କର୍ମଚାରୀ ପହଞ୍ଚିବାରେ ବିଳମ୍ବ ଯୋଗୁ ଘଟଣାସ୍ଥଳରେ ଉତ୍ତେଜନା ଦେଖାଦେଇଥିଲା।