କଟକ ବକ୍ସଡ୍ରେନ୍ରେ ନାବାଳିକା ମୃତ୍ୟୁ: କର୍ତ୍ତବ୍ୟରେ ଅବହେଳା କରି ୨ ସହକାରୀ ଯନ୍ତ୍ରୀ ନିଲମ୍ବିତ
ଭୁବନେଶ୍ବର/କଟକ: କଟକ ମହାନଗର ନିଗମ ଅଧିନ କେଶରପୁର ଗହ୍ମାଡିଆ ନିକଟରେ ନିର୍ମାଣାଧୀନ ବକ୍ସ ଡ୍ରେନ କାମରେ ନର୍ଦ୍ଦମା ପାଣି ନିଷ୍କାସନ ପାଇଁ ବ୍ୟବହାର ହେଉଥିବା ପାଇପ ତଳେ ଚାପି ହୋଇ ମଙ୍ଗଳବାର ଅପରାହ୍ଣରେ ନାବାଳିକା ମୃତ୍ୟୁ ଘଟଣାରେ ରାଜ୍ୟ ସରକାର କାର୍ଯ୍ୟାନୁଷ୍ଠାନ ନେଇଛନ୍ତି। ଗୃହ ଓ ନଗର ଉନ୍ନୟନ ବିଭାଗ ବୁଧବାର ସହକାରୀ ଯନ୍ତ୍ରୀ ସଂଜୀବ ପ୍ରଧାନ ଓ ଦିଲୀପ ସାହୁଙ୍କୁ ନିଲମ୍ବନ କରିଛି। କର୍ତ୍ତବ୍ୟରେ ଅବହେଳା ନେଇ ନଗର ଉନ୍ନୟନ ବିଭାଗ ନିଲମ୍ବନ କରିଛି। ଏନେଇ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ଆଦେଶନାମା ଜାରି ହୋଇଛି।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ବିକଳ୍ପ ବ୍ୟବସ୍ଥା ନଥିବାରୁ ସହଜରେ ରାସ୍ତା ପାର ହେବା ପାଇଁ ଗହ୍ମାଡିଆଠାରେ ଏକ ପାଣି ପାଇପ ତଳେ ୧୭ ବର୍ଷୀୟ ଛାତ୍ରୀ ଜଣକ ଗଳିକି ଯାଉଥିବା ବେଳେ ବିପଦସଙ୍କୁଳ ସ୍ଥିତିରେ ଥିବା ଗୋଟିଏ ପାଇପ ତାଙ୍କ ଅଣ୍ଟା ଉପରେ ପଡି ଯାଇଥିଲା। ସେଠାରେ କ୍ରେନ୍ ଓ ଜେସିବି ପହଞ୍ଚି ତାଙ୍କୁ ଉଦ୍ଧାର କରିବାକୁ ଏକ ଘଣ୍ଟାରୁ ଅଧିକ ସମୟ ଲାଗି ଯାଇଥିଲା। ଗୁରୁତର ଅବସ୍ଥାରେ ପ୍ରଥମେ ଏସ୍ସିବି ଓ ପରେ ସିଡିଏର ଅଶ୍ବିନୀ ହସ୍ପିଟାଲକୁ ତାଙ୍କୁ ନିଆଯାଇଥିବା ବେଳେ ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା।
କେଶରପୁର ପୋଲ ନିକଟରେ ବକ୍ସ ଡ୍ରେନ୍ କାମ ଚାଲିଥିବା ବେଳେ ସେଠାରେ ନର୍ଦ୍ଦମା ପାଣି ନିଷ୍କାସନ ପାଇଁ ୩ଟି ପାଇପକୁ ବ୍ୟବହାର କରାଯାଉଥିଲା। କିନ୍ତୁ ବକ୍ସ ଡ୍ରେନ୍ ନିର୍ମାଣ କାମରେ ନିୟୋଜିତ ଠିକା ସଂସ୍ଥା ସଂପୂର୍ଣ୍ଣ ବେପରୱା ଭାବେ ୪୦ ଫୁଟରୁ ଅଧିକ ଲମ୍ବର ପାଣି ପାଇପକୁ ଏକ ଭଙ୍ଗା କାନ୍ଥ ଉପରେ ରଖିଥିଲା। ଇମର୍ତ୍ତିଦେବୀ ମହିଳା କଲେଜର ଯୁକ୍ତ ଦୁଇରେ ପଢୁଥିବା ନୂଆ ରାଉସାପାଟଣାର କ୍ରିଷ୍ଣା ଦାସ ଓ ହେମ ଦାସଙ୍କ ଝିଅ ଏନ୍. ମଇନୀ ଦାସ ସେହି ବାଟ ଦେଇ ଯାଉଥିବା ବେଳେ ଅଘଟଣର ଶିକାର ହୋଇଥିଲା।