ଦୁଇ ମୋବାଇଲ ଲୁଟେରାଙ୍କୁ ବାନ୍ଧିଲା ପୁଲିସ; ୬ ମୋବାଇଲ୍‌, ୧ ବାଇକ୍‌ ଜବତ

ରାଉରକେଲା: ପୁଲିସ ହାତରେ ଧରାପଡ଼ିଲେ ଦୁଇ ମୋବାଇଲ ଲୁଟେରା। ଅଭିଯୁକ୍ତମାନେ ହେଉଛନ୍ତି ସେକ୍ଟର-୧୫, ଏ’ ବ୍ଲକର ବିସମିଲ୍ଲା ଖାନ(୨୨) ଓ ସେକ୍ଟର-୧୮, ଏ’ ବ୍ଳକର ସୁବ୍ରତ ମୁଖୀ(୨୧)। ସେକ୍ଟର-୭ ପୁଲିସ ଅଭିଯୁକ୍ତମାନଙ୍କୁ ଗିରଫ କରି କୋର୍ଟଚାଲାଣ କରିଛି। ଅଭିଯୁକ୍ତଙ୍କ ପାଖରୁ ବିଭିନ୍ନ କମ୍ପାନିର ୬ଟି ମୋବାଇଲ୍‌ ଓ ଗୋଟିଏ ବାଇକ୍‌(ଓଡି-୧୪-ଏସି-୫୧୩୮) ଜବତ କରିଛି।

ପୁଲିସ ସୂଚନାଅନୁସାରେ, ସେକ୍ଟର-୭ ପୁଲିସ ଥାନା ଅନ୍ତର୍ଗତ ଭିଏସ୍‌ଏସ୍‌ପାଲିରେ ଆର୍‌ଏସ୍‌ପି କର୍ମଚାରୀ ଶଙ୍କର ତାଣ୍ଡି(୨୩) ସପରିବାର ବାସ କରନ୍ତି। ଶନିବାର ମଧ୍ୟାହ୍ନ ପ୍ରାୟ ଅଢ଼େଇଟାରେ ଶଙ୍କର ଅର୍‌ଏସ୍‌ପିରୁ ଡ୍ୟୁଟି ସାରି ଘରକୁ ଫେରୁଥିଲେ। ତାଙ୍କ ମୋବାଇଲକୁ ଫୋନ୍‌ ଆସିବାରୁ ସେ ସେକ୍ଟର-୬ସ୍ଥ ଏନ୍‌ଏସି ଏସ୍‌ଟି ସ୍କୁଲ ସମ୍ମୁଖରେ ଛିଡ଼ା ହୋଇ କଥା ହେଉଥିଲେ। ଏତିକିବେଳେ ଦୁଇ ଅଭିଯୁକ୍ତ ମୋବାଇଳ୍‌ରେ ଆସି ତାଙ୍କ ମୋବାଇଲକୁ ଲୁଟି ନେଇ ଫେରାର ହୋଇଯାଇଥିଲେ। ଏନେଇ ସେକ୍ଟର-୭ ଥାନାରେ ଏତଲା ହେବାପରେ ପୁଲିସ ଛାନ୍‌ଭିନ୍‌ ଆରମ୍ଭ କରିଥିଲା। ପରେ ଅଭିଯୁକ୍ତଦ୍ବୟଙ୍କୁ ଗିରଫ କରିବାରେ ସଫଳ ହୋଇଥିଲା।