ବିଦ୍ୟୁତ୍ ଖୁଣ୍ଟରେ ପିଟିହେଲା ବାଇକ୍: ୨ ମୃତ, ୧ ଗୁରୁତର
ପଦ୍ମପୁର : ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡ ବୁଡ଼େନ ଥାନା ଅନ୍ତର୍ଗତ ଦହିଗାଁ ନିକଟରେ ଏକ ବିବାହ ଭୋଜିରେ ଯୋଗଦେଇ ୩ ଜଣ ବାଇକ୍ ଯୋଗେ ଫେରୁଥିବା ବେଳେ ଭାରସାମ୍ୟ ହରାଇ ବିଦ୍ୟୁତ୍ ଖୁଣ୍ଟରେ ପିଟି ହୋଇଯିବାରୁ ୨ ଜଣଙ୍କର ମୃତ୍ୟୁ ହୋଇଛି। ମୃତକମାନେ ହେଲେ ଦର୍ଲିଗୁଡ଼ାର ସଂଜୟ ବରିହା (୧୮) ଓ ଛତିଶଗଡ଼ ଘୁଚାପାଲିର ଅଖିଳେଶ ଭୋଇ(୨୨)। ଗୁରୁତର ଥିବା ଦର୍ଲିଗୁଡ଼ାର ବାବୁଲାଲ ଜେନା (୨୦) ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
Sambad is now on WhatsApp
Join and get latest news updates delivered to you via WhatsApp
ଦହିତାଠାରୁ ଏକ ବିବାହ କାର୍ଯ୍ୟକ୍ରମ ସାରି ଗୁରୁବାର ବିଳମ୍ବିତ ରାତିରେ ୩ ଜଣ ବାଇକ୍(ଓଆର୧୭ଏସ୍-୬୩୫୩)ରେ ଦର୍ଲିଗୁଡ଼ା ଗ୍ରାମକୁ ଫେରୁଥିଲେ। ଦହିଗାଁ ନିକଟରେ ବାଇକ୍ଟି ଭାରସାମ୍ୟ ହରାଇ ଏକ ବିଦ୍ୟୁତ୍ ଖୁଣ୍ଟରେ ଧକ୍କା ଦେଇଥିଲା। ଫଳରେ ଅଖିଳେଶ ଓ ସଂଜୟଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା। ଶୁକ୍ରବାର ଭୋରରୁ ଆଖପାଖ ଲୋକେ ଗୁରୁତର ବାବୁଲାଲଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। ଖବର ପାଇ ବୁଡ଼େନ ପୁଲିସ୍ ଘଟଣାସ୍ଥଳରେ ପହଂଚି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ପଦ୍ମପୁର ଡାକ୍ତରଖାନାକୁ ପଠାଇଥିଲା। ଏ ସଂକ୍ରାନ୍ତରେ ବୁଡ଼େନ ଥାନା କେସ୍ ନଂ ୧୭ରେ ଏକ ମାମଲା ରୁଜୁ କରି ଥାନାଧିକାରୀ ଘଟଣାର ତଦନ୍ତ କରୁଛନ୍ତି।